ኀበ ሰብአ ተሰሎንቄ 1 3 - ሐዲስ ኪዳን በልሳነ ግእዝ

ምዕራፍ 3 ዘከመ ተልእከ ጢሞቴዎስ ኀበ ተሰሎንቄ

¹ ወስኢነነ ተዐግሦ አብደርነ ንንበር አቴና አሐተኔ ባሕቲተነ።

² ወፈነውናሁ ለጢሞቴዎስ እኁነ ላእከ እግዚአብሔር ወረድኤትነ በትምህርተ ክርስቶስ ከመ ያጽንዕክሙ ወያስተብቍዕክሙ በእንተ ሃይማኖትክሙ።

³ ከመ ኢታንቀልቅሉ ወኢይቅብጽ አሐዱሂ እምውስቴትክሙ በዛቲ ሕማምክሙ ተአምሩ ለሊክሙ ከመ ዝንቱ ዳእሙ ይጸንሐነ።

⁴ ወአመ ሀሎኩ ኀቤክሙ ዘንተ ክመ አቅደምኩ ወነገርኩክሙ ከመ ሀለወነ ንሕምም ወይሣቅዩነ ወበከመ አመርናክሙ ኮነ ውእቱ።

⁵ ወበእንተዝ አነሂ ስኢንየ ተዐግሦ ፈነውኩ ጢሞቴዎስሃ ከመ አእምር ሃይማኖተክሙ እመቦ ከመ አመከረክሙ ዘያሜክር ወለከንቱ ይከውን ጻማነ ዘበእንቲኣክሙ።

⁶ ወይእዜሰ እምአመ በጽሐ ጢሞቴዎስ ኀቤነ እምኀቤክሙ ወዜነወነ ሃይማኖተክሙ ወተፋቅሮተክሙ ወከመሂ ትዜከሩነ በሠናይ ዘልፈ ወትፈትዉ ትርአዩነ በከመ ንፈቱ ንሕነሂ ርእዮተክሙ።

⁷ በእንተዝ ተፈሣሕነ አኀዊነ በእንተ ኵሉ ሕማምነ ወምንዳቤነ ዘበእንተ ሃይማኖትክሙ።

⁸ እስመ ይእዜ ነሐዩ እምከመ አንትሙ ቆምክሙ በእግዚእነ።

⁹ አየ አኰቴተ ንክል ዐስዮቶ ለእግዚአብሔር ህየንተ ኵሉ ፍሥሓነ ዘተፈሣሕነ በእንቲኣክሙ ዘእንበለ ከመ ንጸሊ ኀበ አምላክነ መዐልተ ወሌሊተ።

¹⁰ ወፈድፋደሰ ንጼሊ ከመ ንርአይ ገጸክሙ ወይትፈጸም ሕጸጸ ሃይማኖትክሙ።

¹¹ ወእግዚአብሔር አቡነ ወእግዚእነ ኢየሱስ ክርስቶስ ያርትዕ ፍኖተነ ኀቤክሙ።

¹² ወለክሙሂ ያብዝኅ እግዚእነ ወያፈደፍድ ተፋቅሮተክሙ በበይናቲክሙ ወምስለ ኵሉ ለለ አሐዱ አሐዱ በከመ ንሕነ ናፈቅረክሙ ለክሙ።

¹³ ወይጽናዕ ልብክሙ በንጽሕ ወበቅድሳት ለቅድመ እግዚአብሔር አቡነ አመ ምጽአተ እግዚእነ ኢየሱስ ክርስቶስ ምስለ ኵሎሙ ቅዱሳን።