ኀበ ሰብአ ቆሮንቶስ 2 3 - ሐዲስ ኪዳን በልሳነ ግእዝ

ምዕራፍ 3 በእንተ ጽሒፈ መልእክተ ክርስቶስ ለምእመናን

¹ አኀዊነ ነአኀዝኑ ካዕበ ይእዜ ንንግርክሙ ንወድስ ርእሰነ ወቦኑ ዘንፈቅድ ከመ እልክቱ ካልኣን እስከ ንጽሕፍ ኀቤክሙ በእንቲኣነ መጽሐፈ አው ከመ ትጽሐፉ አንትሙ።

² ወለነሰ መጽሐፍነ አንትሙ ይእቲ ወጽሕፍት ውስተ ልብነ ወትትዐወቅ ወያነብባ ኵሉ ሰብእ።

³ ወየአምሩክሙ ከመ መልእክተ ክርስቶስ አንትሙ እንተ ተልእክናሃ ንሕነ ወጽሕፍት ይእቲ ወአኮ በማየ ሕመት ዘእንበለ በመንፈሰ እግዚአብሔር ሕያው ወኢኮነ ጽሌ ዘእብን ዘእንበለ ጽሌ ልብ ዘሥጋ።

⁴ ወብነ ባሕቱ ከመዝ ተስፋ በኀበ እግዚአብሔር በእንተ ክርስቶስ።

⁵ ወኢይደልወነ ነኀሊ ለሊነ ለርእስነ ወኢምንተኒ።

⁶ እስመ እምኀበ እግዚአብሔር ኀይልነ ዘረሰየነ ላእካነ ለሐዲስ ሕግ ወአኮ በሕገ መጽሐፍ አላ በሕገ መንፈስ እስመ መጽሐፍ ይቀትል ወመንፈስ ያሐዩ።

በእንተ ክብረ መልእክታት

⁷ ወሶበ ለእንታክቲ መልእክተ ሞት እንተ ተጽሕፈት በእብን ተገብረ ላቲ ስብሐት እስከ ኢይክሉ ደቂቀ እስራኤል ነጽሮተ ገጹ ለሙሴ በእንተ ስብሐተ ገጹ ኀላፊ።

⁸ እፎ እንከ ይትገበር ፈድፋደ ስብሐት ለመልእክተ መንፈስ ቅዱስ።

⁹ ሶበ ለመልእክት እንተ ታኴንን ወታሐስብ ተገብረ ላቲ ስብሐት ብዙኅ ሚ መጠን ፈድፋደ መልእክተ ጽድቅ ትሴባሕ ወትከብር።

¹⁰ እስከ ትከውን እንተ ተሰብሐት ከመ ዘኢተሰብሐት ሶበ ያስተዔርይዋ በዝንቱ ስብሐት ዐቢይ።

¹¹ ወሶበ ኀላፊ ዘይሰዐር ረከበ ስብሐተ እፎ ፈድፋደ ዘይነብር ይረክብ ቀዋሚ ስብሐተ።

¹² ወእንዘ ብነ መጠነዝ ተስፋ ርቱዕ ንቅረብ በገጽ ገሃደ።

¹³ ወአኮ ከመ ሙሴ ዘይገለብብ ገጾ ከመ ኢይርአይዎ ደቂቀ እስራኤል።

¹⁴ ወባሕቱ ተጸለለ ልቦሙ እስከ ይእዜ እስመ ውእቱ ግላ ነበረ ውስተ ሕግ ብሉይ አምጣነ ተነበ ወኢተከሥተ እስከ አፅርዖ ክርስቶስ።

¹⁵ ወእስከ ዮም ሶበ ያነብቡ ኦሪተ ሙሴ ይገልዎሙ ልቦሙ።

¹⁶ ወእምከመ ተመይጡ ኀበ እግዚአብሔር የአትት ውእቱ ግላ እምኔሆሙ።

¹⁷ እስመ እግዚአብሔር መንፈስ ውእቱ ወኀበ ሀሎ መንፈሰ እግዚአብሔር ህየ ሀሎ ግዕዛን።

¹⁸ ወንሕነሰ ኵልነ ከሢተነ ገጸነ ንነጽር ስብሐተ እግዚአብሔር ከመ ዘበመጽሔት ወንትመሰል በአርኣያ ዚኣሁ ከመ ንባእ እምክብር ውስተ ክብር በከመ ይሁበነ እግዚአብሔር መንፈሰ።