ግብረ ሐዋርያት 12 - ሐዲስ ኪዳን በልሳነ ግእዝምዕራፍ 12 በእንተ ሥዩማን እለ አኀዞሙ ሄሮድስ 1 ወውእተ አሚረ አኀዞሙ ሄሮድስ ለሥዩማነ ቤተ እግዚአብሔር ወአሕመሞሙ። 2 ወቀተሎ ለያዕቆብ እኁሁ ለዮሐንስ በሰይፍ። 3 ወርእዮ ከመ ተፈሥሑ አይሁድ አኀዞ ካዕበ ለጴጥሮስ ወበዓለ ፋሲካ ውእተ አሚረ። 4 ወእኂዞ ሞቅሖ ወወሀቦሙ ለዐሠርቱ ወስድስቱ ሠገራት እለ የዐቅብዎ ወፈቀደ እምድኅረ ፋሲካ ያቅርቦ ኀበ ሕዝብ። 5 ወየዐቅብዎ ለጴጥሮስ በቤተ ሞቅሕ ወይጼልዩ ወትረ ኀበ እግዚአብሔር በእንቲኣሁ በቤተ ክርስቲያን። ዘከመ ረድኦ መልአከ እግዚአብሔር ለጴጥሮስ 6 ወበይእቲ ሌሊት እንተ ጸቢሖ ፈቀደ ሄሮድስ ከመ ይመጥዎ ለአይሁድ ወእንዘ ይነውም ጴጥሮስ ማእከለ ክልኤቱ ሠገራት ወሙቁሓት ክልኤሆን እደዊሁ በሰናስል ወዐቀብት የዐቅቡ አናቅጸ ቤተ ሞቅሕ። 7 ወወረደ መልአከ እግዚአብሔር ወቆመ ኀቤሁ ወአብርሀ ውስተ ውእቱ ቤት ወጐድኦ መልአክ ገቦሁ ለጴጥሮስ ወአንቅሖ ወይቤሎ ተንሥእ ፍጡነ ወወድቃ መዋቅሕት እምእደዊሁ። 8 ወይቤሎ ውእቱ መልአክ ቅንት ሐቌከ ወተሠአን አሣእኒከ ወገብረ ከማሁ ወይቤሎ ተዐጸፍኬ ልብሰከ ወነዓ ትልወኒ። 9 ወወፅአ ወተለዎ ወኢያእመረ ጴጥሮስ ከመ እሙነ አስተርአዮ መልአክ አላ ሕልመ ዘየሐልም ይመስሎ። 10 ወወፂኦሙ ቀዳማዌ ዐጸደ ወካልአ በጽሑ ኀበ ኆኅተ ኀጺን ወተርኅወት ሶቤሃ ለሊሃ ወወፂኦሙ ሖሩ አሐተ ሰኰተ ወኀደጎ ዝኩ መልአክ ለጴጥሮስ። 11 ወገብአ ልቡ ለጴጥሮስ ሶቤሃ ወይቤ ይእዜ አእመርኩ ከመ በአማን ፈነወ እግዚአብሔር መልአኮ ወአድኀነኒ እምእዴሁ ለሄሮድስ ወእምኵሉ ተስፋሆሙ ለሕዝበ አይሁድ። በእንተ ሑረቱ ለጴጥሮስ ቤተ ማርያም 12 ወእምዝ ሖረ ቤተ ማርያም እሙ ለዮሐንስ ዘተሰምየ ማርቆስ ኀበ ሀለዉ ብዙኃን አኀው ጉቡኣን ወይጼልዩ። 13 ወጐድጐደ ጴጥሮስ ኆኅተ ወመጽአት ታርኅዎ ወለት እንተ ስማ ሮዴ። 14 ወአእሚራ ቃለ ጴጥሮስ እምትፍሕሥት ኢያርኅወት ወሮጸት ወነገረቶሙ እንዘ ይቀውም ጴጥሮስ ኀበ ኆኅት። 15 ወይቤልዋ ተአብዲኑ ተዐገሢ ምዕረ ወይእቲሰ አጽደቀት ቃላ ወጐድጐደ በሕቁ ወይቤሉ መልአክኑ እንጋ ውእቱ። 16 ወጐንደየ ጴጥሮስ እንዘ ይጐድጕድ ወሶበ አርኀውዎ ወርእይዎ ደንገፁ። 17 ወይቤሎሙ አርምሙ ወነገሮሙ ዘከመ አውፅኦ እግዚአብሔር እምነ ሞቅሕ ወይቤሎሙ ንግርዎሙ ለያዕቆብ ወለኵሎሙ አኀዊነ ዘንተ ወወፅአ ወሖረ ካልአ ቤተ። በእንተ ሠገራት እለ ተሀውኩ 18 ወጸቢሖ ተሀውኩ ሠገራት ፈድፋደ ወይቤሉ ምንተ ኮነ እንከ ጴጥሮስ። 19 ወኀሠሦ ሄሮድስ ወኀጢኦ ኰነኖሙ ለሠገራት ወአዘዘ ይቅትልዎሙ። በእንተ ሞተ ሄሮድስ 20 ወእምዝ ወረደ እምይሁዳ ለቂሳርያ እስመ ተምዐ ላዕለ ሰብአ ጢሮስ ወሲዶና ወመጽኡ ኅቡረ ኀቤሁ ወአስተብቍዕዎ ለበላስጦን መጋቤ ንጉሥ ከመ ይዕርቆሙ እስመ ሲሳየ ብሔሮሙ ኮነ እምሄሮድስ ንጉሥ። 21 ወእምዝ አሐተ ዕለተ ለብሰ ሄሮድስ ልብሰ መንግሥቱ ወነበረ ዐውደ ወአኀዘ ይኰንኖሙ። 22 ወአውየዉ ሕዝብ በቃለ እግዚአብሔር ወአኮ በቃለ ሰብእ። 23 ወቀሠፎ መልአከ እግዚአብሔር ሶቤሃ እስመ ኢያእኰቶ ለእግዚአብሔር ወዐፂዮ ሞተ። በእንተ ዕበየ ቃለ እግዚአብሔር 24 ወቃለ እግዚአብሔር ዐብየ ወበዝኀ። 25 ወገብኡ በርናባስ ወሳውል እምኢየሩሳሌም ፈጺሞሙ መልእክቶሙ ወነሥእዎ ለዮሐንስ ዘተሰምየ ማርቆስ። |