ኀበ ጢሞቴዎስ 2 3 - ሐዲስ ኪዳን በልሳነ ግእዝ

ምዕራፍ 3 በእንተ ደኃሪ መዋዕል

¹ ወዘንተ ባሕቱ አእምር ከመ በደኃሪ መዋዕል ይመጽኣ ዓመታት እኩያት።

² ወይከውኑ ሰብእ መፍቀርያነ ርእሶሙ ባሕቲቶሙ ወመፍቀርያነ ፈጊዕ ወንዋይ ነባብያን ዓላውያን ዝኁራን ፅሩፋን ዐላውያነ አዝማዲሆሙ እለ አልቦሙ አኰቴት ወውፁኣን እምጽድቅ።

³ እለ አልቦሙ ምሕረት ሥሑጻን ጸላእያነ ሠናይ።

⁴ ዝሉፋን ጽሉኣን እለ ያበድሩ ሐውዘ እምፍቅረ እግዚአብሔር።

⁵ ይትሜሰሉ ጻድቃነ ወይክሕድዎ ለኀይለ ጽድቅ ወለእለ ከመዝ ተገኀሦሙ።

⁶ እስመ እሙንቱ እለ ይትባውኡ አብያተ ሰብእ ወይፄውውዎን ለአንስት እለ ፅፉራት በኀጢአት ወያወርዳ ውስተ ብዙኅ ፍትወት።

⁷ ወዘልፈ ይትጌሠጹ ወኢየአምርዋ ግሙራ ለጽድቅ።

⁸ ከመ ኢያኔስ ወኢያንበሬስ እለ ተቃወምዎ ለሙሴ ከማሁ እሉሂ ይተቃወምዋ ለጽድቅ ሰብእ ሙሱናነ ልብ ወኑፉቃነ ሃይማኖት።

⁹ ወባሕቱ ኢይትሌዐሉ እስመ ፈድፈደት እበዶሙ ወተዐውቀት ለኵሉ ከመ እበዶሙ ለእልክቱ ዓዲ።

በእንተ ተሊወ መምህራን

¹⁰ ወአንተሰ ተለውከ ትምህርትየ ወተመሰልከ በግዕዝየ በዘመሀርኩከ በሃይማኖት ወበተስፋ ወበተፋቅሮ ወበትዕግሥት ወበኅድአት ወበተሰዶ ወበሕማም።

¹¹ ተአምር መጠነ ረከበኒ በአንጾኪያ ወበኢቆንያ ወበልስጥራን መጠነ ተዐገሥኩ ተሰዶ ወእምኵሉ አድኀነኒ እግዚአብሔር።

¹² ወኵሎሙ እለ ይፈቅዱ ይሕየዉ በጽድቀ ኢየሱስ ክርስቶስ የሐምሙ።

¹³ ወሰብእሰ እኩያን ይትሌዐሉ ውስተ እንተ ተአኪ ወይስሕቱ ወያስሕቱ።

¹⁴ ወአንተሰ ሀሉ በዘተመሀርከ ወተአመንከ።

¹⁵ ተአምር በኀበ መኑ ተምህርከ እምንእስከ መጽሐፈ ቅዱሰ ዘይክል አሕይዎተከ በሃይማኖተ ኢየሱስ ክርስቶስ።

¹⁶ ወኵሉ መጽሐፍ ዘበመንፈሰ እግዚአብሔር ተጽሕፈ ይበቍዕ ለኵሉ ትምህርት ወተግሣጽ ወአርትዖ ወጥበብ ወጽድቅ።

¹⁷ ከመ ይትገሠጽ ብእሴ እግዚአብሔር ውስተ ኵሉ ምግባረ ሠናይ።