ኀበ ጢሞቴዎስ 2 2 - ሐዲስ ኪዳን በልሳነ ግእዝ

ምዕራፍ 2 በእንተ ኄር መስተጋድል

¹ ወአንተኒ ወልድየ ጽናዕ በጸጋሁ ለእግዚእነ ኢየሱስ ክርስቶስ።

² ወዘሰማዕከ በላዕሌየ በኀበ ብዙኃን ሰማዕት ኪያሁ መሀሮሙ ለመሃይምናን ሰብእ እለ ይደልዎሙ ከመ ይምሀሩ ለባዕዳን።

³ ወጻሙ ከመ ኄር መስተጋድል ላእከ ኢየሱስ ክርስቶስ።

⁴ እስመ አልቦ ዘይትቃተል ወይኄሊ ንብረተ ዝ ዓለም ዘእንበለ ከመ ያድሉ ለዘሤሞ።

⁵ መስተጋድልኒ ኢይከውኖ ምዝጋና ለእመ በሕጉ ኢተጋደለ።

⁶ ወዘኒ ይጻሙ ሐረሳዊ ግብረ ይቀድም ረኪበ ፍሬሁ።

⁷ ወለቡ ዘእቤለከ የሀብከ እግዚአብሔር ጥበበ በኵሉ።

⁸ ተዘከሮ ለኢየሱስ ክርስቶስ ዘተንሥአ እምዉታን ዘእምዘርዐ ዳዊት ዘመሀርኩ በስሙ።

⁹ ዘበእንቲኣሁ እሰርሕ ወእትሞቃሕ ከመ ጕሕልያ ወባሕቱ ቃለ እግዚአብሔርሰ ኢይትአሰር።

¹⁰ ወበእንተዝ እትዔገሥ በኵሉ በእንተ ኅሩያኒሁ ከመ እሙንቱሂ ይርከቡ ሕይወተ ዘበኢየሱስ ክርስቶስ ወስብሐተ ዘለዓለም ዘበሰማያት።

¹¹ እሙን ነገር እምከመ ዐረይነ መዊተ ንዔሪ ሕይወተ።

¹² ወእምከመ ዐረይነ ትዕግሥተ ንዔሪ ነጊሠ ወእመሰ ክሕድናሁ ውእቱኒ ይክሕደነ።

¹³ ወእመኒ ኢአመናሁ ውእቱሰ ምእመነ ይነብር ወኢይክል ክሒደ ርእሶ።

በእንተ እምነተ ገባራዊ

¹⁴ ከመዝ ዘክሮሙ ወአስምዕ ቅድመ እግዚአብሔር ወኢትትላኰይ በግብር ዘኢይበቍዕ በዘይትገፈትዑ እለ ይሰምዑ።

¹⁵ አስተፋጥን ከመ ትረሲ ርእሰከ ኅሩየ ለኀበ እግዚአብሔር ከመ ገባራዊ ዘኢይትኀፈር ዘርቱዐ ይመትር ቃለ እግዚአብሔር በጽድቅ።

¹⁶ ወለነገረ ርኩሳንሰ ዘአልቦ ባቍዕ እበዮ እስመ ያአብይዋ ለኀጢአቶሙ።

¹⁷ ወነገሮሙኒ ከንቱ ከመ ዘይትረአይ ወይልህቅ በብዙኃን እለ ሄሜኔዎስ ወፊሎጦስ።

¹⁸ እለ አውከኩ እምጽድቅ ወይብሉ ወድአ ኮነ ትንሣኤ ምዉታን ወይገፈትዑ ሃይማኖቶሙ ለብዙኃን።

¹⁹ ወዘሰ ጽኑዕ በመሠረተ እግዚአብሔር ይቀውም እንዘ ቦ ዝንቱ ማዕተብ ወየአምሮሙ እግዚአብሔር ለእሊኣሁ ወይርኅቅ እምዐመፃ ኵሉ ዘይሰሚ ስመ እግዚአብሔር።

²⁰ ውስተ ቤትኒ ዐቢይ አኮ ባሕቲቱ ንዋየ ወርቅ ወብሩር ዓዲ ቦ ዘዕፅኒ ወዘልሕኵትኒ ቦ ዘለክብርኒ ወቦ ዘለኀሣርኒ።

²¹ ወእመቦ ዘአንጽሐ ርእሶ እምዝ እኩይ ይከውን ንዋየ ክብር ቅዱሰ ወባቍዐ ለመልእክተ እግዚኡ ወድልወ ለኵሉ ምግባረ ሠናይ።

²² ጕየያ ለፍትወተ ውርዙት ወዴግና ለጽድቅ ወለሃይማኖት ተፋቅሮ ወሰላም ምስለ ኵሎሙ እለ ይጼውዕዎ ለእግዚአብሔር በልብ ንጹሕ።

²³ እበዮ ለነገረ እበድ፥ ወሥላቅ ወተኃሥሦ ከንቱ ተአምር ከመ መንሱተ ያመጽእ።

²⁴ ወገብረ እግዚአብሔርሰ ኢይትገዐዝ አላ ከመ ሕፃን የዋሀ ይከውን ምስለ ኵሉ ወመምህረ ወመስተዐግሠ እምኵሉ።

²⁵ ወይጌሥጽ በየውሀት ለእለ ይትቃረኑ እመቦ ከመ የሀቦሙ እግዚአብሔር ይነስሑ ወያእምርዎ ለጽድቅ።

²⁶ ወያንቅሁ ነፍሶሙ እመሥገርተ ሰይጣን እስመ ወድአ አሥገሮሙ ለተሊወ ፈቃዱ።