ኀበ ሰብአ ቆሮንቶስ 2 7 - ሐዲስ ኪዳን በልሳነ ግእዝ

ምዕራፍ 7 በእንተ አንጽሖ ርእስ

¹ ወበእንተ ዘብነ ዝንቱ ተስፋ አኀዊነ ናንጽሕ ርእሰነ ወኢናግምን ነፍስተነ ወንግበር በዘንትቄደስ በፈሪሀ እግዚአብሔር።

² ወይእዜኒ ተአምሩ አኀዊነ እስመ አልቦ ዘአበስነ ወአልቦ ዘገፋዕነ ወአልቦ ዘአማሰነ ወአልቦ ዘተዐገልነ።

³ ወአኮ ለአድልዎ ዘእብል እስመ ወዳእኩሂ እቤ ከመ ምሉኣን አንትሙ ውስተ ልብነ ለመዊትኒ ወለሕይወትኒ።

⁴ ወከመዝ ብየ ብዙኅ ሞገስ በኀቤክሙ ወብዙኅ ትምክሕትየ በእንቲኣክሙ ወፈጸምኩ ፍሥሓየ ወፈድፈደኒ ሐሤትየኒ እምኵሉ ሕማምየ።

⁵ ወበጺሐነ መቄዶንያ ኢረከብነ ወኢአሐተኒ ዕረፍተ ለነፍስነ ወበኵሉ አሕመሙነ በአፍኣኒ ቀትል ወመንሱት ወበውስጥኒ ፍርሀት።

⁶ ወባሕቱ ውእቱ እግዚአብሔር ዘያስተፌሥሖሙ ለሕሙማን አስተፍሥሐነ በምጽአቱ ለቲቶ።

⁷ ወአኮ በምጽአቱ ባሕቲቱ ዓዲ በፍሥሓ ዘአስተፍሣሕክምዎ ወዜነወነ አፍቅሮተክሙ ዘከመ ትጽሕቁ ለነ ወትትቃኀዉ ወሰሚዕየ ዘንተ ጸንዐ ፍሥሓየ ብክሙ።

በእንተ ትካዝ መፍትው

⁸ ወእመኒ አተከዝኩክሙ ቀዳሚ በመጽሐፍ ዘጸሐፍኩ ለክሙ ኢያኔስሐኒ ወእመኒ ነሳሐኩ ናሁ እሬእያ ለይእቲ መልእክት እመሂ ለአሐቲ ሰዓት አተከዝኩክሙ ናሁ ይእዜ እትፌሣሕ በእንቲኣሃ ብዙኀ።

⁹ ወአኮሰ ውእቱ እስመ ተከዝክሙ ዳእሙ እስመ ተከዝክሙ ከመ ትነስሑ እስመ እንበይነ እግዚአብሔር ተከዝክሙ ከመ ኢይትኀጐል አሐዱሂ እምኔክሙ።

¹⁰ እስመ ዘበእንተ እግዚአብሔር ኀዘን ንስሓሁ ለሕይወት ዘለዓለም ይከውን ወትካዝሰ ዘበእንተ ዓለም ሞተ ያመጽእ።

¹¹ ወናሁ ውእቱ ትካዝ ዘበእንተ እግዚአብሔር ጻሕቀ ወቅስተ ወፍርሀተ ወግርማ ወተፋቅሮ ወተቃሕዎ ፍዳ ገብረ ለክሙ እስከ አቀምክሙ ርእሰክሙ በንጽሕ ወበምግባር ከመ ዘኢተአምሩ ወኢምንተኒ።

¹² ወዘኒ ዘጸሐፍኩ ለክሙ አኮ በእንተ ዘገፍዐ ወዘተገፍዐ ዳእሙ ከመ ይትዐወቅ ከመ ጽሕቅሙ በእንቲኣነ በቅድመ እግዚአብሔር።

¹³ ወበእንተዝ ተፈሣሕነ ወዓዲ ዲበ ፍሥሓነ ተፈሣሕነ ወፈድፋደሰ በፍሥሓ ቲቶ እስመ አዕረፍክምዋ ለነፍሱ በኀበ ኵልክሙ።

¹⁴ እስመ ኢያስተኀፈርክሙኒ በኵሉ ዘተመካሕኩ ሎቱ በእንቲኣክሙ አማነ ረሰይክሙ ለነ ዘነገርናሁ ወከማሁ እሙነ ኮነ።

¹⁵ ወፈድፋደ የአኵተክሙ ወይዜከረክሙ ዘከመ ትትኤዘዙ ሎቱ ወትትዌከፍዎ በፍርሀት ወበረዓድ።

¹⁶ ወእትፌሣሕ ባሕቱ እስመ በኵሉ እትአመነክሙ።