Bakaanelabu 11 - Jola-Kasa

Fiyeel li akitten Ejanguwayi yata Yeelusalem mabajumuu

¹ Muñeˈe kufootalaku li bukanabuku káyinenumuu li Yéesu kakinumuu li etaamayi yata Súde, li kujam kaanaku bukanabuku kákaanumutumuu li Ateemit balewool, kuyayyab foof Hulimahu hata Ateemit.

² Nan Fiyeel álaañulumuu boot Yeelusalem, kusuwifaku káyinenumuu li Yéesu li kuwatatenool,

³ min koonool: — Lunokennoken bata bukan kateyut búkut, ban li utiñ li buko!

⁴ Muñeˈe Fiyeel li átoŋ akitteniil wahawu feh wabajumuu. Li aaniil:

⁵ — Li ésukayi yata Jofe lilakowe, muñeˈe li ilako kal̥aw Ateemit, li ijuk kahimmo. Li ijuk li kahimmowaku wah ukee wanokoole loon kahul káamak, kátuki li uleebesawu ubakiilawu wata ko, li úwalowumul li emitayi ubil boot tan ilakomuu.

⁶ Li iŋaalo li kahulaku min ilaso jak, li ijuk sínuukuleŋ sata koot kubakii, sata li bujal, ululoon, li basuu.

⁷ Muñeˈe li ijam foof hulim li hoonom: «Fiyeel, iyito umuk yakee li sínuukuleŋasu unsu utokoñ!»

⁸ Bale li een: «Aáj! Let ikaan mo Amaaŋen, mata ikaanolut li butumom wah wátokoñeliiti li wah foof wajakut.»

⁹ Hulimahu li hulaañen hujami búl̥ubut li emitayi. Li hoonom: «Jakum ujok wah wan Ateemit aane ujaajak loon ujakut.»

¹⁰ Wahawu unwu li ubaj boot yok ñoono ñáhaaji, ban li ulaañen újowetumi boot li emitayi.

¹¹ Muñeˈe yaan no unnu, kánayine kúhaaji kan kúboñumulo Sesaale lí ínje, li kúliiŋul li eluufayi dán jilakomuu.

¹² Buyinumabu Banabaabu li boonom ijow inaboo li buko báwettoolut. Bukanabuku umbuke hutok li anolawu káyinenumuu li Yéesu, kan íŋalulomee taate, buko kútiŋenulommuu boot li ésukayi yata Sesaale, ban áloli fóofoli feh jinokennoken li eluufayi yata Kooluney.

¹³ Muñeˈe Kooluney li ákittenoli buu lajukumuu li eluufayi yoola, amalaka abile ayito to min aanool: «Uboñ bukan kujow boot Jofe, kujow kúhooñul Simoŋ an koonemuu Fiyeel.

¹⁴ Fiyeel fan alobi kulimaku kan Ateemit ammuu li áfakenumi, awu li butoŋabu booli feh.»

¹⁵ Nan ítoŋumuu elobayi, Buyinumabu Banabaabu li búwalowul bulako li buko, loon foof búwalowulumuu bubil bulako li alolaal no li húkitumahu.

¹⁶ Muñeˈe li iwayil̥o kulimaku kan Amaaŋenawu alob nomuu aan: «Saŋ li mal lábatiisewume bukanabuku, bale bukuluul fan jíbatiisewumi li Buyinumabu Banabaabu.»

¹⁷ Kama Ateemit aseniilumuu kájiyaku kanolaku li kan asenolaamuu nan úyinenaamuu li Amaaŋenawu Yéesu Kilisita, ínje, ínje emmuu sum ayi mata min íhi’ Ateemit ákaanum mó?

¹⁸ Muñeˈe nan kujamumuu kulimaku unku, li kulu min kukit kusal Ateemit koon: «Kama mal̥egen, Ateemit lakankaan bukanabuku kákaanumutumuu li akila balewool, min kubet búsol baloŋelabu booliil buhaanabu, min kútiiwo kuŋa’ buloŋabu bata mal̥egen.»

Ejanguwayi yata Antiyok

¹⁹ Jálaatenaju jabajumuu nan kumukumuu Ecen kuban, li jíji káyinenumuu li Yéesu li kuyiisoo. Kukee li buko li kujow boot li etaamayi yata Feniisi, kaabuku li kujow boot li étebelemukayi yata Ciif, kukee li kujow boot li ésukayi yata Antiyok, ban kunaakut kuwaale Hulimahu hata Ateemit kukee kúbuti li Kusuwifaku.

²⁰ Bale kukee li bukanabuku káyinenumuu li Yéesu kata Ciif li kata Siilen, li kujow boot li ésukayi yata Antiyok, min kuwaale bo foof bukanabuku kalobemuu elobayi yata kata Gilees, Hulimahu Hásuumaahu hata Amaaŋenawu Yéesu.

²¹ Sembaasu sata Amaaŋenawu li buko silakowe, mó lí múji bukan kameeŋe li kúyinen, min kútiiwo kunab li Amaaŋenawu.

²² Bukanabuku kata ejanguwayi yata Yeelusalem li kujam wahawu unwu wabajumuu. Muñeˈe li kuboñ Balunabaas ajow boot Antiyok.

²³ Nan áliiŋumuu, li ajuk kájiyaku kata Ateemit li bukanabuku káyinenumuu, li súumool ŋáa’. Li awankuleniil foofiil feh mantee li kútuk lit káyinenaku li Amaaŋenawu.

²⁴ Balunabaas lakankaan ánayine ásuume, an ata káyinen an Buyinumabu Banabaabu bulakowe li akila. Bukan kameeŋe li kubil kufamen káyinenumuu li Amaaŋenawu.

²⁵ Fúlum tó, Balunabaas li ajow boot li ésukayi yata Taalus, ajow aŋes bo Sóol.

²⁶ Nan ajukumuu Sóol, li ájowetumool boot Antiyok. Li kulako buko kúl̥uba emit feh, li ejanguwayi yata bo, min kuliiken Hulimahu hata Ateemit bukan kameeŋe. Li ésukayi inyu yata Antiyok, to bukanabuku kútoŋumuu kuhooñ kúgoomaku ekelecen.

²⁷ Muñeˈe no unnu, kufulofet, li kújowum Yeelusalem boot Antiyok.

²⁸ Akee li buko an koone Agábus li alob ákibben, li búkaanum bata Buyinum Banabaabu aan, let fiyo min bamuufaay báamak bubaj li etaamayi feh. (Mal̥egen bamuufaayabu li bubil bubaj nan Kúlod alakomuu áyiiyawu áamakawu.)

²⁹ Muñeˈe kúgoomaku li kujamoo min koon anoowan li buko laate asen wah wan ammuu ayili asen, min kuboñ wo boot kalamben kutuyiil kakinumuu li etaamayi yata Súde.

³⁰ Mal̥egen li kukaan loon kulobumuu, min kuboñ wahawu wan kusenumuu Balunabaas buko li Sóol kújowetum kujow kusen kunahaanaku kata Súde.