Bakaanelabu 12 - Jola-Kasa

Elod li amuk Saak ban li akul̥ Fiyeel

¹ Muñeˈe no unnu, áyiiyawu Elod li alako jálaaten kukee li bukanabuku kata ejanguwayi yata Yeelusalem.

² Li alob min kuŋa’ ékundu min kumuk Saak, atuyaayawu ata Saŋ.

³ Nan áyiiyawu Elod ajukumuu kaanaku Kusuwifaku súumiisuum, li alaañen alob min kujok Fiyeel. (No unnu, li taŋayi yata kagaanaku kata kúmbuuluwaku kakaanutimuu élebiil).

⁴ Nan Elod alobumuu min kujok Fiyeel kuban, li aŋalool akul̥, ban li alob kúmim kubakii kabaje hanoohan kusollaali kubakii, min kufooyool. Layinooleene min atiib Fiyeel hákil ésukayi, kagaanaku kata Faakayi yata Kusuwifaku ko babane.

⁵ Mal̥egen li kufooy Fiyeel li hukul̥ahu jak. Bale kata ejanguwayi li kuhanken min kul̥aw Ateemit boot li akila.

Fiyeel li áfulenuli li hukul̥ahu

⁶ Muñeˈe li ehukaayi yammuu ekaten, min Elod atiib Fiyeel hákil ésukayi feh, okila Fiyeel li alako kámooli majenki useel úl̥uba, li tutoo kusollaali kúl̥uba. Li kukaan kufooya kuyito tin kámbiilaku kata hukul̥ahu.

⁷ Li kulako to, amalaka ata Amaaŋenawu li ago’ Fiyeel li ejaj min áliwool, ban li aanool: — Uyito cab! Useelawu wan kuŋa’muu min kujenkool li kuŋen, li uyaan úlowul.

⁸ Amalakaawu li aan Fiyeel: — Usinja ban li ukaano sidallaasu sooli. Fiyeel li akaan loon amalakaawu aloboolumuu. Amalakaawu li afamen aanool: — Ukaano hújufowahu hooli min únabul lí ínje.

⁹ Fiyeel li anab li amalakaawu min kúfulul li hukul̥ahu. Ahaasut aan wahawu wan amalakaawu akaanemuu li wo, wah wata mal̥egen: min ayin li aan wah wata kahimmo.

¹⁰ Muñeˈe li kulul̥ kufooyaaku kútinaalaku kulo li kúl̥ubutaku, kúliiŋ li kámbiilaku kata mañamu kan ommuu li úfulum li ko, li unoken li ésukayi. Kámbiilaku unku li kúbabuloolo min kúfu’. Muñeˈe li kújowum li bútin bakee, amalakaawu li ayaan awuj akat to Fiyeel.

¹¹ Fiyeel li akit ánaanum búu jówoolummuu eeno, li aan: — Muñeˈe lihaase een mal̥egen Amaaŋenawu láboñuuboñul amalakaawu oola abil afakenom li kuŋenaku kata Elod, li majakutamu feh man Kusuwifaku kufañeenumuu min mubajom.

¹² Nan Fiyeel ahaasumuu mabajoolumuu, li ajow boot li eluufayi yata Mali abukumuu Saŋ aaneyimuu foof Maak. Bukan kameeŋe buko dó mawooge min kulako kal̥aw.

¹³ Fiyeel li atek kámbiilaku, aloka anaale aaneyi Lod, li abil boot min ábabul.

¹⁴ Li ajam hulimahu hata Fiyeel li ahaas. Emmuu súumoosuum ŋáa’, ábabuloot kámbiilaku, min ayaan atey alaañ ajow aheb aan Fiyeel ummu tin kámbiilaku.

¹⁵ Li koonool: — Awu luwewwel! Bale Lod li átuk tó lit, min aaniil mal̥egen. Li koonool: — Kama laalu amalakaawu oola!

¹⁶ Bale Fiyeel okila akatut katekaku kata kámbiilaku. Nan kukite kúbabulumuu kámbiilaku, li kujukool, li kusego ŋáa’.

¹⁷ Muñeˈe Fiyeel li aŋa’ kaŋenool min akaaniil kulu, ban li akitteniil buu Amaaŋenawu áfulenumuloomuu li hukul̥ahu. Li alaañen aaniil: — Jilob mo Saak li kutuyolaal kaabuku. Ban li áfulul ajow boot bakee.

¹⁸ Nan tikatenumuu, kusollaaliyaku li kulilliwoo ŋáa’ min kunaak kugel̥l̥enoo bay Fiyeel aam.

¹⁹ Ayíiyawu Elod li alob min kuŋes Fiyeel, bale kujukutool. Muñeˈe li alob min kugel̥l̥enoo kufooyaaku kata hukul̥ahu, ban li alob min kumukiil. Fúlum tó, Elod li ájowum Súde boot Sesaale, min alako bo kunak.

Eketayi yata áyiiyawu Elod

²⁰ Ayíiyawu Elod li awuñet bukanabuku kata Tiil li Sidoŋ ŋáa’. Li kujamoo min kujow kutook Elod, buko bajamoole kuban li Balatus afooyemuu káfitaku koola. Ban, li kujow kuŋes huban li Elod, mata bukanabuku kata Tiil li kata Sidoŋ li etaamayi yata áyiiyawu kúŋalumule hutiñahu hooliil.

²¹ Nan hunakahu hacobimuu huŋejumuu, Elod li akaano wañawu woola wata húyiiyetowahu, ban li abah li efenjeŋayi yata jáyiiyaju, min alob asen ésukayi.

²² Esúkayi li elob butiya yoon: — Láalu ateemit áami li elob, inti ál̥ahukowan!

²³ Bale amalaka ata Amaaŋenawu li ayaan atek Elod, mata lansaan éehe’ min aŋa’ kasalaku kammuu kata Ateemit. Kuñal li kutiñool, li aket.

²⁴ Hulimahu hata Ateemit li hunaak huhaŋ majamo.

²⁵ Nan Balunabaas buko li Sóol kukaanumuu bulokabu booliil Yeelusalem kuban, li kulako li kulaañ li kújowetumoo Saŋ an koonemuu Maak.