ኀበ ሰብአ ቆሮንቶስ 2 2 - ሐዲስ ኪዳን በልሳነ ግእዝ

ምዕራፍ 2 በእንተ ምክንያተ ጽሕፈቱ ዳግም

¹ ወዘንተ እንከ መከርኩ በነፍስየ ኢይምጻእ ትኩዝየ ኀቤክሙ።

² ወእመሰ አነ አተከዝኩክሙ መኑ ያስተፌሥሐኒ ዘእንበለ ዘአነ አተከዝክዎ።

³ ወዘኒ ዘጸሐፍኩ ለክሙ ከመ መጺእየ ኢይርከበኒ ኀዘን በዘሀለወኒ እትፌሣሕ ተአሚንየ በኵልክሙ ከመ ፍሥሓ ዚኣየ ዘኵልክሙ ውእቱ።

⁴ እስመ እምነ ብዙኅ ሕማም ወኀዘነ ልብ ጸሐፍኩ ለክሙ ዘንተ በብዙኅ አንብዕ ወአኮሰ ከመ ትተክዙ ዳእሙ ከመ ታእምሩ አፍቅሮትየ ከመ ፈድፋደ አፈቅረክሙ።

⁵ ወዘኒ አተከዘኒ አኮ ኪያየ ባሕቲቶ ዘያቴክዝ ዳእሙ ኵልክሙ ዘእንበለ አሐዱ ኅብር እምኔክሙ ወይእዜኒ ኢያከብድ ቃልየ ላዕሌክሙ።

⁶ ተአክሎ ለዘከመዝ ዛቲ ተግሣጽ እንተ ረከበቶ እምብዙኃን።

⁷ ወዓዲ ይደሉ ከመ ትስረዩ ሎቱ ወታስተፍሥሕዎ ከመ ኢይሠጠም እምብዝኀ ኀዘን ዘከመዝ።

⁸ ወበእንተዝ አስተበቍዐክሙ አጽንዑ ተፋቅሮ ምስሌሁ።

⁹ ወበእንተዝ ጸሐፍኩ ለክሙ ከመ አእምር ግዕዘክሙ ለእመሁ በኵሉ ትትኤዘዙኒ አው አልቦ።

¹⁰ ወእመቦ ዘሰረይክሙ ሎቱ አነሂ ሰረይኩ ምስሌክሙ ወእመሂ ቦ ዘኀደግሙ ሎቱ ኀደጉ ለልየ በእንቲኣክሙ በገጹ ለክርስቶስ።

¹¹ ከመ ኢይትዐገለነ ሰይጣን እስመ አኮ ዘንስሕቶ ኅሊናሁ።

በእንተ ፍኖተ እግዚአብሔር

¹² ወበጺሕየ ጢሮአዳ ውስተ ትምህርቱ ለክርስቶስ ተከሥተ ሊተ ፍኖተ እግዚአብሔር።

¹³ ወኢረከብኩ ዕረፍተ ለነፍስየ እስመ ኢረከብክዎ ለቲቶ እኁየ ወተፈለጥኩ እምኔሁ ወሖርኩ መቄዶንያ።

¹⁴ እኩት እግዚአብሔር ዘዘልፈ የዐቅበነ በእግዚእነ ኢየሱስ ክርስቶስ ወተዐውቀ በላዕሌነ መዐዛ አእምሮቱ በኵሉ በሐውርት።

¹⁵ እስመ መዐዛሁ ለክርስቶስ ንሕነ በኀበ እግዚአብሔር በእንተ እለ ይድኅኑ ወእለሂ ይትኀጐሉ።

¹⁶ እስመ ቦ እለ ይደልዎሙ መዐዛ ሞት ለሞት ወቦ እለ ይደልዎሙ መዐዛ ሕይወት ለሕይወት ወመኑ ዘይደልዎ ዝንቱ።

¹⁷ እስመ ኢኮነ ከመ ብዙኃን እለ ይትሜየንዎ ለቃለ እግዚአብሔር በካልእ ዳእሙ በንጽሕ ወከመ ዘመጽአ እምእግዚአብሔር ንነግር በቅድመ እግዚአብሔር በእንተ ክርስቶስ።