Maak 6 - Jola-Kasa

Bukanabuku kata Nasalet kúyinenut li Yéesu

¹ Muñeˈe Yéesu li áfulum tó ajow boot li ésukayi yoola. Kúgoomaku koola li kunab li akila.

² Nan húyiiyaayahu hata Kusuwifaku húliiŋumuu, Yéesu li alako kaliiken bukanabuku Hulimahu li eluufayi yata kal̥awaku. Bukanabuku kalakowoolumuu bajantenabu kumemmeeŋ. Li kusego ŋáa’ min kunaak kugel̥l̥enoo koon: — Kama bay ánayinaawu ummu áhaasumulo wahawu unwu feh? Bay lábajumulo bújallowabu umbu? Buu kaane li ayili akaan wahawu unwu wájaahaleni muñowu?

³ Kama kele inti akila ammuu adaajaawu ata siluufasu, añiilawu ata Mali? Ban kama inti Saak, li Sóose, li Súd, li Simoŋ, kommuu kutuyool? Kama inti kúliinool kumbuku taate li ololaal? Muñeˈe wahawu unwu li úhiliil kúyinenum li Yéesu.

⁴ Bale Yéesu li aaniil: — Afulofet, áluukeneliiti li etaamayi ban abukimuu li bata bukanool, áluukeneliiti foof li butoŋool.

⁵ Muñeˈe mó lí múji Yéesu ayilaat akaan li ésukool wah wájaahaleniye, búti li kuŋenool bale kan aŋalumuu awalen li kukee kásomute min afakeniil.

⁶ Yéesu li asego mata buu kúyinenutumuu li akila. Fúlum tó, Yéesu li añaahoo li básukabu feh bakoojumuu, min aliiken bo bukanabuku Hulimahu hata Ateemit.

Yéesu li aboñ kufootalaku kuŋen li kúl̥uba, kúl̥ubal̥uba

⁷ Li ahooñ kúgoomaku kuŋen li kúl̥ubaaku min aseniil kayile kata kakesoo uyinumawu wajakutumuu úfu’ li bukanabuku, ban li aaniil kujow kúl̥ubal̥uba ban aboñiilumuu.

⁸ Bale Yéesu li aaniil: — Jakum jiŋa’ wah jíjowetum bata kañaahoolaku kooluul, búti hunuk. Jakum jiŋa’ humbuulu, mantee kaboote, mantee foof sídalam jikaan li ul̥aacawu wooluul.

⁹ Jikaano sidalla bale, ban jakum an aŋa’ újufo úl̥uba.

¹⁰ Yéesu li afamen aaniil: — Tanootan tan jommuu jijow jíliiŋ li kuyabuul li eluuf, li jilako ló boot yok nan jommuu li jífu’ tinatu untu.

¹¹ Li bil nokoo loon tin jijeˈe jíliiŋ, bukanabuku kata to li kuhoy kuyabuul, mantee foof li kuhoy kujantenuul, jilakomuu li jífu’ to li jihank kafolaku kata kootaku kooluul: fan lako búhiisenum boot li buko.

¹² Mal̥egen kufootalaku li kujow kuwaale bukanabuku kaanaku koote kubet búsol buloŋelabu booliil buhaanabu min kuŋa’ buloŋ buwunkul.

¹³ Li kukesoo uyinum wajakut wameeŋe úfu’ li bukanabuku kan újufomuu, ban li kuŋa’ éduulij min kúsiiw bukan kameeŋe kásomute min kufakeniil.

Eketayi yata Saŋ Batiis

¹⁴ Muñeˈe áyiiyawu Elod li ajam li kulob mata Yéesu, mata kajawaku koola kujamojamo tanootan. Kukee kunaanaak koon: — Laalu Saŋ Batiis ayitowumulo li kaketumuu. Wahawu unwu újimuu li abaj sembe sata kakaan wah wájaahaleniye.

¹⁵ Bale kaabuku li koon: — Laalu Elí alako nomuu afulofet. Kukee foof li koon: — Laalu afulofet, loon akee li kufulofetaku kata naanaŋ.

¹⁶ Bale nan Elod ajamumuu loon muñaˈa, li aan: — Laalu Saŋ Batiis humumool! Injé humumom ilobe min kufalenool húkow, bale kama layitowuloyitowul li eketayi!

¹⁷ Elod humumool labomboñ kujow kújokul Saŋ Batiis, ban li kujenkool kujow kukul̥, mata Elodiyaas áji, an Elod aŋalumuu akaan aseekool, ban anaale ata atuyool Fílib.

¹⁸ Li mal̥egenamu, Saŋ Batiis lansaan Elod: — Colut min uyab anaalaawu ata atuyi Fílib.

¹⁹ Muñeˈe Elodiyaas li al̥eet Saŋ ŋáa’ yok afañ min amukool, bale ayilaat.

²⁰ Li mal̥egenamu, Elod lákolikoli Saŋ, ban lahaase aan Saŋ lakankaan an acole ban li anab. Okila humumool anaake afooy Saŋ. Nanoonan nan Elod ajantene kulimaku kata Saŋ Batiis, buyinumool li búguul̥oo. Bale li anaak ajantenool li ésuumansuum ló.

²¹ Muñeˈe Elodiyaas li abaj bútin bajake li hunakahu hawayil̥enumuu nan Elod abukimuu. Elod li akaan húbaññaati li hunakahu unhu min áhooñul bukanabuku káamakaku kata jáyiiyaju joola, li kunahaanaku kata kusollaaliyaku koola, li kunahaanaku kata etaamayi yata Gálile.

²² Asúngutaawu ata Elodiyaas li anoken dán kulakomuu áliiŋ, li alako jígom. Li súum Elod li bukanabuku foof kan áhooñulumuu boot húbaññaatiyahu. Muñeˈe áyiiyawu Elod li aan ásungutaawu: — Ul̥awom wah wan ufañe, fan iseni wo.

²³ Elod li anuu asen ásungutaawu aanool: — Fan iseni wahoowah wan ommuu ul̥awom, maayeet min kite lako ifalen li tut jáyiiyaju júmbaam, min iseni bugeb baabu.

²⁴ Muñeˈe ásungutaawu li áfulul ajow agel̥l̥en jaawool aanool: — Waa leete fíle il̥aw? Jaawool li aanool: — Ul̥aw húkowahu hata Saŋ Batiis.

²⁵ Asúngutaawu li ayaan asommen alaañ boot bata áyiiyawu áliiŋ, li aanool: — Lifañe min uyaan usenom muñeˈe li buyinjaay, húkowahu hata Saŋ Batiis.

²⁶ Nan ásungutaawu alobumuu áyiiyawu Elod loon muñaˈa, li jokool ŋáa’. Bale ayilaat ahoy humum hata hunuulahu han anuulumuu, li bukanabuku kan áhooñulumuu.

²⁷ Mal̥egen Elod li ayaan aboñ asollaali akee ajow áŋalul húkowahu hata Saŋ Batiis.

²⁸ Asollaaliyawu li ajow áliiŋ li hukul̥ahu, li áfalenul ló húkowahu hata Saŋ Batiis. Nan afalenumuu húkowahu aban, li áŋalul hó li buyinjaay ajow asen ásungutaawu, min ásungutaawu ahin aŋa’ ho ajow asen jaawool.

²⁹ Nan kúgoomaku kata Saŋ kujamumuu loon muñaˈa, li kujow kuŋa’ ehuluŋayi yoola kujow kuhok.

Yéesu li ákuumen bukan koono sínjunne hutok

³⁰ Muñeˈe kufootalaku li kubil kuwoog tan Yéesu alakomuu, min kulobool wahawu feh wan kukaanumuu, li wan kuliikenumuu feh bukanabuku.

³¹ Emmuu bukan kameeŋe kunaanaak kújowum tó li kulaañ, min jíyiil kubajowut min kutiñ, muñeˈe Yéesu li aaniil: — Bukuluul jibil ujowaal boot ban wayitowe min jiyool̥o bo jatit.

³² Mal̥egen li kújufo li busaana buko baleyiil min kujow boot ban wayitowe.

³³ Bale bukan kameeŋe li kujukiil buko li ejowayi, li kuhaasiil. Muñeˈe bukanabuku li kúteyimul li koot li sísukasu feh, kujow kukobiil ban kulakomuu ejowayi.

³⁴ Nan Yéesu áwalowulomuu li busaanaabu, li ajuk búsuk báamak, li áyiyen, mata bukanabuku kunokoonokoo loon kúgalalaan kabajut amata. Muñeˈe li aliiken bukanabuku wah wameeŋe.

³⁵ Emmuu banakabu bo bajone, kúgoomaku li kujow kutook Yéesu min koonool: — Baabe wayitowayito, ban banakabu bujone.

³⁶ Ulob búsukabu min bujow boot li ul̥ibawu li sísukasu sakoojumuu, mantee li kunoom bo wah kutiñ.

³⁷ Bale Yéesu li aaniil: — Jiseniil bukuluul humumuul kutiñ. Kúgoomaku li koonool: — Waa, áloli joote fíle jijow jínoomul kúmbuulu butum sihanjal sata sídalam síteemeel síl̥uba, jibil jiseniil kutiñ?

³⁸ Yéesu li aaniil: — Kama kúmbuulu koono keem jooke? Jijow jiyoob. Mal̥egen kúgoomaku li kúgel̥l̥enul ban, li koon Yéesu: — Jibaje kúmbuulu hutok li muwol múl̥uba.

³⁹ Muñeˈe Yéesu li alob kúgoomaku min kukaan bukanabuku feh kubah kukaan kúmim li mahosamu masayutumuu.

⁴⁰ Mal̥egen bukanabuku li kubah kukaan kúmim kata bukan éteemeel, kaaku bukan kúyii kúl̥uba li kuŋen.

⁴¹ Nan bukanabuku kubahumuu feh kuban, Yéesu li aŋa’ kúmbuuluwaku hutokayi li muwolamu múl̥ubaamu. Li ateb kúkilool ajooŋoo haatiya emitayi, min asal Ateemit aban, li amuncul kúmbuuluwaku asen kúgoomaku, min kuŋa’ ko kugaben búsukabu. Yéesu li amuncul foof muwolamu múl̥ubaamu agaben bukanabuku feh.

⁴² Bukanabuku feh li kutokoñ kujow kufooñ.

⁴³ Muñeˈe kúgoomaku li kuwomen kumunculaku kasaŋomuu kata kúmbuuluwaku, li kata muwolamu, kujow kuyok kumeeŋen utekel woono kuŋen li úl̥uba.

⁴⁴ Kánayinaabuku katokoñumuu kúmbuuluwaku li siwolasu koono sínjunne hutok.

Yéesu li ájowum koot li mal

⁴⁵ Nan yaane fúlum tomuu, Yéesu li atuuŋ kúgoomaku koola kuŋito li busaana, min kujow ló boot kageb kaaka húwajahu, li halaabahu hata ésukayi yata Betisayida, min akila alob búsukabu min buyiisoo.

⁴⁶ Nan Yéesu alobumuu búsukabu min buyiisoo aban, li aŋito li huyuuyahu ajow ló kal̥aw.

⁴⁷ Muñeˈe nan banakabu bujonumuu, busaanaabu bo báliiŋe li tut húwajahu, Yéesu okila baloŋe li masaye balewool.

⁴⁸ Muñeˈe Yéesu li ajuk kaanaku kúgoomaku koola kumbuku min kuweenemuu busaanaabu li sílaam ló, mata kulallaaj élusayi. Nan hukahu huyiilimuu, Yéesu li ájowum koot li malamu ajowubeniil áliiŋ, li afañeen ajow alul̥iil.

⁴⁹ Nan kúgoomaku kujukoolumuu li ájowum koot li malamu, li kuyinoo li koon laalu áfulafu’, li kúluulen butiya,

⁵⁰ mata buko feh kúkolikoli nan kujukoolumuu. Bale Yéesu li ayaan aaniil: — Sákoluul! Laalu ínje. Jijok saaluul!

⁵¹ Muñeˈe Yéesu li aŋito atook kúgoomaku li busaanaabu, búlusabu li buyaan buweelen. Kúgoomaku li kusego ŋáa’,

⁵² mata li mal̥egenamu kuliitikenut waa bújaahalenumabu ban Yéesu akaanumuu, bata kúmbuuluwaku bulobe, mata kul̥al̥l̥aal̥ uyinum.

Yéesu li afaken kásomutumuu li etaamayi yata Genesalet

⁵³ Nan kulimbumuu húwajahu, li kúliiŋ li etaamayi yata Genesalet, min kuya bo busaanaabu.

⁵⁴ Muñeˈe nan Yéesu li kúgoomaku kúwalowulumuu li busaanaabu, bukanabuku li kuyaan kuhaas Yéesu.

⁵⁵ Muñeˈe bukanabuku li kujow li halaabahu unhu feh kujow kútebul kásomutumuu li ukal̥, kújowetum boot tanootan tan kujame koon Yéesu ummu to.

⁵⁶ Tanootan tan Yéesu anokene, lako li básukabu batitabu, mantee li sísukasu sáamakasu, mantee foof li sitoolasu, bukanabuku li kuŋa’ kásomutumuu kukaan li waayeenawu min kuyaakoolool mantee li akatiil min kugo’ kabeyaku bale kata kañaku koola. Mal̥egen kago’ komuu feh li kufak.