Rute 3 - Kaxinawá Bíblia (BR)

Boazĩ hawẽ duapa hatu uĩmanikiaki, na hãtxarã

¹ hanua shaba betsatiã Noemĩ hawẽ babawã Rute yuikĩ: —Mĩ ẽ bake keskawẽ taeshũ benimai unanuma hiwei mĩ pepakũkaĩshanũ ẽ mia huni pepa benashunaii, mĩ benewashanunã.

² Eska shinãkĩ ẽ mia yuiai ea nĩkawe. Boazrã, hawẽ dayaru aĩbuaibube mĩ dayashina anu na habia meshu merã hawẽ dayaru hunibubetã hawẽ bai anu kashũ shekiwã cevada mãtxĩshinabu niwewẽ katai bukanikiki.

³ Mĩ eska kaĩtanũ mia yuinũ ea nĩkawe. Nashitã mĩ batxi pe sawetã sheni ininipawẽ itã hanu dayaibu anu katãwẽ. Hakia hau Boazĩ mia uĩyamanũ hawẽ daya keyutã pikĩ nushukĩ keyuriamakẽ betximayuama huneyutãwẽ.

⁴ Hanua hani Boaz ushaimẽkaĩ, uĩhairatãwẽ. Shekiwã cevada heshe mãtxĩshũ tsuã hune meshu merã yumetsutiruma dasibi haki ushai keyubaunabũ mia tashnikaini Boaz anu kashũ hawẽ dakukuti hawẽ tae huyabukua bepẽtã hawẽ tae hawa metsamama dakashãwẽ. Mĩ haska daka mia betxitã mĩ haskashanũ hatũ mia yuishanikiki. Dateyamashãwẽ— aka

⁵ Rutẽ kemakĩ yuikĩ: —Dasibi mĩ ea haska yuishu keska ẽ iki kaii— aka

⁶ haska hawẽ yayã yunushu keskai hawẽ yura hawẽruatã bai anu kai hikitã huneshũ uiãyã

⁷ Boazĩ pikĩ nushukĩ keyutã benimakaĩ ushanũ ika kashũ shekiwã cevada mãtxĩ pewatã haki daka ma ushakẽ txipu dasibi ushai keyuaibũ hawa hatu banawama hune Boaz anu Rute ka hawẽ tae huyabukuakiri bepẽtã hawẽ taekiri dakatã hawa metsamama dakakẽ

⁸ yamenapũ Boaz bestẽkauã dabekekauãkĩ hawẽ tae tashkuãkiri aĩbu betsa daka mei teku itã

⁹ Boazĩ yukakĩ: —Mĩ tsua huamẽ?— aka Rutẽ kemakĩ: —Ẽ mĩ dayaru Ruteki. Miarã, mĩ enabi kayabiwẽ taeshũ matũ beya keska wakĩ mĩ ea tsumatirumẽ, ea aĩwãkinã?— aka

¹⁰ Boazĩ kemakĩ yuikĩ: —Senhor Deusũ hau mia duawakĩ pepawashanũwẽ. Mĩ bene ma mawabiaimakẽ mĩ benẽ ewa heneama mĩ aĩbu pepahairaki. Dasibibũ mia uĩkanikiki. Mabuya kasmai, mabuuma nukunabu huni betsa hawẽrua pepari ea keskama berunã duakabi bene wakatsi mĩ hatu benama hakia mĩ ea anu besti hushuki.

¹¹ Mĩ aĩbu pepahairakĩ hatu uĩmaya dasibi ẽ mae anu hiweabũ unaĩbuwẽ taea hawa dateyamawe. Haskawẽ taeshũ mĩ ea haska yukai keska ẽ mia atiruki.

¹² Txanima ẽ minabuki. Hakia minabu kayabi betsã ea binua mĩ bene kayabi hayariki.

^13-14 Ikis na habia meshu merã habianu iyuwe. Meshukiri ha huni mĩ benẽ enabi ea binuatũ nukũ beya keska txibãkĩ mia mekekatsis iki hau mia ashũshanũwẽ. Hakia mia akamakẽ Senhor Deusũ ea nĩkaya ẽ mia yubaii. Habianu ushayuwe, penariama katãshunã, hau aĩbu nenu mĩ hushu hau tsuã unãyamanũbunã— aka haska yuia ha meshu merã Boazĩ tae dapi Rute ushashini penai shabakiranaya bestẽtã

¹⁵ Boazĩ yuikĩ: —Mĩ hawẽ yabukua ushashinai pekatã ha tari pũtekĩ pũkĩwãshũ tsumawe— aka Rutẽ tsumakẽ Boazĩ 40 quilo binua shekiwã cevada deushũkĩ matawashũtã merabewakĩ iama Rutẽ iabaini hawẽ mae anu kai

¹⁶ hawẽ hiwetã hikiaya hawẽ yaya Noemi yukakĩ: —Yayaã, mia haska wa mĩ nĩkatanai?— aka haska dasibi Boazĩ yuikĩ ashu Rutẽ Noemi banabimakĩ:

¹⁷ —“Hawa buama mĩ yaya anu mĩ katirumaki”, iwanã, na shekiwã cevada dasibi ea inã ẽ beshuki— aka

¹⁸ benimakĩ Noemi yuikĩ: —Ẽ bake keskatũ, haska Boazĩ mia akai manayuwe. Haska mia yubashu shinãkĩ Boaz na habiatiã huĩrukũtiruma pewakĩ keyuikiki— aka