ግብረ ሐዋርያት 13 - ሐዲስ ኪዳን በልሳነ ግእዝ

ምዕራፍ 13 በእንተ ተፈንዎተ በርናባስ ወሳውል

¹ ወሀለዉ በቤተ ክርስቲያን ዘአንጾኪያ ነቢያት ወሊቃውንት በርናባስ ወስምዖን ዘተሰምየ ኔጎር ወሉቅዮስ ቀሬናዊ ወምናሄ ወልደ ሐፃኒቱ ለሄሮድስ ንጉሥ ወሳውል።

² ወእንዘ ይገብሩ ግብረ እግዚአብሔር ወይጸውሙ ወይጼልዩ ይቤሎሙ መንፈስ ቅዱስ ፍልጥዎሙ ሊተ ለበርናባስ ወለሳውል ለግብር ዘፈቀድክዎሙ አነ።

³ ወእምዝ ጾሙ ወጸለዩ ወወደዩ እደዊሆሙ ዲቤሆሙ ወፈነውዎሙ።

⁴ ወተፈኒዎሙ እምኀበ መንፈስ ቅዱስ ወረዱ ሴሌውቅያ ወእምህየ ነገዱ ቆጵሮስ በሐመር።

⁵ ወበዊኦሙ ሀገረ ስልማና ነገሩ ቃለ እግዚአብሔር በምኵራባቲሆሙ ለአይሁድ ወሀሎ ዮሐንስ ምስሌሆሙ ይትለአኮሙ።

በእንተ ተኣምር ዘኮነ ላዕለ በርያሱስ

⁶ ወሶበ አንሶሰዉ ውስተ ኵሉ ደሰያት በጽሑ ሀገረ እንተ ስማ ጳፉ ወረከቡ በህየ ብእሴ ዘሥራይ አይሁዳዌ ሐሳዌ ነቢየ ወስሙ በርያሱስ።

⁷ ዘሀሎ ኀበ መልአክ ሰርግዮስ ጳውሎስ ብእሲ ጠቢብ ወጸውዖሙ ለበርናባስ ወለሳውል ወፈቀደ ይስማዕ ቃለ እግዚአብሔር።

⁸ ወይትዋቀሦሙ ውእቱ ዘሥራይ ዘይብልዎ ኤልማስ እስመ ከመዝ ትርጓሜ ስሙ ወፈቀደ ከመ ይክልኦ ለመልአክ አሚነ።

⁹ ወመልአ መንፈስ ቅዱስ ላዕለ ሳውል ዘውእቱ ጳውሎስ ወነጸሮ።

¹⁰ ወይቤሎ ኦ ጽጉበ ኀጢአት ወኵሉ እከይ ወልዱ ለሰይጣን ፀራ ለኵላ ጽድቅ አበይከ ትኅድግ እንዘ ተዐሉ ፍኖተ እግዚአብሔር ርቱዐ።

¹¹ ወይእዜኒ ናሁ እደ እግዚአብሔር ላዕሌከ ወተዐውር አዕይንቲከ ወኢትሬኢ ፀሓየ ወወርኀ እስከ አመ ይበጽሕ ዕድሜከ ወተጸለለ ሶቤሃ ወጸልመ ወኀሠሠ ዘይመርሖ።

¹² ወርእዮ መልአክ ዘኮነ ደንገፀ ወአምነ በእግዚአነ።

በእንተ ፀአቶሙ እምነ ጳፉ

¹³ ወእምዝ ኀለፉ በባሕር እለ ጳውሎስ እምነ ጳፉ ሀገር ወበጽሑ ጴርጌን ዘጵንፍልያ ወኀደጎሙ ዮሐንስ ወተሰውጠ ኢየሩሳሌም።

¹⁴ ወእሙንቱሰ ኀለፉ እምጴርጌን ወበጽሑ አንጾኪያ ዘጲስድያ ወቦኡ ምኵራበ በዕለተ ሰንበት ወነበሩ።

¹⁵ ወእምድኅረ አንበቡ ኦሪተ ወነቢያተ ለአኩ ኀቤሆሙ ሊቃነ ካህናት ወይቤልዎሙ አንትሙ አኀዊነ ለእመቦ እም ውስቴትክሙ ዘይክል ሠናየ ነገረ አይድዕዎሙ ለሕዝብ።

በእንተ ትምህርት ዘመሀረ ጳውሎስ

¹⁶ ወተንሥአ ጳውሎስ ወአዘዘ ያርምሙ ወይቤሎሙ ስምዑ ሰብአ እስራኤል ወእለኒ ትፈርህዎ ለእግዚአብሔር።

¹⁷ አምላኮሙ ለሕዝበ እስራኤል ኀረዮሙ ለአበዊነ ወአዕበዮሙ ለሕዝቡ በኀበ አፍለሶሙ በምድረ ግብጽ ወበመዝራዕቱ ልዑል አውፅኦሙ እምህየ።

¹⁸ ወሴሰዮሙ በገዳም አርብዓ ዓመተ።

¹⁹ ወአእተተ ሰብዐተ አሕዛበ ከነዓን ወአውረሶሙ ምድሮሙ።

²⁰ ወእምድኅረዝ ሤመ ሎሙ መሳፍንተ አርባዕተ ምእተ ወኀምሳ ዓመተ እስከ አመ ሳሙኤል ነቢይ።

²¹ ወእምዝ እንከ ሰአሉ ያንግሥ ሎሙ ወአንገሠ ሎሙ እግዚአብሔር ሳኦልሃ ወልደ ቂስ ብእሴ ዘእምሕዝበ ብንያም አርብዓ ዓመተ።

²² ወሰዐሮ ኪያሁኒ ወእምድኅሬሁ አንገሠ ሎሙ ዳዊትሃ ወሰማዕተ ኮኖ ወይቤ ረከብክዎ ለዳዊት ወልደ ዕሤይ ብእሴ ምእመነ ዘከመ ልብየ ዘይገብር ኵሎ ፈቃድየ።

²³ ወእምዘርዐ ዚኣሁ አምጽአ ሎሙ እግዚአብሔር መድኀኒተ ለእስራኤል ኢየሱስሃ በከመ አሰፈዎሙ።

በእንተ ስብከተ ዮሐንስ

²⁴ ወሰበከ ሎሙ ዮሐንስ ጥምቀተ ለኵሉ ሕዝበ እስራኤል ከመ ይነስሑ እምቅድመ ምጽአተ ዚኣሁ።

²⁵ ወፈጺሞ ዮሐንስ መልእክቶ ይቤሎሙ ምንተኑ ትትሔዘቡኒ ኪያየ አንሰ ኢኮንኩ ኪያሁ ናሁ ይመጽእ እምድኅሬየ ዘኢይደልወኒ እፍታሕ ቶታነ አሣእኒሁ እምእገሪሁ።

²⁶ ወአንትሙ አኀዊነ ትውልደ ዘመደ አብርሃም ወእለ ትፈርህዎ ለእግዚአብሔር ለክሙ ተፈነወ ዝ ነገረ ሕይወት።

²⁷ ወእለሰ ይነብሩ ኢየሩሳሌም ወመላእክቲሆሙ አብዱ ወኢያእመርዎ ለዝንቱ ወኢለበዉ መጻሕፍተ ነቢያት እንዘ ያነብብዎ በኵሉ ሰናብት አላ ፈትሑ ላዕሌሁ ወፈጸሙ ኵሎ ዘተጽሕፈ በእንቲኣሁ።

²⁸ ወሶበ ኢረከቡ ሎቱ ጌጋየ ወኢምንተኒ በዘይቀትልዎ ሰአልዎ ለጲላጦስ ከመ ይቅትሎ።

²⁹ ወሶበ ፈጸሙ ኵሎ ዘተጽሕፈ በእንቲኣሁ አውረድዎ እምዕፅ ወወደይዎ ውስተ መቃብር።

³⁰ ወእግዚአብሔር አንሥኦ እሙታን።

³¹ ወአስተርአዮሙ ብዙኀ መዋዕለ እምድኅረ ተንሥአ ለእለ ዐርጉ ምስሌሁ እምገሊላ ለኢየሩሳሌም ወእሙንቱ ኮንዎ ሰማዕተ በኀበ ሕዝብ።

በእንተ ስምዐ ትንሣኤሁ

³² ወንሕነኒ ንዜንወክሙ ዘአሰፈዎሙ እግዚአብሔር ለአበዊነ ወወሀቦሙ ለውሉዶሙ።

³³ ወአንሥኦ ለኢየሱስ በከመ ይቤ ውስተ መዝሙር ዘክልኤቱ «ወልድየ አንተ ወአነ ዮም ወለድኩከ»።

³⁴ እስመ እግዚአብሔር አንሥኦ እሙታን ከመ ኢይገብእኒ ውስተ ሙስና ከመዝ ይቤ «እሁበክሙ ጽድቆ ለዳዊት ዘእሙን።»

³⁵ ወውስተ ካልእኒ ይብል፤ «ኢትሁቦ ለጻድቅከ ይርአይ ሙስና።»

³⁶ ወዳዊትኒ ተልእከ በመዋዕሊሁ ለትእዛዘ እግዚአብሔር ወኖመሂ ወተቀብረ ኀበ አበዊሁ ወርእየ ሙስና።

³⁷ ወዘሰ አንሥኦ እግዚአብሔር በከመ ይቤ ኢርእያ ለሙስና።

³⁸ አእምሩ እንከ አኀዊነ ከመ በእንቲኣሁ ይትኀደግ ለክሙ ኀጢአትክሙ ዘአሰፈወክሙ።

³⁹ እምኵሉ ዘተስእነክሙ ጸዲቅ በሕገ ኦሪተ ሙሴ ወቦቱሰ ኵሉ ዘአምነ ይጸድቅ።

⁴⁰ ዑቁ እንከ ኢይርከብክሙ ቃለ ነቢይ ዘይቤ።

⁴¹ «ናሁ ርእዩ እለ ታስተሐቅሩ ወአንክሩ ወእመ አኮሰ ትማስኑ እስመ አነ እገብር ግብረ በመዋዕሊክሙ ዘኢተአምንዎ ለእመቦ ዘነገረክሙ።»

⁴² ወአስተብቍዕዎሙ ከመ ይንግርዎሙ ዘንተ ነገረ በካልእት ሰንበት።

⁴³ ወወፂኦሙ እምኵራብ ተለውዎሙ ለጳውሎስ ወለበርናባስ ብዙኃን እምአይሁድ ወእምፈላስያን ወኄራቶሙ ወነገርዎሙ ወአምኑ ወተመይጡ በጸጋ እግዚአብሔር።

በእንተ ትምህርት ዘኮነት በካልእት ሰንበት

⁴⁴ ወበካልእት ሰንበት ተጋብኡ ኵሉ ሀገር ይስምዑ ቃለ እግዚአብሔር።

⁴⁵ ወርእዮሙ ካህናተ አይሁድ ብዙኀ ጉባኤ ሕዝብ ቀንኡ ላዕሌሆሙ ወተዋቀሥዎሙ ለጳውሎስ ወለበርናባስ ወፀረፉ።

⁴⁶ ወነገርዎሙ ጳውሎስ ወበርናባስ ወይቤልዎሙ ለክሙ ርቱዕ ንቅድም ንንግርክሙ ቃለ እግዚአብሔር ወእመሰ ትክሕድዎ ወኢትሬስዩ ርእሰክሙ ለሕይወት ዘለዓለም ናሁ ንትመየጥ መንገለ አሕዛብ።

⁴⁷ እስመ ከማሁ ይብል መጽሐፍ «ረሰይኩከ ብርሃኖሙ ለአሕዛብ ከመ ትኩኖሙ ሕይወቶሙ እስከ አጽናፈ ምድር።»

⁴⁸ ወሰሚዖሙ አሕዛብ ዘንተ ተፈሥሑ ወሰብሑ ቃለ እግዚአብሔር ወአምኑ ኵሎሙ እለ ከፈሎሙ ሕይወተ ዘለዓለም።

⁴⁹ ወበጽሐ ቃለ እግዚአብሔር ውስተ ኵሉ በሐውርት።

በእንተ ሁከት ዘአንሥኡ አይሁድ

⁵⁰ ወወሀክዎን አይሁድ ለአንስት ወለዐበይተ ሀገር ወለኄራተ ሀገር ወአንሥኡ መራደ ላዕለ ጳውሎስ ወበርናባስ ወሰደድዎሙ እምብሔሮሙ።

⁵¹ ወነገፉ ጸበለ እገሪሆሙ ላዕሌሆሙ ወኀለፉ ኢቆንዮን።

⁵² ወመልአ መንፈስ ቅዱስ ዲበ ሐዋርያት ወተፈሥሑ።