Hulimahu Hásuumaahu loon Saŋ akiic homuu 4 - Jola-Kasa

Yéesu li áfimboo li anaale ata Samali

¹ Muñeˈe Kufaaliisiyeŋaku koola, ban li ábatiise kúgoom kahaŋe mameeŋ kan Saŋ ábatiisemuu.

² (Li mal̥egenamu, Yéesu humumool ábatiisewut anoowan. Kúgoomaku koola kunaake kúbatiise bukanabuku.)

³ Nan Yéesu ajamumuu li kulob loon muñaˈa, li áfu’ li etaamayi yata Súde min alaañ boot li yata Gálile.

⁴ Muñeˈe boot min ajow boot li etaamayi yata Gálile, laate ájowum li etaamayi yata Samali.

⁵ Muñeˈe Yéesu li alako ejowayi, li áliiŋ li ésuk yakee yata Samali yan koone Sicaal, yakooje eŋamayi yan Sakob asen nomuu añoolool Suseef.

⁶ To untu ekoloŋayi yata Sakob elakomuu. Yéesu, nan ayokumuu ejowayi, li abah akooj ekoloŋayi. No unnu banakabu bajowe boot kayiten.

⁷ Anaale akee áfulumulo Samali li abil káyij mal. Yéesu li aanool: — Usenom mal ihob.

⁸ (No unnu, kúgoomaku koola buko bajeˈe li ésukayi húnoomul mutiñaay).

⁹ Anaalaawu áfulumulomuu Samali li aan Yéesu: — Kama awu inti Asuwif kujamoolut li kata Samali.)

¹⁰ Yéesu li aanool: — Uhaaseeneenumuu wahawu wan Ateemit esenemuu, li anawu aanemuu li awu «Usenom mal ihob», awu humumi ooteenumuu oonool aseni mal uhob, ban fan aseneeni mal masene buloŋ.

¹¹ Anaalaawu li aanool: — Anahaan, ookut ebaag, ban ekoloŋayi ésenkisenki. Bay lóomi li úŋalumul malamu ummu masenemuu buloŋ?

¹² Waa, awu fíle luhaŋe átuubawoli ahaan Sakob? Okila ákatolimuu ekoloŋayi inye, ban akila humumool lahohhob malamu mata yo boot li kuñoolool ló, li foof sínuukuleŋasu soola.

¹³ Yéesu li aanool: — An ahobumuu malamu ummu, bahob fan bulaañ bujakool.

¹⁴ Bale an ahobumuu malamu man emmuu li isenool, bahob let bumit bulaañ bujokool. Mata malamu man emmuu li isenool, fan mulako kábulen li akila dán buloŋabu bábaneliitumuu bóomi li búfulumul.

¹⁵ Anaalaawu li aanool: — Anahaan, kama usenom malamu ummu jakum bil bahob bulaañen bujokom, jakum ibil foof ílaañul taate káyij mal.

¹⁶ Yéesu li aanool: — Ujow úhooñul áyini min úlaañul boot taate.

¹⁷ Anaalaawu li aanool: — Ibajut ánayine. Yéesu li aanool: — Lukooŋe min oonumuu ubajut ánayine.

¹⁸ Lukooŋe, mata li mal̥egenamu kánayine hutok lubaje, ban ánayinaawu an ookumuu muñeˈe alet áyini.

¹⁹ Muñeˈe anaalaawu li aan Yéesu: — Anahaan, lijuke een awu afulofet loom.

²⁰ Sítuubawoli sihaan sata Samali li huyuuyahu unha sinaake simanen Ateemit, bale bukuluul Kusuwifaku li joon Yeelusalem ésukayi yóotimuu enaak emanen Ateemit.

²¹ Yéesu li aanool: — Alíinom, úyinen lí ínje, taŋayi inyu li ebil nan an aatutumuu amanen Atuubaawu li huyuuyahu unhu, mantee foof Yeelusalem.

²² Bukuluul jata Samali, wah wan jihaasut jimanene. Alóli wah wan jihaase jimanene, mata kafakaku li Kusuwifaku kubilumulo.

²³ Bale taŋayi inyu li ebil, ban muñeˈe eŋeje, nan kumanenaaku kata mal̥egen koomuu kunaak kúmanenum Atuubaawu li Buyinum li mal̥egen. Mata li mal̥egenamu, Atuubaawu kumanena loon muñaˈa lafañumuu.

²⁴ Ateemit Buyinum, ban bukanabuku kamanenewoolumuu, koote kúmanenumool li Buyinum li mal̥egen.

²⁵ Anaalaawu li aanool: — Lihaase een Afakenaawu (an koonemuu Kilisita) fan abil. Nan ammuu li abil, fan ákittenoli wahawu feh.

²⁶ Yéesu li aanool: — Injé jalobemuu li awu, ínjemuu.

²⁷ No unnu, kúgoomaku kata Yéesu li kúliiŋul. Li kusego ŋáa’ nan kujukumuu Yéesu li elob li anaale. Bale anoowan li buko akaañenut agel̥l̥enool aanool: «Waa lufañe li akila?» Mantee foof: «Wáa újiye li oono li elob li akila?»

²⁸ Muñeˈe anaalaawu li akat to káyijumaku koola, min alaañ boot li ésukayi, ajow aan bo bukanabuku:

²⁹ — Jibil jijukom ánayinaaye alobommee wahawu wan ikaanumuu feh. Lenseen okila ammuu Afakenaawu, inti mo fíle?

³⁰ Bukanabuku li kúfulul li ésukayi kubil kujuk Yéesu.

³¹ Muñeˈe no unnu, kúgoomaku li koon Yéesu: — Anahaan, kama ufan uŋa’ wah ukee utiñ!

³² Yéesu li aaniil: — Libaje mutiñaay man éemi li itiñ man jihaasut.

³³ Muñeˈe kúgoomaku li kunaak kugel̥l̥enoo koon: — Waa, akee fíle asenool atiñ?

³⁴ Yéesu li aaniil: — Mutiñaayamu múmbaam mo mommuu kakaan wahawu wan anawu áboñulommuu afañumuu, ban li ihabel bulokabu ban asenommuu kakaan.

³⁵ Inti bukuluul joonemuu: «Taate kul̥eeñ kubakii ecacayi li éliiŋ?» Bale ínje fan eenuul: Jiteb kúkiluul min jijuke ul̥aakawu; uyaane waal boot mata ecac.

³⁶ Anawu ammuu li ecacayi layaane ayab bacaamool aban, ban li awoogen káhanjiinaku boot li buloŋabu bábaneliitumuu. Mo emmuu, anawu al̥ukemuu li anawu acacemuu fan kubaj ésuumahukow li mano.

³⁷ Mata muñowu húlobuwahu húkooŋummuu, haanumuu: «Akee fan al̥uk, aahu li acac».

³⁸ Liboñuuboñ jijow jicac li kal̥aak dín jilokut. Kukee kuloke li kal̥aakaku, min bukuluul li jíbajum kásuumaay li bulokabu booliil.

³⁹ Bukan kameeŋe káfulumulo li etaamayi yata Samali li kúyinen li Yéesu, mata anaalaawu laaniisaan: «Anáyinaawu ummu lalobonlob wahawu feh wan ikaanumuu.»

⁴⁰ Wahawu unwu újimuu nan kata Samali kujowumuu kutook Yéesu, li kuyaakoolool koonool alako li buko. Mal̥egen Yéesu li alako to kunak kúl̥uba.

⁴¹ Bukan kata Samali kahaŋe mameeŋ li kúyinen li akila, mata hulimahu hoola húji.

⁴² Kata Samali li koon anaalaawu: — Muñeˈe inti mata wahawu wan úlobolimuu bale újiwoli li jíyinen, bale min áloli húmumoli jijamoolumuu li alob; ban jihaase joon akila ammuu mal̥egen Afakenaawu ata adunaayi.

Yéesu li afaken añiil ata an áamak

⁴³ Nan bajumuu kunak kúl̥uba, Yéesu li ájowum tó boot li etaamayi yata Gálile.

⁴⁴ Li mal̥egenamu Yéesu humumool lansaan: «Afulofet áluukeneliiti li etaamayi ban abukimuu.»

⁴⁵ Muñeˈe nan áliiŋumuu li etaamayi yata Gálile, bukanabuku kakin bomuu li kuyabool jak, mata buko foof kujowujow kukaan kagaanaku kata Faakayi. Kujuujuk bo wahawu feh wan Yéesu akaanumuu nan kagaanaku unku.

⁴⁶ Muñeˈe Yéesu li álaañul boot li ésukayi yata Kaana yammuu li etaamayi yata Gálile, ban akaanumuu malamu mulako ébiiñ. Li baj bo an áamak aloke bata áyiiyawu, an añoolool áyine ásomute li ésukayi yata Káfeenawum.

⁴⁷ Nan ánayinaawu abukumuu añiilawu ásomutumuu ajamumuu kaanaku Yéesu labilumulo li etaamayi yata Súde boot li yata Gálile, li ajow ajukool min ayaakoolool aanool ajow boot Káfeenawum ajow afaken añoolool ásomutumuu boot eket.

⁴⁸ Yéesu li aanool: — Bukuluul jijukutumuu búhiisenum li wah wájaahaleniye let jíyinen maayeet!

⁴⁹ Anáyinaawu alokemuu bata áyiiyawu li aan Yéesu: — Anahaan ubil cab ujaˈa boot búmbaam, mata ubilutumuu añoolom fan aket.

⁵⁰ Yéesu li aanool: — Ujow bóot. Añooli ummu li buloŋ. Anáyinaawu alokemuu bata áyiiyawu li áyinen li hulimahu han Yéesu aloboolumuu min ajow ábalo.

⁵¹ Muñeˈe nan ánayinaawu alakomuu bóotabu, li afam li kulokaabuku koola. Li koonool: — Añooli lalakowe jak.

⁵² Anáyinaawu li agel̥l̥eniil aaniil: — Kama tinak buu añiilawu alakomuu jak? Li koonool: — Huken, banakabu bakel̥e eniilayi yoola ekatumuu kásufaku.

⁵³ Atuubaawu ata añiilawu li ahaas kaanaku taŋayi inyu Yéesu aanoolumuu «Añooli lalakowe jak.» Muñeˈe, akila humumool li butoŋool feh li kúyinen li Yéesu.

⁵⁴ Wahawu unwu ulakomuu búhiisenum búl̥ubut bájaahaleniye ban Yéesu akaanumuu nan álaañumulomuu li etaamayi yata Súde boot li yata Gálile.