Markus 16 - Alkawal Kesal

Ummitaaki Yeesu nder maayde

¹ Nde *nyannde-fooftiinde ƴaɓɓii, Maryaama mo Magadaaliya e Saloomi e Maryaama inna Yaakuubu coodi nebbam mbelɗam luuɓngol, gam ɓe njaha ɓe molmana ɓanndu Yeesu.

² Nyannde alat ɓe ummii ila fajiri, ɓe njottii yenaande ndeen puɗoyki naange.

³ Dow laawol ɓe mbaɗi ga vi'igo hakkunde maɓɓe : — Moye tallitanta en kaaƴa nga ɗum omndiri honnduko yenaande ndeen ?

⁴ Ammaa nde ɓe ɓanti gite, ɓe ngi'i kaaƴa ngaan tallitaama.

⁵ Nde ɓe natti yenaande ndeen, ɓe ngi'i goɗɗo kayeejo e jooɗii vuttudu nyaamru, emo ɓornii kolte daneeje tar, ɓe kultori.

⁶ Kayeejo oon vi'i ɓe : — To' on kul ! Eɗon ndaara Yeesu mo Najaratu baraaɗo dow *gaafagal. O ummitinaama nder maayde ! O walaa ɗo'o. Raa to o wallinano.

⁷ Jo'oni, njahee mbi'on *almaajiri'en ma'ako e Biiturus, o aartey on yahago lesdi Gaaliili. Toon ngi'oton mo, noon no o vi'inoo on.

⁸ Rewɓe ɓeen mburtii yenaande, ɓe nyaari, eɓe ndiwna sabu kulol. Kulol haɗi ɓe vi'igo ka koo moye. [

Yeesu vannganii Maryaama mo Magadaaliya

⁹ Nyannde alat fajiri, Yeesu ummitii nder maayde. Ɓaawo o ummitake o aartii vanngango Maryaama mo Magadaaliya, mo o vurtinannoo *ginnaaji joveeɗiɗi.

¹⁰ Maryaama oon yahi vi'i ka wondunooɓe e Yeesu. Wakkaci ɗuum eɓe nder ɓillaare, eɓe mboya.

¹¹ Nde ɓe nani Yeesu e foofa, Maryaama boo yi'ii mo, ɓe njaɓaay ka.

Yeesu vannganii goonɗinɓe ɗiɗo

¹² Ɓaawo ma'ajum, woɓɓe goonɗinɓe mo ɗiɗo e dow laawol nder ladde yahago goɗngel ci'el, sey Yeesu vanngani ɓe nder nanndi feere.

¹³ Ɓe co''ii ɓe mbi'i ka horiiɓe, ammaa ɓe njaɓaay ka ɓe'e maa mbi'i.

Kuugal ngal Yeesu hokki almaajiri'en muuɗum

¹⁴ Ɓaawo ma'ajum, Yeesu vanngani almaajiri'en muuɗum sappo e go'o, wakkaci ɓe nyaamata. O feli ɓe, sabu ciya goonɗinki maɓɓe e ca'atal ɓerɗe maɓɓe, gam ɓe njaɓaay ko yiiɓe mo ngeccii ɓe ɓaawo o ummitake.

¹⁵ O vi'i ɓe : — Njahee koo toye nder duuniyaaru, nga'ajinon koo moye *Habaru Belɗum.

¹⁶ Goonɗinɗo yam waɗanaa *baptisma no hisey, ammaa mo goonɗinaay yam no sernante.

¹⁷ Goonɗinɓe yam fuu no mbaɗey ɗi'i alaamaaji kaayniiɗi : ɓe mburtiney *ginnaaji e innde am, ɓe mbolvey ɗemle kese,

¹⁸ ɓe nanngey bo'ole e juuɗe maɓɓe, to ɓe njarii tooke, ɗe mbaɗantaa ɓe koo ɗume, ɓe njowaney nyawɓe juuɗe njamɗita.

Yeesu hooyraama dow

¹⁹ Ɓaawo Yeesu Jawmiraawo volvanii ɓe, o ƴeftiraama dow, o jooɗii e junngo Allah nyaamo.

²⁰ Sey *almaajiri'en ma'ako ndilli, nga'ajinoyi *Habaru Belɗum koo toye. Jawmiraawo boo valli ɓe, hokki ɓe baawɗe waɗgo kuuɗe kaayniiɗe, gam tabbitingo ko ɓe mbi'ata, to ma'ako ɗum ivoyi.]