ኀበ ሰብአ ተሰሎንቄ 1 4 - ሐዲስ ኪዳን በልሳነ ግእዝ

ምዕራፍ 4 በእንተ ምክር ሠናይ

¹ ወይእዜኒ አኀዊነ ንነግረክሙ ወናስተበቍዐክሙ በእግዚእነ ኢየሱስ ክርስቶስ ከመ ተአዘዝክሙ በኀቤነ በዘይደሉ ከመ ትሑሩ ወታሥምርዎ ለእግዚአብሔር በከመ ሖርክሙ ዓዲ ከመ ታብዝኁ ወታፈድፍዱ በዝንቱ።

² ወተአምሩ ዘከመ አዘዝናክሙ በእግዚእነ ኢየሱስ ክርስቶስ።

³ እስመ ዝ ውእቱ ትእዛዙ ለእግዚአብሔር ወፈቃዱ ተቀድሶትክሙ ውእቱ ወከመ ትትዐቀቡ ወትርኀቁ እምዝሙት።

⁴ ወያእምር ኵሉ ለለ አሐዱ ንዋዮ ወያጥርዮ በቅድሳት ወክብር።

⁵ ወኢትትመንሰዉ በፍትወት ከመ አረሚ እለ ኢየአምርዎ ለእግዚአብሔር።

⁶ ወኢትትኀበሉ ትግበሩ ዘንተ ወኢትትዐበዩ ወኢትትዐገሉ ቢጸክሙ በኵሉ እስመ መስተበቅል እግዚአብሔር በእንተ ዝንቱ ኵሉ በከመ አቅደምኩ ነጊሮተክሙ ወአስማዕኩ ለክሙ።

⁷ እስመ ኢጸውዐነ እግዚአብሔር ለርኵስ ዘእንበለ ለቅድሳት።

⁸ ወይእዜኒ ዘክሕደሰ ለያእምር ከመ አኮ ለሰብእ ዘይክሕድ ዘእንበለ ለእግዚአብሔር ዘወሀበክሙ መንፈሰ ቅዱሰ።

⁹ ወበእንተሰ አፍቅሮ ቢጽክሙ ኢትፈቅዱ ንጽሐፍ ለክሙ ለሊክሙ ምሁራን በኀበ እግዚአብሔር ከመ ትትፋቀሩ በበይናቲክሙ።

¹⁰ ወከማሁ ትግበሩ ዓዲ ምስለ ኵሎሙ አኀዊነ እለ በኵሉ መቄዶንያ ወናስተበቍዐክሙ አኀዊነ ትብዝኁ ወትፈድፍዱ።

¹¹ ከመ ትኩኑ የዋሃነ ወትትገበሩ ተግባረክሙ ወትትቀነዩ በእደዊክሙ ዘከመ አዘዝናክሙ።

¹² ከመ ትሑሩ በኂሩት በቅድመ እለ አፍኣ ወኢትጽሐቁ ወኢኀበ መኑሂ።

በእንተ ሥርዐተ ኀዘን

¹³ ወንፈቅድ ታእምሩ አኀዊነ በእንተ እለ ኖሙ ከመ ኢይደሉ ትተክዙ በላዕሌሆሙ ከመ ኵሉ ሰብእ እለ ቅቡጻን ተስፋሆሙ።

¹⁴ ወእምከመሰ ንትአመን ከመ ሞተ ክርስቶስ ወተንሥአ ከማሁ ያነሥኦሙ እግዚአብሔር ለምዉታን በኢየሱስ ወያመጽኦሙ ምስሌሁ።

¹⁵ ወዘንተ ንነግረክሙ በቃለ እግዚአብሔር ንሕነ ሕያዋን እለ ንተርፍ አመ ምጽአተ እግዚእነ ኢንበጽሖሙ ለምዉታን።

¹⁶ እስመ ይወርድ እግዚእነ እምሰማይ በትእዛዝ ወበቃለ ሊቀ መላእክት ወንፍሐተ ቀርን ዘእግዚአብሔር ወይትነሥኡ ምዉታን መቅድመ እለ ሞቱ በሃይማኖተ ክርስቶስ ።

¹⁷ ወእምዝ ንሕነ ሕያዋን እለ ንተርፍ ንትመሠጥ በደመና ምስሌሆሙ ኅቡረ ከመ ንትቀበሎ ለእግዚእነ ውስተ አየር ወንሄሉ እንከ ዘልፈ ኀበ እግዚእነ።

¹⁸ ወይእዜኒ መሀሩ ቢጸክሙ ዘንተ ነገረ።