MIKEAS 4 - Elizen Arteko Biblia (Biblia en Euskara Traducción Interconfesional)

Jerusalem bakearen hiriburu

¹ Azken egunetan, Jaunaren etxea dagoeneko mendia, beste mendien gain ezarriko du Jaunak, mendixka guztien gainetik jasoko. Eta hara joko dute herriek.

² Nazio asko joango dira hara, esanez: «Zatozte, igo gaitezen Jaunaren mendira, Jakoben Jainkoaren etxera; bere bideak erakutsiko dizkigu, eta gu haren bidexketan ibiliko gara; Siondik irakatsiko baitu Jaunak, Jerusalemdik hitz egingo».

³ Hark herri asko epaituko ditu, nazio indartsuen auziak erabakiko, baita urrutikoenenak ere. Ezpatak golde bihurtuko dituzte eta lantzak igitai. Ez da naziorik nazioren kontra altxatuko, ez dira gehiago gudurako prestatuko.

⁴ Nor bere mahats-parrapean eseriko da, bere pikondopean, inoren beldurrik gabe. Honela agindu du Jaun ahalguztidunak.

⁵ Beste herri guztiak nor bere jainkoaren esanera dabiltza; gu, ordea, Jaunaren, geure Jainkoaren, esanera ibiliko gara menderen mendetan.

Artalde sakabanatua Sionen bilduko

⁶ Honela dio Jaunak: «Egun hartan, ardi herrenak bilduko ditut, nik gogor erabili eta sakabanatuak batuko.

⁷ Herren eta sakabanatu hauekin, bizirik geldituekin, herri indartsua egingo dut. Eta ni, Jauna, errege izango naute Sion mendian, orain eta beti.

⁸ Eta zuri, artzain-dorre, Sion hiriko gotorleku horri, berriro itzuliko zaizu antzinako agintea, zuri, Jerusalem hiriburu, lehen zenuen erregetza».

Jerusalemen sufrimendua eta askapena

⁹ Baina orain, zer duzu horrela oihu egiteko, erdiminetan dagoena bezala egoteko? Erregerik gabe zaude, ezta? Kontseilaria hil zaizu.

¹⁰ Bihurritu zaitez, bai, egin aiene, Siongo herri, emakumeak erdiminetan bezala; orain hiritik aterako baitzarete eta landan biziko. Babiloniara joango zarete, baina han salbatuko zaituzte Jaunak, zeuen etsaien eskuetatik askatuko.

¹¹ Orain, nazio asko bildu dira zure aurka; hau diote: «Profanatua izan bedi; poz bitez gure begiak, Sion horrela ikusiz».

¹² Baina ez dituzte Jaunaren asmoak ezagutzen, ezta ulertzen ere haren burubideak; izan ere, larrainean gari-balak bezala bildu ditu Jaunak nazioak,

¹³ eta Siongo herriari esaten dio: «Ea, jo alea. Burdinazko adardun eta brontzezko azkazaldun idia bezain indartsu egingo zaitut. Herri asko birrinduko dituzu, eta haiei harrapatutako ondasunak Jaunarentzat, lur osoaren Jabearentzat, sagaratuko dituzu».

¹⁴ Baina orain, prestatu borrokarako, hiriko gudari-talde hori. Etsaiek setiatu gaituzte. Makilaz masailean jotzen dute Israelgo agintaria.