ኀበ ሰብአ ቆሮንቶስ 2 6 - ሐዲስ ኪዳን በልሳነ ግእዝ

ምዕራፍ 6 በእንተ አርትዖ ምግባር

¹ ወናስተበቍዕሂ ኀቤክሙ ወንረድእሂ ተወከፉ ለነ ወኢትረስይዋ ለከንቱ ለጸጋ እግዚአብሔር እንተ ነሣእክሙ።

² እስመ ከመዝ ይቤ «በዕለት ኅሪት እሰምዐከ ወበዕለተ መድኀኒት እረድአከ» ወናሁ ይእዜ ዕለት ኅሪት ወናሁ ዮም ዕለተ አድኅኖት።

³ ዑቁ እንከ ወኢተሀቡ ለመኑሂ ዕቅፍተ ከመ ኢታልስሑ መልእክተክሙ ወኢታንውርዋ።

⁴ ወበኵሉ አርትዑ ርእሰክሙ ወኩኑ ላእካነ ለእግዚአብሔር በብዙኅ ትዕግሥት በኵሉ ሕማም ወጻዕር ወምንዳቤ።

⁵ ወበተቀሥፎ ወበተሞቅሖ ወበስራሕ ወበተሀውኮ በትጋህ ወበጾም።

⁶ ወበንጽሕ ወበአእምሮ በምክር ወበተዓግሦ በምሒር ወበመንፈስ ቅዱስ በፍቅር ዘእንበለ አድልዎ።

⁷ በነገረ ጽድቅ ዘእንበለ ኑፋቄ በኀይለ እግዚአብሔር ወወልታ ጽድቅ ዘእምየማን ወዘእምፀጋም።

⁸ በክብር ወበኀሣር በምድኀር ወበመርገም ከመ ኃጥኣን ወጻድቃን።

⁹ ከመ እለ ኢየአምርዎሙ ወዕዉቃን ከመ አብዳን ወጠቢባን ከመ ምዉታን ወንሕነ ሕያዋን ከመ ምንስዋን ወኢቅቱላን።

¹⁰ ከመ ትኩዛን ወዘልፈ ንትፌሣሕ ከመ ነዳያን ወለብዙኃን ታብዕሉ ከመ ዘአልብክሙ ወኢምንተኒ ወኵሉ ውስተ እዴክሙ።

በእንተ ሰብአ ቆሮንቶስ

¹¹ አፉነ ክሡት ለክሙ ኦ ሰብአ ቆሮንቶስ ወርሒብ ልብነ።

¹² ወአልብነ ንሂክ እምኔክሙ ወኢላዕሌክሙ እምኔነ አላ ንህክሙ ወተመንደብክሙ ለምሕረትክሙ።

¹³ እብለክሙ ከመ ዘለደቂቅየ በእንተ ውእቱ ፍድዩ ዘይደሉ ሊተ ላዕሌክሙ አርሕቡ ሊተ አፍቅሮተክሙ አንትሙኒ።

በእንተ ተፈልጦ እምኢምእመናን

¹⁴ ወኢትኩኑ ኑፉቃነ ወኢትሑሩ ውስተ አርዑተ እለ ኢየአምኑ መኑ ዘያስተዔርያ ለጽድቅ ምስለ ኀጢአት ወመኑ ዘይዴምሮ ለብርሃን ምስለ ጽልመት።

¹⁵ ወመኑ ዘያኀብሮ ለክርስቶስ ምስለ ቤልሆር ወመኑ ዘይከፍሎሙ ለመሃይምናን ምስለ ኑፉቃን።

¹⁶ ወመኑ ዘይዴምር ታቦተ እግዚአብሔር ውስተ ቤተ ጣዖት አኮኑ ንሕነ ውእቱ ቤቱ ለእግዚአብሔር ሕያው በከመ ይቤ እግዚአብሔር «አነ አኀድር ኀቤሆሙ ወአንሶሱ ማእከሎሙ ወእከውኖሙ አምላኮሙ ወእሙንቱኒ ይከውኑኒ ሕዝብየ።»

¹⁷ ወበእንተ ዝንቱ ፃኡ እማእከሎሙ ወተፈለጡ እምኔሆሙ ይቤ እግዚአብሔር ወኢትቅረቡ ኀበ ርኩሳን ወአነ እትዌከፈክሙ።

¹⁸ «ወእከውነክሙ አባክሙ ወአንትሙኒ ትከውኑኒ ደቂቅየ ወአዋልድየ ይቤ እግዚአብሔር ዘኵሎ ይመልክ።»