ኀበ ሰብአ ቆሮንቶስ 2 10 - ሐዲስ ኪዳን በልሳነ ግእዝ

ምዕራፍ 10 በእንተ ንዋየ ሐቀል መንፈሳዊ

¹ አስተበቍዐክሙ አኀዊነ አነ ጳውሎስ በየውሀት ወበምሕረተ ክርስቶስ እስመ ሶበ እሄሉ ኀቤክሙ መጠነ አነ በገጽ ወበኀበሰ ኢሀሎኩ እተፊ ላዕሌክሙ ብቍዑኒ እስመ እንዘ ኢሀለውኩ እትአመን በተፋቅሮትክሙ።

² ከመ ኢይስራሕ አመ መጻእኩ ኀቤክሙ ወእትኀበል አጥብዕ እስመ ቦ እለ ይትሔዘቡነ ከመ በሕገ ሥጋ ነሐውር።

³ በሥጋነሰ ነሐውር ወአኮ በሕገ ዚኣሁ ዘነሐውር ወዘንጸብእ።

⁴ እስመ ንዋየ ሐቅሉ ለጸብእነ ኢኮነ በሕገ ሥጋ አላ በኀይለ እግዚአብሔር ውእቱ ዘይነሥት አጽዋናተ ጽኑዓነ።

⁵ ወያንኅል ኵሎ ዘይትዔበይ ወይትሌዓል ላዕለ እግዚአብሔር ከመ ይፄወው ኵሉ ልብ ወኅሊና ይግነይ ለክርስቶስ።

⁶ ወድልዋን ንሕነ ንትበቀሎ ለዘኢይገርር ወኢይሰምዕ ወአመ ፈጸምክሙ አንትሙ ትእዛዘ።

⁷ ዘመንገለ ገጽ ርእዩ ዘቅድሜክሙ ወዘሂ ተአመነ በክርስቶስ ከመዝ ለየኀሊ ለሊሁ እስመ በከመ ክርስቶስ ከማሁ ንሕነኒ።

⁸ ወእመኒ ቦ ዘተመካሕኩ ፈቂድየ በሢመትክሙ እንተ ወሀበኒ እግዚአብሔር ለተሐንጾትክሙ ወአኮ ለተነሥቶ ኢይትኀፈር።

⁹ ወባሕቱ እምህክ ዘንተ ከመ ኢይምሰሎ ለዘይትሔዘብ ከመ ዘእጌርመክሙ በመጻሕፍትየ።

¹⁰ እስመ ቦ እምሰብእ ዘይብል እስመ መጻሕፍቲሁሰ ክቡዳት ወዕፁባት ወሀልዎቱሰ በሥጋ ድኩም ውእቱ ወነገሩሂ ሕጹር።

¹¹ ወባሕቱ ዘንተ ያእምር ዘይብል ዘንተ ነገረ ከመ በቃልነ በውስተ መጻሕፍት አመ ኢሀለውነ ከማሁ በምግባሪነሂ አመ ሀለውነ።

በእንተ እለ ይንእዱ ርእሶሙ

¹² ወኢንትኀበል ናጥብዕ ነኀሊ ለርእስነ ለሊነ ከመ እለ ይንእዱ ርእሶሙ በዘአመከሩ ወዐየኑ ለሊሆሙ ወኢየአምሩ ፍካሬሁ ዘለሊሆሙ ይነብቡ።

¹³ ወንሕነሰ ኢንትሜካሕ ፈድፋደ እምዐቅምነ ዘእንበለ በመስፈርት ወሕግ ዘዐቀመ ለነ እግዚአብሔር እስከ ንበጽሕ ኀቤክሙ።

¹⁴ እስመ አኮ ዘንዌድስ ርእሰነ ከመ ዘኢበጻሕነ ኀቤክሙ ዳእሙ በጻሕነ ኀቤክሙ ውስተ ትምህርተ ክርስቶስ።

¹⁵ ወንሕነሰ ኢንትሜካሕ በዘኢይረትዕ በጻማ ነኪር ወባሕቱ እሴፎ ትብዛኅ ሃይማኖትክሙ ወትዕበይ በላዕሌክሙ ሕገ ሥርዐትክሙ።

¹⁶ ወፈድፋደ ንሜህረክሙ ወአሜሃ የዐቢ ምስሌሁ አምጣንነ ወንሕነሰ ኢንትሜካሕ በዘኢይረትዕ ወበዘኢይደሉ።

¹⁷ ወዘሰ ይትሜካሕ በእግዚአብሔር ለይትመካሕ።

¹⁸ ወአኮ ዳእሙ ዘርእሶ ንእደ ኅሩየ ይከውን አኮኑ ዘእግዚአብሔር ንእዶ ክመ።