ኀበ ሰብአ ቆሮንቶስ 1 16 - ሐዲስ ኪዳን በልሳነ ግእዝ

ምዕራፍ 16 በእንተ አስተዋፅኦ ለቅዱሳን

¹ ወበእንተ አስተጋብኦሰ ለቅዱሳን በከመ ሠራዕክዎሙ ለቤተ ክርስቲያን ዘገላትያ ከማሁ አንትሙሂ ግበሩ።

² በበእሑድ ኵሉ ብእሲ እምኔክሙ ይዝግብ ሎቱ ዘተሰርሐ ወዘረከበ በቤቱ ለይዕቀብ ከመ ኢይኩን ቅሥት አመ መጻእኩ።

³ ወአመ በጻሕኩ እፌኑ ዘኀረይክሙ ቦቱ ምስለ መልእክትየ ከመ ይትረከብ ሀብትክሙ በኢየሩሳሌም።

⁴ ወእመሰ ደለወኒ እሑር ለልየ አሐውር ወየሐውሩ ምስሌየ።

⁵ ወእመጽእ ኀቤክሙ በጺሕየ መቄዶንያ።

⁶ ወእምመቄዶንያ ኀሊፍየ እነብር ኀቤክሙ እለ ኮና መዋዕለ ለእመኒ እንጋ እከርም ኀቤክሙ ከመ አንትሙኒ ትፈንዉኒ ኀበ ሖርኩ።

⁷ ወኢይፈቅድ ይእዜ ኅሉፈ እርአይክሙ ወባሕቱ እትአመን ከመ እነብር ኀቤክሙ ዘኮነ መዋዕለ ለእመ ፈቀደ እግዚአብሔር።

⁸ ወእነብር ኤፌሶን እስከ ጰንጠቆስጤ።

⁹ እስመ ርኅው ሊተ ዐቢይ አንቀጽ ወግብር ምሉእ ወባሕቱ ብዙኃን መከልኣን።

¹⁰ ወአመ መጽአ ጢሞቴዎስ ዑቅዎ ከመ ኢይፍራህ በኀቤክሙ እስመ ግብረ እግዚአብሔር ይገብር ከማየ።

¹¹ ወአልቦ ዘይሜንኖ ወፈንውዎ በሰላም ይምጻእ ኀቤየ እስመ እጸንሖ ምስለ አኀዊነ።

¹² ወበእንተሰ እኁነ አጵሎስ ብዙኀ አስተብቋዕክዎ ይምጻእ ኀቤክሙ ምስለ አኀው ወዮጊ ኢፈቀደ ሎቱ እግዚአብሔር ይምጻእ ኀቤክሙ ይእዜ ወይመጽእ ባሕቱ አመ ተክህሎ።

¹³ ትግሁ ወቁሙ በሃይማኖት ተዐገሡ ወአጥብዑ።

¹⁴ ወኵሎ በተፋቅሮ ግበሩ።

¹⁵ አስተበቍዐክሙ አኀዊነ ታእምሩ ቤተ እስጢፋኖስ ወፈርዶናጥስ ወአካይቆስ ከመ እሙንቱ ቀዳምያኒሃ ለአካይያ ወለመልእክተ ቅዱሳን አዘዝክዎሙ።

¹⁶ ከመ አንትሙኒ ትትአዘዙ ለዘከመ እሉ ወለኵሉ ዘየኀብር ግብረ ወይጻሙ ምስሌነ።

¹⁷ ወእትፌሣሕ በምጽአቶሙ ለእስጢፋኖስ ወፈርዶናጥስ ወአካይቆስ እስመ ዘአንትሙ አሕጸጽክሙ እሙንቱ ፈጸሙ ወአስተፍሥሕዋ ለነፍስየ ወለነፍስክሙ።

¹⁸ ወአእምርዎሙ ለእለ ከመዝ።

¹⁹ አምኁክሙ ቤተ ክርስቲያናት ዘእስያ አምኁክሙ በእግዚእነ ፈድፋደ አቂላ ወጵርስቅላ ወእለሂ ምስሌሆሙ እለ ውስተ ቤቶሙ።

²⁰ ወአምኁክሙ አኀዊነ ኵሎሙ ተአምኁ በበይናቲክሙ በአምኃ ቅድሳት።

²¹ አማኅኩክሙ ጽሒፍየ ዘንተ በእደ ዚኣየ አነ ጳውሎስ።

²² ወዘሰ ኢያፈቅሮ ለእግዚእነ ውጉዘ ለይኩን እምተስፋ እግዚአብሔር እስከ ምጽአቱ ለእግዚእነ።

²³ ጸጋሁ ለእግዚእነ ኢየሱስ ክርስቶስ ምስሌክሙ።

²⁴ ወፍቅረ ዚኣየ ምስለ ኵልክሙ በክርስቶስ ኢየሱስ፤ አሜን። ተፈጽመት መልእክት ቀዳማዊት ኀበ ሰብአ ቆርንቶስ ዘተጽሕፈት በኤፌሶን ወተፈነወት ምስለ ጢሞቴዎስ ወእስጢፋኖስ ወፈርዶናጥስ ወአካይቆስ። ወስብሐት ለእግዚአብሔር ለዓለመ ዓለም፤ አሜን።