Maak 4 - Jola-Kasa

Bukittenoolum bata an áami li ebet sígul

¹ Muñeˈe Yéesu li amit alako kaliiken bukanabuku Hulimahu hata Ateemit, bata katantaku kata húwajahu hata Gálile. Búsuk báamak li bubil búguutool, gay li ájufo li busaana balakowe li húwajahu min abah ló. Búsukabu feh li bulako li masaye li katantaku kata húwajahu.

² Yéesu li anaak aŋa’ bukittenoolum min aliikeniil wah fiyo. Li anaak alobiil li baliikenelabu boola aaniil:

³ — Jijanten! Bile baj awaña áfule ajow ebet sígul.

⁴ Nan alakomuu ebetayi, búgin bakee bata sígulasu li bulo li bútinabu. Basuuwabu li bubil butiñ so.

⁵ Búgin baabu li bulo li etaam yata bagisa, tan tiŋowe. Sígulasu li siyaan sil̥iilul, mata mul̥uyisamu mata etaamayi mumeeŋut to.

⁶ Bale nan banakabu bulumulumuu, sígulasu li sísulo min sisay, mata siyawut kuhaa’ káloyiye.

⁷ Búgin bakee li bulo li banuunuken bata úbuja. Nan banuunukenabu bata úbujaawu bul̥iilulumuu, li búgoben sígulasu sal̥iilumuu min búhi’ só sibukum.

⁸ Búgin baabu bata sígulasu li bulo li etaam yakonete. Sígulasu li sil̥iil ban li sank min sibuk ŋáa’, min kabas kano kubaj ukake’ woono áyii li kuŋen, kakee li kubaj woono kúyii kúhaaji, kufaal ko li kubaj woono téemeel.

⁹ Ban Yéesu li aan: — An áakimuu sijan boot bajam, li ajanten jak min ajam.

Wahawu wájimuu Yéesu li aŋa’ bukittenoolum min naak alob

¹⁰ Muñeˈe nan Yéesu ajowe áloyimuu búsukabu, bukanabuku kanaake kunabumuu li akila li kúgoomaku.

¹¹ Yéesu li aaniil: — Bukuluul, Ateemit lakaanuukaan min jihaas wahawu wahaasutimuu wata Jáyiiyaju joola. Bale bukan kaabuku buko fan kújamum wahawu feh li bukittenoolum,

¹² bájum: «Li kunaak kujuke, bale let kujuk. Li kujam jak, bale let kúnaanum maayeet tuf. jakum bil kúlaañul bata Ateemit, min Ateemit abonketiil.»

Yéesu li akitten bukittenoolumabu bata abetaawu ata sígulasu

¹³ Muñeˈe Yéesu li amit aaniil: — Kama bukuluul jínaanumut min bukittenoolumabu umbu bulobe? Kama muñowu buu joote jiyili jínaanum min ukittenoolum waawu feh ulobe?

¹⁴ Abetaawu ata sígulasu, okila hulimahu hata Ateemit lal̥uke.

¹⁵ Bukan kukee kunokoonokoo li kagenden kata bútin tan hulimahu hulomuu. Nan kommuu kuyaan kujam hulimahu, Sayitaane li ayaan abil aluuc ho li uyinumiil dán hul̥ukimuu áfulen li buko.

¹⁶ Li manolamu, bukanabuku kanokoomuu li etaam yata bagisa, buko kommuu bukanabuku kajamemuu Hulimahu Hásuumaahu, li kuyaan kuyab ho li ésuumansuum ló.

¹⁷ Bale emmuu kukatut Hulimahu min huya kuhaa’ kalite li buko, li kúyinen li ho jatit bale. Muñeˈe nan sílaamasu síliiŋulumuu li jálaatenaju mata Hulimahu húji, li kuyaan kukat káyinenaku kooliil.

¹⁸ Etaamayi yata banuunukenabu bata úbujaawu tan Hulimahu huwaaleyimuu, yo yommuu bukanabuku kajamumuu Hulimahu hata Ateemit.

¹⁹ Bale uyinoolawu wata buloŋabu bata muñeˈe, lí kásiibo kata ebaj, li kamelo kata wah wameeŋe; wahawu unwu feh li unokeniil min úgoben hulimahu min húhiliil kukaan majake.

²⁰ Etaamayi yakonetumuu dán sígulasu silomuu, yo yommuu bukanabuku kajamumuu Hulimahu hata Ateemit ban li kuyab ho. Bukanabuku umbuku li kubaj buloŋ bajake banokoole li kamaano kan kabas kano kubaje ukake’ woono áyii li kuŋen, kakee li kubaj kúyii kúhaaji, kaaku li kubaj woono téemeel.

Bukittenoolum bata ehiitum

²¹ Yéesu li alaañen aaniil: — Mantee an fan ayaben ehiitum aban li aŋa’ yo akaan li éking, mantee foof li aŋa’ yo akaan kata láala elal? Inti fan aŋa’ yo akaan li yiil?

²² Bajut wah wayoli, waatut ubil ujuki. Bajut foof wah wayolooli, waatut ubil uhaasi.

²³ An áakimuu sijan, li ajanten min ajam.

²⁴ Yéesu li afamen aaniil: — Jíkaanum wahawu wan jijamemuu! Kaliikumaku kan bukuluul humumuul jiŋalemuu min jiliik bukanabuku, ko foof Ateemit ammuu li abil aŋa’ min aliikuul, ban fan aliikuul haŋ to!

²⁵ Mata an abajumuu wah, Ateemit fan afamenool. Bale an abajutumuu wahoowah, maayeet jatitaju jan abajumuu, Ateemit fan ayab jo.

Bukittenoolumabu bata sígulasu sil̥iiloolo bomuu

²⁶ Yéesu li afamen aaniil: — Jáyiiyaju jata Ateemit jinokoonokoo loon an ajeˈe ebet sígul li bul̥ibool.

²⁷ Anawu abetumuu sígulasu, maayeet min ámooliye mantee foof li ámooliyaati, li huk mantee foof tihunak, sígulasu so li sil̥iil min sank okila bahaasut buu jówoolume.

²⁸ Etaamayi humum yo fan ejand el̥iilul mahos, ban mahosamu li múyawul kubas, min kit kubasaku kubaj bakake’ bafiibene.

²⁹ Muñeˈe nan ubasawu wommuu li waal, li kucac emaanaayi mata no unnu kúwaagenaku báliiŋe.

Yéesu li aŋa’ ekool yata bunuunuken ban koone mutaad, akaan bukittenoolum

³⁰ Yéesu li alaañen aan: — Li waa luyilowaale ukittenoolumaal Jáyiiyaju jata Ateemit? Mantee foof bukittenoolum bay luyilowaale uŋalaal min ulobaal mata jo?

³¹ Jáyiiyaju jata Ateemit jikoonokoo li ekool yata anuunuken an koone mutaad, yan ommuu li ul̥uk li etaam li ehaŋ matiti sígulasu feh sata etaamaye.

³² Bale nan yommuu el̥uki, li el̥iilul min yank ehaŋ banuunukabu feh bata sitoolasu. Fan abaj waan waluuke ŋáa’ gay basuuwabu li bunaak bubil buseeh li wo.

³³ Yéesu li anaak aŋa’ ukittenoolum wameeŋe loon unwe, min alob bukanabuku Hulimahu hata Ateemit, lewoo li wahawu wan kuyilimuu kúnaanum.

³⁴ Yéesu anaakut alob li bukanabuku akila baŋalut bukittenoolum min alob. Bale ajowumuu awayito li kúgoomaku koola, li ahebiil waa bukittenoolumabu bulobe.

Yéesu li ayeelen búlus

³⁵ Muñeˈe li líiŋ hunakahu unhu kátiim, Yéesu li aan kúgoomaku koola: — Ulimbaal boot kageb kaaka húwajahu!

³⁶ Mal̥egen li kukat to búsukabu min kuwuj. Kúgoomaku li kunaboo li Yéesu kujow boot li busaanaabu dán ájufoweenumuu. Li baj usaana wakee walako to li akila.

³⁷ Muñeˈe nan kujowumuu, búlus báamak li bútekul. Kuyammalaku li kunaak kubil kulo li busaanaabu, gay li bútoŋ bumeeŋ mal.

³⁸ Li took Yéesu akila bakuŋoole min alako kámooli loon bata hulamahu hata busaanaabu. Kúgoomaku koola li kujow kúliwool, ban li koonool: — Anahaan, kama jokuti min oomaalumuu li újimaal?

³⁹ Muñeˈe nan Yéesu áliwomuu, li anuuloo búlusabu li sembe ban li aan húwajahu: — Ululenoo! Uweelen! Mal̥egen búlusabu li buweelen, min lulenoo lul.

⁴⁰ Muñeˈe Yéesu li aan kúgoomaku koola: — Wáa újiye li jíkoli? Kama boot muñeˈe jíyinenolut li Ateemit?

⁴¹ Bale kúgoomaku li kúkoli ŋáa’, min kunaak kúsuumenoo koon: — Kama laalu an buu, an emmuu maayeet élusayi li ekaan wahawu wan alobumuu, malamu foof?