Provérbios 4 - Kaxinawá Bíblia (BR)

Hiwea pepa hau txibãkubainũbũ hatu yusinikiaki, na hãtxarã

¹ Epaã, mã ẽ huni bakebuwẽ taeshũ ẽ yusiã pepa tapĩkĩ ẽ hãtxa ea nĩkakĩ matũ hiwea pewakubaĩkãwẽ, hawara pepa inũ hawara txakabu unãti wakinã.

² Ẽ yusiã pepa ẽ matu yusĩkĩ pewairã, hawa hakimakĩ hamakiri shinãyamashãkãwẽ.

³ Earã, ẽ hatũ bakeri iniki. Ẽ ibu aĩbũ ea betxipaikĩ duawakubainaya

⁴ ẽ ibu hunĩ ea yusĩkĩ yuikĩ: “Ẽ mia yusiaĩ shinaĩ ẽ hãtxa hakimayamashãwẽ, haska ẽ mia yunuai keska aki mĩ pe hiwekũkaĩshanairã.

⁵ Unanepai inũ shinã pepa bestinũ, iwanã, ẽ yusiã hãtxa hakima taskayamashãwẽ.

⁶ Unanepa kayabi tapĩkĩ betxipaikĩ heneyamawe. Mĩ haska waya hatũ mia mekeshũ unãmakubaĩshanikiki.

⁷ Hamapai betsa mĩ ariama ha dukũ unanepa inũ hawara pehaira mĩ unãti watiru tapĩtã ha shinãkĩ txibãkubaĩshãwẽ.

⁸ Unanepati miã mĩ betxipaiaya unanepã mia kẽhaira wariashanikiki.

⁹ Maiti hawẽrua keska mia sawematã unanepã mia duawakubaĩshanikiki”, ea wa ẽ nĩkarianiki.

¹⁰ Epaã, ẽ yusiã hãtxa nĩkakĩ tapĩtã ana bari itxapa mĩ hiwekũkaĩshanaii.

¹¹ Unanepa hãtxa ẽ mia yusiaĩwenã, hawẽ ẽ mia iyu pewashanaii, bai pepa mia txibãmakinã.

¹² Hiwea bai pepa mĩ txibaĩ tsuã mia nematirumaki. Ha hiwea pepa txibaĩ hĩ hĩ ikama inũ hawairabiakaini kanei mĩ hawa huti ikama ishanaii.

¹³ Ẽ yusĩti hãtxa danãma mestẽwãtã hakimakĩ heneama txibaĩ mĩ pe hiwekũkaĩshanaii.

¹⁴ Huni txakabu ikaibu hatuki dasitã hatũ txakabu txibãkĩ hatubetã meyamashãwẽ.

^15-17 Habu huni txakabubũ hawara txakabuwariama pe shinaĩ dakatirubumaki. Yura betsa hawa kanemariama shinaĩ ushatirubumariki. Hatu detekĩ itimaska wakĩ habũ hatu txakabuwaibu hatũ piti inũ hatũ nushutirã, txakabu besti kaĩmamisbuki. Hatu dũkekĩ henebaini hatukiri ana hawa shinãma pe besti ikũkaĩshãwẽ.

¹⁸ Huni pepabu hawẽ hiwea hawẽruai penai shabai taeitiã bari kaĩkirani bari mananãbi daka txasha txasha itxakayamai keskai ana pehairakubaĩmisbuki.

¹⁹ Hakia hunibu txakabu hiwekubaini meshu merã kai hawa unãma hawaraki huti imisbu keska haska wakĩ txakabuwakĩ kaneaibu tsuã unãbumahairaki.

²⁰ Epaã, mĩ ẽ bakewẽ taeshũ pes shũ ẽ yusiã ana nĩkakĩ pehaira wawe.

^21-22 Mĩ ekiri tapiaĩ mĩ yura hawa isĩ teneama ẽ yusiã shinaĩ mĩ hawẽ hiwekũkaĩtiruki. Hawa benuama hakimama shinãkĩ mĩ huĩti uke merã ẽ yusiã netã pewakubaĩwẽ.

²³ Haskakĩ hiwea kayabi mĩ bitiruwẽ taeshũ hawara betsa mai anua mĩ betxipaiai binumakĩ mĩ shinã pe mekekubaĩshãwẽ.

²⁴ Txanitxakakĩ mĩ yuiarã, txakabuharaki. Ha henekĩ haska ana shinãyamakubaĩshãwẽ.

²⁵ Huni txakabubũ betsa betsapa haikaimas shinãmisbu inũ tsuãra mia uĩtiruwẽ taea hatuki hawa dateama hariri mĩ kai txĩtuãma pe besti shinãkubaini hiwekũkaĩwẽ.

²⁶ Haska hiwekaĩkĩ hanira mĩ kai bebũkiri shinã pewawe. Haskai bai tanai nishũ txakabuwakĩ mĩ kanetirumaki.

²⁷ Kanekĩ bai txakabu txibanũ, iwanã, shinãma pepas txibãkĩ heneyamakubaĩshãwẽ.