ኀበ ሰብአ ቆሮንቶስ 2 8 - ሐዲስ ኪዳን በልሳነ ግእዝ

ምዕራፍ 8 በእንተ ቤተ ክርስቲያን ዘመቄዶንያ

¹ ወእነግረክሙ አኀዊነ ጸጋ እግዚአብሔር ዘተውህበ ለቤተ ክርስቲያን ዘመቄዶንያ።

² እስመ እምብዝኀ መከራ ሕማሞሙ ፈድፈደ ፍሥሓሆሙ ወምስለ ዕመቀ ንዴቶሙ ፈድፈደት ፍሥሓ ብዕሎሙ።

³ እስመ ለልየ ሰማዕቶሙ ከመ በአምጣነ ኀይሎሙ ወዘእንበለ ኀይሎሙሂ ጥቡዓን እሙንቱ ለሊሆሙ።

⁴ ወብዙኀ አስተብቍዑነ በእንተ ሱታፌ መልእክተ ቅዱሳን።

⁵ ወአኮሂ በከመ ተሐዘብነ እስመ ለሊሆሙ አቅደሙ በፈቃዶሙ ወመጠዉ ነፍሶሙ ለእግዚአብሔር ለነኒ በከመ ፈቀደ እግዚአብሔር።

⁶ ወአስተፍሥሓነ ቲቶ ወአስተብቋዕናሁ ከመ ይፈጽም ለክሙ ጸጋሁ በከመ ወጠነ።

⁷ እስመ ፈድፈድክሙ በኵሉ በሃይማኖት ወበቃል ወበጥበብ ወበጽሒቅ በኵሉ ዘኮነ በኀቤክሙ ወአፍቅሮተክሙ ኪያነ ከማሁ አፈድፍዱ ካዕበ ውስተ ዛቲ ጸጋ።

⁸ ወአኮ በግብር ዘእብለክሙ ዳእሙ እስመ ቦ እለ ይጽሕቅዎ ለዝንቱ እምኔክሙ ወናሁ አእመርኩ ጽንዐ ሃይማኖትክሙ ወአፍቅሮትክሙ።

⁹ ተአምሩ ጸጋሁ ለእግዚእነ ኢየሱስ ክርስቶስ በእንቲኣክሙ አንደየ ርእሶ እንዘ ባዕል ውእቱ ከመ አንትሙ ትብዐሉ በንዴተ ዚኣሁ።

¹⁰ ወበዝንቱ አምከርኩክሙ ዘይበቍዐክሙ እስመ ፈቀድክሙ ወአቅደምክሙ ትመጥዉ ነፍሰክሙ እምቀዳሚ ዓም።

¹¹ ወይእዜሰ ግበሩሂ ወፈጽሙሂ እስመ ፈቂድሂ እምፈቲው ወገቢርሂ እምረኪብ።

¹² ወእምከመሰ ፈቂድ ሀሎ ይትመዘገን በዘይትከሀሎ ወአኮ በአምጣነ ዘኢይትከሀሎ።

¹³ ወዘአኮ ከመ ባዕድ ያዕርፍ ኪያክሙ ናጠውቅ ዳእሙ ተሀልዉ ዕሩየ በዝ መዋዕል።

¹⁴ እስመ ተረፈ ዚኣክሙ ውስተ ንትጋ እልክቱ ይከውን ወተረፈ ዚኣሆሙ ውስተ ንትጋ ዚኣክሙ ይከውን ከመ ይኩን ሀልዎትክሙ ዕሩየ በኵሉ።

¹⁵ እስመ ከመዝ ይቤ መጽሐፍ «ዘቦ ብዙኅ ኢያትረፈ ወዘቦ ውኁድ ኢያሕጸጸ።»

በእንተ ቲቶ ወአብያጺሁ

¹⁶ እኩት እግዚአብሔር ዘወሀበነ ለነሂ ንጽሐቅ በእንቲኣክሙ በከመ ይቤ ቲቶ።

¹⁷ እስመ የአኵተክሙ ወተወክፈ ለክሙ ስላጤክሙ ወአስተፋጠነ ይምጻእ ኀቤክሙ ጥቡዐ።

¹⁸ ወፈኖነ ምስሌሁ እኁነ ዘንእድዎ ኵሉ አብያተ ክርስቲያናት በእንተ ትምህርቱ።

¹⁹ ዓዲ ሥዩም ውእቱ ለቤተ ክርስቲያን ወኅቡር ምስሌነ በዛቲ ጸጋ እንተ ተልእክነ ለስብሐተ እግዚአብሔር ከመ ንትፈሣሕ።

²⁰ ወተዐቀብዎ ለዝንቱ ከመ ኢታንውርዋ ለመልእክትክሙ።

²¹ ወሠናየ ኀልዩ ለቅድመ እግዚአብሔር ወለቅድመ ሰብእ።

²² ወናሁ ፈነውነ ምስሌሆሙ ዓዲ እኁነ ዘአመከርናሁ በብዙኅ ወረከብናሁ ከመ ጸሓቂ ውእቱ በኵሉ ወይእዜኒ ፈድፋደ ያስተፋጥን ይምጻእ ኀቤክሙ ወይጽሕቅ በእንቲኣክሙ እስመ ብዙኀ ያፈቅረክሙ።

²³ ወእመኒ ቲቶ ሱታፌ ዘነኀብር ምስሌሁ ግብረ ወበእንተሂ አኀዊነ ሐዋርያት ዘቤተ ክርስቲያን ለስብሐተ እግዚአብሔር።

²⁴ ይእዜሰ አርእዩ ሎሙ ክሡተ ተፋቅሮተክሙ ዝንቱ ውእቱ ዘቦቱ ንትሜካሕ ብክሙ ንሕነ ወይእዜኒ አርእዩ ቦሙ በቅድመ ቤተ ክርስቲያን።