Eleetalayi yan Fool akiicumuu Tit 2 - Jola-Kasa

Baliikenelabu bacolumuu

¹ Bale awu ulob wahawu wanaboomuu li baliikenelabu bajakaabu.

² Ulob kánayinaabuku kahallenumuu ooniil kootut kuwuuhen li wahoowah. Koote kulako bukan kasuuneniye, bukan kabaje uyinum, kalite li káyinenaku, li húbooliyahu ban li kuhanken to jaj.

³ Ulob kanaalaabuku foof kahallenumuu ooniil, baloŋelabu booliil boote bulako baloŋe bata bukan kasenoolowe boot li Ateemit. Jakum kunaak kúloboo bukan, jakum kunaak kúkaliyenoo. Kunaak kuliiken bukan wah wajake.

⁴ Kuliiken kama kanaalaabuku kañiilomuu hufañ kúyiniil li bañooliil.

⁵ Kusaabiil min kubaj uyinum, min foof kulako kanaale káteyiliit kunab li kánayine, kulako kanaale kayilo kaaken siluufiil jak, ban li kulako bukan kajake, kútuule kúyiniil, jakum bil an alob kulim kajakut aya li hulimahu hata Ateemit.

⁶ Uwankulen foof báfulabu min kubaj uyinum.

⁷ Awu humumi ulako li wahoowah feh bukittenoolum bata buloŋ bajake. Baliikenelabu booli bujow bulako baliikene bata mal̥egen ban li bucol macol.

⁸ Kulimaku kuya koote kulako kulim kacole kan an ayilaat áhoogul, bájum kulatoolayi jakum kulob kulim kajakut kuya li alolaal, min kubaj ñisuu.

⁹ Bukanabuku kammuu emiikeel koote kútuul li wahoowah feh kunahaanaku kakiliilumuu. Koote kuŋes min kukaaniil súumiil, ban jakum kunaak kuceeŋiil.

¹⁰ Jakum foof kúkuwetiil wahoowah. Kunaak kúhiis nanoonan kaanaku buko bukan kajake ban li kul̥egen, mantee li kúbinken li wahoowah feh, baliikenelabu bata Ateemit ammuu Afakenaawu oololaal.

¹¹ Mata Ateemit láhihhiis kájiyaku koola bájum bukanabuku feh li kúfakum li ko.

¹² Ateemit li kájiyaku unku laliikenumolaalumuu etey bakaanelabu bajakutumuu li kásiibowaku kata adunaayi inye, min uloŋaal li adunaayi inye buloŋ bata bukan kabaje uyinum ban li kucol, buloŋ bata kátuul Ateemit.

¹³ Muñowu lóotumaalumuu ukobaal hunakahu hásuumaahu han úkangumaamuu li ho. Hunakahu nan máyiineniyamu mata Ateemitawu oololaal áamakawu ammuu Yéesu Kilisita Afakenaawu oololaal, mommuu li múlaŋul.

¹⁴ Lasensen buloŋabu boola humum bo boot li alolaal, boot kafakenolaal li majakut manooman min akaanolaal bukan kanabe káami koola balewool, kahankene li kakaan majake.

¹⁵ Ujówum li huhaanaahu huya min ulob wahawu unwu, boot kawankulen mantee foof kawataten bukan, ban jakum ukat an min abesi.