Maak 12 - Jola-Kasa

Yéesu li aŋa’ bukittenoolum bata kuloka li úbiiñ kál̥afute

¹ Muñeˈe nan Yéesu átoŋumuu elobayi li ésukayi, li amit aŋa’ bukittenoolum min alob li buko aaniil: — Bile baj ánayine akee al̥uke úbiiñ li bul̥ib. Nan al̥ukumuu úbiiñawu aban, li ateef hukalab áwooñen bul̥ibabu. Ban, li awok tan ammuu anaak al̥uuten kúul̥aku kata úbiiñawu, ban foof li ateef húfooyum hagimbe. Nan abanumuu feh, li akat bul̥ibabu li kuŋen kata kuloka úbiiñ kubilum kunaak kucaamool to joola, min akila ajow kañaahoo ban lóyiye.

² Muñeˈe nan taŋayi yata kabajaku kata kúul̥aku kata úbiiñawu éliiŋumuu, ánayinaawu li aboñ aloka oola boot bata kulokaaku kata úbiiñawu, mantee li kusenulool joola li kúul̥aku kata ébiiñayi.

³ Bale nan alokaawu ata ánayinaawu áliiŋumuu, kulokaaku kata úbiiñawu li kujokool kutek, ban li kulaañenool ábalo kuŋenookuŋen.

⁴ Anáyinaawu ata bul̥ibabu bata úbiiñawu li alaañen aboñ aloka akee boot bata kulokaabuku kata úbiiñawu. Nan áliiŋumuu, kulokaaku li kukebool li húkow, ban li kugelool kusuuwen.

⁵ Anáyinaawu ata bul̥ibabu, li aboñ aloka áhaajut bata kulokaaku kata úbiiñawu, áliiŋ, li kumukool. Kuloka kameeŋe kan ánayinaawu ata bul̥ibabu aboñumuu bata kulokaaku kata úbiiñawu, kukee li buko li kutekiil, kaabuku li kumukiil.

⁶ Muñeˈe ánayinaawu ata bul̥ibabu li saŋowool bale añoolool anolawu sih, an aboolatumuu. Li aboñool búsoluma, bata kulokaaku kata úbiiñawu, min anaak ayinoo li aan: «Manooman fan kusuu añoolom.»

⁷ Bale kulokaaku umbuku kata úbiiñawu li kunaak koonoo: «Ummu, akila ammuu li abil atowo ánayinaawu ata bul̥ibabu. Jibil umukaalool, min bútowowabu bulako boololaal.»

⁸ Muñeˈe li kujok añiilawu kumuk kuban, li kúyunnen ehuluŋayi yoola tíyaŋ bul̥ibabu bata úbiiñawu.

⁹ Yéesu li agel̥l̥en aan: — Muñeˈe buu ánayinaawu ata bul̥ibabu bata úbiiñawu aate akaan eeno? Manooman fan ajow akila humumool amuk kulokaaku kata úbiiñawu, min aŋa’ bul̥ibabu bata úbiiñawu asen kuloka kukee kooken.

¹⁰ Inti jijangajanga Hulimahu unhe hata Ateemit, haanumuu: «Huyitikahu humum ho, han kuteefaabuku koonumuu hujakut, ho hubile huhaŋumuu májaliŋ kaaku feh.

¹¹ Laalu búkaanum bata Amaaŋenawu, wah wásuume ŋáa’ bajuk li kúkilolaal!»

¹² Muñeˈe huhaanaahu hata élambaayi li kaliikenemuu ésukayi eluwaayi ésukayi eluwaayi yata Móyiis, li kulako huŋes bútin boot min kujok Yéesu. Mata li mal̥egenamu, kúnaanunnaanum koon bukittenoolumabu ban alobumuu, li buko lalob bo aya. Bale emmuu kúkolikoli búsukabu, li kukat to Yéesu min kujow.

Kufaaliisiyeŋaku li kugel̥l̥en Yéesu mata búhalabu baheleyimuu Ayíiyawu áamakawu

¹³ Muñeˈe li kúboñul kukee li Kufaaliisiyeŋaku bata Yéesu, kujow kugel̥l̥enool hulim mantee li álobul, li kújokumool tó.

¹⁴ Mal̥egen li kujow kúliiŋ, li koon Yéesu: — Anahaan, jihaase joon awu an alobe mal̥egen, ban úkoliwut anoowan mata újukeleliit li buul. Ban luliikeneliiken bukanabuku li mal̥egen buu kommuu li kunaak kuloŋ loon Ateemit afañumuu. Ulóboli, mantee Eluwaayi yata Móyiis yonsoon lootaale uhalaal búhalabu bahaleyimuu áyiiyawu áamakawu Sesaal, mantee a’aa’? Mantee lootaale usenaal búhalabu, mantee ootutaal usenaal bo?

¹⁵ Bale emmuu Yéesu lahaase búhoolowabu booliil, li aaniil: — Wáa újiye li jóomi li jabuutoolom? Jíŋalulom sídalamasu saŋaleyimuu min hal ijuk.

¹⁶ Mal̥egen li kúŋalulool yano. Muñeˈe Yéesu li agel̥l̥eniil aaniil: — Kambu kata ayi li kajaw kata ayi kóomi ló? Li koonool: — Kata Sesaal.

¹⁷ Yéesu li aaniil: — Seeh, kama jilaañen Sesaal wahawu wata Sesaal. Ateemit li jilaañenool wata Ateemit. Hulimahu han alobiilumuu li hújiyiil li kusego ŋáa’.

Búwonnoo mata kayitowulaku kata kaketumuu

¹⁸ Muñeˈe kukee li Kusaduusiyeŋaku li kubil kutook Yéesu. (Kusaduusiyeŋaku umbuku koone kaketumuu let kuyitowumul li eketayi.) Nan kúliiŋulumuu, li kugel̥l̥en Yéesu koonool:

¹⁹ — Anahaan, Móyiis lakikkiic eluwaayi inye boot li ololaal yaanumuu: «Nokoomuu loon ánayine ayabe akete akat aseekool ban kuŋañenut añiil, atuyool li atowo aseekool, mantee li kubukoo bañiil boot li atuyool aketumuu.»

²⁰ Imban, bile baj kutuyaay koono hutok li kúl̥uba. Atínaalawu li ayab anaale aban, li aket babajut añiil.

²¹ Al̥úbutawu li ayab anaalaawu an atuyool aketumuu akat. Li ahin aket buko babajut añiil. Aháajutawu foof mo manolamu.

²² Buko hutok li kúl̥ubaaku feh li kuyab anaalaawu ban anoowan li buko abajut li akila añiil. Muñeˈe nan kutuyaayaku hutok li kúl̥ubaaku kujeˈe kuketumuu feh kuban, anaalaawu foof li aket.

²³ Kama muñowu nan kánayinaabuku kommuu kubil kuyitowumul li eketayi, ayi li buko ammuu li aŋa’ anaalaawu alako aseekool, emmuu buko feh hutok li kúl̥ubaaku kuyabeenooyab?

²⁴ Yéesu li aaniil: — Jiliimooliimoo. Ban jihaase wáa újiye? Mata jínaanumut Bakiicelabu maayeet, jínaanumut foof sembaasu sata Ateemit.

²⁵ Li mal̥egenamu, nan bukanabuku kommuu li kubil kuyitowumul li eketayi, kánayinaabuku let kuyab, kaalaabuku let kuyabo. Bale fan kunokoo loon emalakaayi yammuu li emitayi.

²⁶ Muñeˈe mata kaketumuu, li mata kayitowulaku kooliil li eketayi, kama jijangawut li éliibalayi yata Móyiis tan alobumuu mata huñobahu hátifumuu? To untu kikkiic kaanaku, Ateemit lansaan Móyiis: «Injé emmuu Ateemitawu ata Abulaham, Ateemitawu ata Isaak, li Ateemitawu ata Sakob.»

²⁷ Mó mújimuu, Ateemit alet Ateemitawu ata bukanabuku kaketumuu, bale Ateemit ata bukanabuku kaloŋumuu. Mo emmuu jiliimooliimoo ŋáa’.

Eluwaayi yahaŋumuu feh

²⁸ Muñeˈe akee li kaliikenemuu ésukayi eluwaayi ésukayi eluwaayi yata Móyiis, ajamiilumuu buko li búwonnoolabu, li ajuk kaanaku Yéesu látuttuul Kusaduusiyeŋaku jak, li ákoojulool min agel̥l̥enool aanool: — Eluwa yay ehaŋumuu li siluwaasu feh?

²⁹ Yéesu li aanool: — Eluwaayi yátinaalayi yo yommuu inye: «Isilayeel, ujanten! Amaaŋenawu Ateemit oololaal, akila bale ammuu Amaaŋen.

³⁰ Ban loote ufañ Amaaŋenawu Ateemit ooli li buyinumi feh, li yaali feh, li kayinooli feh, li sembeyi feh.»

³¹ Eluwaayi él̥ubutayi yo yommuu inye: «Loote ufañ afaali an, loon awu humumi ufañoolomuu.» Bajut eluwa yakee yahaŋe siluwaasu unsu síl̥uba.

³² Muñeˈe áyinaawu aliikenemuu ésukayi eluwaayi yata Móyiis li aan Yéesu: — Lukooŋe, Anahaan! Lulobe mal̥egen min oonumuu: «Amaaŋenawu balewool áami Ateemit, bajut Ateemit akee ábuti li akila.

³³ Ban hufañool li buyinumi feh, li kayinooli feh, li sembeyi feh, li hufañ afaali an loon awu humumi ufañoolomuu,» wahawu unwu feh uhaŋe ŋáa’ sínuukuleŋasu sasilayeyimuu, li ujuuñakawu wásuleyimuu boot li Ateemit.

³⁴ Nan Yéesu ajukumuu kaanaku ánayinaawu lalollob li bújallo ló, li aanool: — Ulóyiwut kanoken li Jáyiiyaju jata Ateemit. Muñeˈe anoowan alaañenut akaañen agel̥l̥en Yéesu wah.

Mantee Kilisita Añiil ata Dayit laam?

³⁵ Muñeˈe Yéesu li aŋa’ hulimahu min alako kaliiken bukanabuku Hulimahu hata Ateemit híndo Eluufayi yata Ateemit, li agel̥l̥en aan: — Buu kaane kaliikenemuu ésukayi eluwaayi yata Móyiis li kuyili koon Kilisita Añiil ata Dayit laam?

³⁶ Dayit humumool lansaan li búkaanum bata Buyinumabu Banabaabu: «Amaaŋenawu Ateemit lansaan Amaaŋenawu úmbaam: “Ubil ubah kaŋenom kúli, boot yok nan emmuu iŋa’ kulatoolayi ikaani úkakul.”»

³⁷ Kama Dayit humumool ahooñoolumuu Amaaŋen, buu Afakenaawu ayilo alako bale Añool Dayit? Búsukabu balako tomuu li bujanten Yéesu li ésuumansuum ló.

Yéesu li áhesul kaliikenemuu ésukayi eluwaayi yata Móyiis

³⁸ Nan Yéesu alakomuu kaliikenaku kata bukanabuku Hulimahu hata Ateemit, li aaniil: — Jíkaanum bukanabuku kaliikenemuu ésukayi eluwaayi yata Móyiis, kafañemuu kakaano kúsabadoo min kuñaahoo, ban li kufañ ŋáa’ min bukanabuku kunaak kusaafiil li waayeenawu.

³⁹ Li kunaak kuman síbahumasu sata kayooŋ, min kubah li siluufasu sata kal̥awaku, li tan haŋumuu majak li kúbaññaatiyaku.

⁴⁰ Li kunaak kubunt kaalaabuku kahokumuu kúyiniil, min kuyab wahawu feh wan kuhine kubajumuu, ban li kunaak kul̥aw fiyo ŋáa’ boot ñajuko. Mó mújimuu, katekaku kooliil fan kubil kuhaŋ másengi feh.

Anaale ahoke áyinool li asen múdalamamu feh man ahine abajumuu

⁴¹ Muñeˈe Yéesu li abah ajooŋoo tan bukanabuku kukaanemuu ehaaliisayi, min ajuke buu búsukabu bukaane lómuu sídalamasu eeno. Bukan kameeŋe kabaje li kukaan dó sídalam sáamak.

⁴² Muñeˈe li baj foof anaale agaye ahoke áyinool abile áliiŋul, li akaan dó muhanjal múl̥uba mata fálam máliiŋut édalam.

⁴³ Muñeˈe Yéesu li áhooñul kúgoomaku koola kúliiŋul, li aaniil: — Li mal̥egenamu fan ilobuul, anaalaawu ummu ahokumuu áyinool ban li akaan an agaye, lasensen haŋ bukanabuku feh kasenumuu.

⁴⁴ Mata kaabuku feh kusensen sídalamasu sawuuhumuu li buko. Bale akila, maayeet min agayimuu ŋáa’, li asen wahawu feh wan ahine abajumuu boot li buloŋool.