ኀበ ሰብአ ቆሮንቶስ 2 11 - ሐዲስ ኪዳን በልሳነ ግእዝ

ምዕራፍ 11 በእንተ ቅንአት ዘለእግዚአብሔር

¹ ወርዕቱሰ ትትዐገሡኒ ኅዳጠ ከመ እንብብ በእበድየ እንዘ ትትዔገሡኒ።

² እስመ እቀንእ ለክሙ ቅንአተ እግዚአብሔር እስመ ፈኀርኩክሙ ለአሐዱ ምት ድንግል ወንጹሕ ክርስቶስ ከመ አቅርብክሙ ኀቤሁ።

³ ወባሕቱ እፈርህ ዮጊ ከመ አርዌ ምድር አስሐታ ለሔዋን በጕሕልት እንዳዒ ለእመ ይማስን ልብክሙ እምየውሃቱ ወንጽሑ ለክርስቶስ።

⁴ ሶበሁ ኮነ ዘይመጽእ ኀቤክሙ ዘጸውዐክሙ ኀበ ካልእ ኢየሱስ ዘኢሰበክነ ለክሙ ወእመ ቦ ካልእ መንፈስ ዘትነሥኡ ዘኢነሣእክሙ ወእመኒ በካልእ ትምህርት ዘኢተመሀርክሙ ርቱዕ ትጽንሑነ።

⁵ ወባሕቱ እትሔዘብ አልቦ ዘአሕጸጽኩክሙ እምዘባዕዳን ሐዋርያት።

በእንተ ምህሮ ወንጌል ዘእንበለ ዐስብ

⁶ ወእመኒ አብድ አነ በቃልየ አኮኬ በልብየ ወባሕቱ እከሥት ለክሙ ኵሎ ውስተ ኵሉ።

⁷ ወሚመ አበስኩኑ እንጋ ዘአሕመምኩ ርእስየ በኵሉ ከመ አንትሙ ትትለዐሉ እስመ በከንቱ መሀርኩክሙ ትምህርተ እግዚአብሔር።

⁸ ወባዕደሰ ቤተ ክርስቲያን ቀሠጥኩ ወነሣእኩ ለሲሳይየ ከመ እትለአክሙ።

⁹ ወአመሂ ሀለውኩ ኀቤክሙ ኢተሰቈቁ ንዋየክሙ እንዘ እጼነስ ወኀበሂ ኢያእከልኩ ሰለጡ ሊተ አኀዊነ በጺሖሙ እመቄዶንያ ወበኵሉ ተዐቀብኩ ከመ ኢያክብድ ላዕሌክሙ ወእትዐቀብሂ።

¹⁰ እስመ ጽድቁ ለክርስቶስ ይሄሉ ምስሌየ ወኢተዐጽወተኒ ዛቲ ፍሥሓየ በደወለ አካይያ።

¹¹ በእንተ ምንት እስመሁ እንጋ ኢያፈቅረክሙኑ እንከሰ እግዚአብሔር የአምር ዘንተ።

¹² ወባሕቱ ዘሂ ገበርኩ ወዘሂ እገብር ከመ እክልኦሙ ምክንያተ ለእለ ይፈቅዱ ምክንያተ ከመ ኢይርከቡ እሙንቱሂ በዘይትሜክሑ ከማነ።

¹³ እስመ ሀለዉ ሐሳውያን ገበርተ ዐመፃ እለ ይትሜየኑ ወይትሜሰሉ ሐዋርያተ ክርስቶስ።

¹⁴ ወዝኒ አኮ ለአንክሮ እስመ ለሊሁ ሰይጣን ይትሜሰል ከመ መልአከ ብርሃን።

¹⁵ ወዝኒ ኢኮነ ዐቢየ ለእመ ይትሜሰሉ መላእክቲሁኒ ከመ መላእክተ ጽድቅ ወደኃሪቶሙሰ በከመ ምግባሮሙ።

በእንተ ትምክሕት መንፈሳዊ

¹⁶ ወካዕበ እብል አልቦ ዘይሬስየኒ ከመ አብድ ወእመ አኮሰ ከመ አብድኒ ተወከፉኒ ከመ እትመካሕ አነሂ ኅዳጠ።

¹⁷ ወዝኒ አኮ ዘመንገለ እግዚአብሔር ዘእነግር ዳእሙ ከመ አብድ እዘነግዕ በእንተ ዛቲ ትምክሕትየ።

¹⁸ እስመ ብዙኃን እለ ይትሜክሑ በሕግ ዘሥጋ አነሂ እትሜካሕ።

¹⁹ እመሰ ይኤድመክሙ አጽምዖቶሙ ለአብዳን እንዘ ጠቢባን ወነባብያን አንትሙ።

²⁰ እስመ ትትዔገሥዎሙ ለእለ ይትዔገሉክሙ ወለእለሂ የሀይዱክሙ ወለእለሂ ይትቤልዑክሙ ወለእለሂ ይትዔበዩ ላዕሌክሙ ወለዘሂ ይጸፍዐክሙ ገጸክሙ።

²¹ እብል ዘንተ ከመ ዘያስተሐቅር ከመ ሕሙማኒሁ ንሕነ ለክሙ እብል አነሂ በእበድየ አልቦ ዘይትሀበል ላዕሌየ ዘእንበለ ዳእሙ ዘአነ እትኀበል ላዕሌሁ።

²² እመኒ ዕብራውያን እሙንቱ አነሂ ከማሆሙ ወእመኒ እስራኤላውያን እሙንቱ አነሂ ከማሆሙ ወእመሂ ዘርዐ አብርሃም እሙንቱ አነሂ ከማሆሙ።

²³ እመኒ ላእኩ ለክርስቶስ እሙንቱ አኮሁ እዘነግዕ ለርእስየ በጻማሂ አፈድፈድኩ ወበተቀሥፎሂ አፈድፈድኩ ወበተሞቅሖሂ አብዛኅኩ ወለሞትኒ ብዙኀ ተደለውኩ።

²⁴ ኅምሰ ቀሠፉኒ አይሁድ በበአርብዓ ዘእንበለ አሐቲ።

²⁵ ሥልሰ ዘበጡኒ በአብትር ምዕረ ወገሩኒ በአእባን ሥልሰ ሰኰየት ሐመርየ ቤትኩ ወወዐልኩ እንዘ እጸብት ውስተ ዕመቀ ባሕር።

²⁶ ወበመንገድሂ ዘልፈ እትመነደብ ወተመንደብኩ በተከዚኒ አመንደቡኒ ፈያት አመንደቡኒ አዝማድየ አመንደቡኒ አሕዛብ ተመንደብኩ በሀገር ወተመንደብኩ በሐቅል ተመንደብኩ በባሕር አመንደቡኒ ቢጽ ሐሳውያን።

²⁷ በጻማ ወበስራሕ ወበትጋህ ብዙኅ በረኀብ ወበጽምእ በጾም ብዙኅ በቍር ወበዕርቃን።

²⁸ ወዘእንበለ ዝ ብዙኅ ባዕድ ዘረከበኒ ኵሎ አሚረ እንዘ እኄሊ ቤተ ክርስቲያናት።

²⁹ መኑ ዘይደዊ ወኢየሐምም አነ ወመኑ ዘይስሕት ወኢይደነግፅ።

³⁰ ወእመሰ ይደሉ ተመክሖ አነኒ እትሜካሕ በሕማምየ።

³¹ የአምር እግዚአብሔር አቡሁ ለእግዚእነ ኢየሱስ ክርስቶስ ዘውእቱ አምላክ ቡሩክ ለዓለመ ዓለም ከመ ኢይሔሱ።

³² በሀገረ ደማስቆ መልአከ አሕዛብ ዘእምታሕተ አርስጣስዮስ ንጉሥ ዐቃቤ ሀገር ደማስቆናዊ ፈቀደ የአኀዘኒ።

³³ ወአውረዱኒ በሰብሳብ እንተ መስኮት እምአረፍት ወአምሠጥኩ እምእዴሁ።