Provérbios 9 - Kaxinawá Bíblia (BR)

Unanepa inũ unaĩsmapakiri yusinikiaki, na hãtxarã

¹ Unanepã hawẽ hiwe wakĩ 7 txibu hawẽrua nitxĩkĩ kushipa watã

² hanushũ berunãbu hatu yusinũ, iwanã, piti hawẽrua tibi hatu pimakatsi hawẽ ina deteshũ hanushũ ha nushuti vinho pepa pewatã hakishũ piti tapu hatu pewashũtã

³ hawẽ tsumabu mati mapetã mae ewapa anu hiweabu hatu sai akĩ eska hau hatu yuitanũ yuikĩ:

⁴ “Berunã tapĩsbuma inũ unaĩsmapabuũ, neri bekãwẽ.

⁵ Piti ẽ matu pewashũshu inũ vinho pepa ẽ matu pewashũshu pikĩ neshui bekãwẽ.

⁶ Tapĩhairanika hãtxa ana danãma tapĩhairatã hiwekubaĩkãwẽ, haska tapĩhairai hiwemisbu keskai hiweirã, hatu atãkãwẽ”, aka bushũ

⁷ tsuara merabewakatsis ikĩ hatu pewabiabu huni txakabubu hawaira sinatamis hawa haska tapĩkatsi ikama haki hãtxa txakabuhairai haki kashe bestitirubuki.

⁸ Habu kashei hawaira sinatamisbu nemakĩ mĩ hatu tapĩmapaia miki sinatakĩ mia danã bestishãkanikiki. Hakia huni unanepa nemakĩ mĩ tapĩma shinã pewatã miwẽ benimatiruki.

⁹ Hamẽ huni unanepa mĩ yusiã nĩkakĩ tapĩhairai ana unanepa txakayamashanikiki. Huni pepa mĩ yusiã mia nĩkatã ana itxapa tapĩshanikiki.

¹⁰ Unanepai taekinã, Senhor Deus ha dukũ nĩkatã duawakubaĩtiki. Deus meribi pepahaira mĩ unainã, hawaira tapinika mĩ ikũkaĩtiruki.

¹¹ Tsuara ewẽ taea unanepairã, hawẽ hiwea bari itxapa hiweshanikiki, Deusũ ana hiwemakubainarã.

¹² Mia mĩ unaneparã, hiwei pekĩ pepa besti mĩ bikubainaii. Hakia patapai mĩ nĩkaismamisrã, harã minaki, txakaburã, mĩ hawa biama ishanairã.

¹³ Tsuara nĩkaisma pataparã, aĩbu txakabu unaĩsmapa hawa unãma txani besti yuimis keskaki.

¹⁴ Mae ewapa mananã anu hawẽ hiwe beputi anu shabakã tsauti anu tsaushũ

¹⁵ hunibũ hawa shinãma hatũ shinã pepawẽ bai tanabaini buaibu ha nĩkaisma patapa aĩbu keskatũ hatu kenakĩ:

¹⁶ “Berunã tapĩriabumaã, neri bekãwẽ”, akĩ habũ pe shinãbuma hatu yuikĩ:

¹⁷ “Ũpash yumetsutã akarã, pehairaki. Misi huneshũ piarã, nuehaira mĩ unaiĩ”, akĩ hatu yuia

¹⁸ ha aĩbu keskatũ hatu kena bumisburã, habu unaĩsmapabu hari pe dabanẽ mawa kayabi anu buaibu hawa unãbumaki.