Josué 5 - Kaxinawá Bíblia (BR)

Gilgal anu hiwetã hatũ hina kubitxi hatu meshtenibukiaki, na hãtxarã

¹ Israelĩ enabu hau Hene Jordão pukenũbũ Senhor Deusũ nemakĩ hatu netsushũshĩkẽ bari hikiaikiria Amorreu nawabu shanẽ ibubu inũ Ianẽwã Mediterráneo kesha anu hiwebaunabu Canaã nawabu shanẽ ibubu dasibibũ hatukiri nĩkatã mẽtsisipa detenamenikabubia hatũ huĩti nishmai Israelĩ enabuki datei punu nukai ana kushipa hayabuma Israelĩ enabube detenamekatsi ikama inibukiaki.

² Hanushũ Senhor Deusũ Josué ana yuikĩ: “Mishki nupe itxapa wawe, kenupa wakinã. Haska watã Israelĩ enabu huni tibi hatũ hina kubitxi bisbuma ea hatu meshtemashũwẽ, ea ikũwaĩ hawẽ unãti wakinã”, aka

³ mishki nupe itxapa washũ Mati Gibeate-Haralote anushũ Josué hatũ hina kubitxi hatu meshtemanikiaki.

^4-6 Eskawẽ taeshũ Josué hatũ hina kubitxi ana hatu meshtemakĩ taewani matu yuinũ ea nĩkakãwẽ. Israelĩ enabu huni dasibi hatũ hina kubitxi meshtekeyabu Egito anua tashnibirani hanu tsua hiweabumanu bukubauni huni ewai 20 ano hayabu detenamenikai taekĩ habũ Senhor Deusũ hãtxa nĩkakĩ txibãbumawẽ taeshũ mai pepa hatũ shenipabu Deusũ hatu yubani anu hau habu hikiyamashanũbũ, Deus hamebi yubakai: “Mai pepa anua piti pepa sharabu hau uĩyamashanũbũwẽ”, ikimashũ hanu tsua hiweamanushũ Deusũ hatu kupia bai namakia debukubiranaibũ 40 ano hawenabube hatu imakubaunaya ha huni ewai mẽtsisipai taeaibu Egito anushũ ma hatu hina kubitxi binibu pashayamabu ha hunibu haria mawakubiranaibutiã habũ bake wabu hanu tsua hiweamabumanua kaĩkubiranaibu hatũ hina kubitxi meshteama ikubiranimabũ

⁷ haskawẽ taeshũ Josué hatũ hina kubitxi hatu meshtemakĩ hanu tsua hiweabumanu ha huni ewabu mawakubiranaibutiã hatũ shãtukũ huni bake itxapa Senhor Deusũ hatu pahaira wakubirãshina hawẽ Deus ikũwaĩ unãmati wakĩ ha hunibu dasibi hina kubitxiyabu Josué hatu bimakĩ meshtemakĩ keyurianikiaki.

⁸ Hawẽ Deus ikũwaĩ unãmati wakĩ hatũ hina kubitxi bikĩ hatu keyuabu hau shushai isĩ maĩyunũbũ hatũ hiwe merãshũ hatu manai mani bestiyuabũ

⁹ hanushũ Senhor Deusũ Josué ana yuikĩ: “Egito anu hiweshũ hatũ txakabu tibi tapinishũ mã hawẽ ea dakewakubiranimabuki. Hakia mã ma hatũ hina kubitxi hatu meshtemawẽ taea ẽ ana matuki dakeamaki, matũ txakabu ana shinãmarã”, anikiaki. Haskawẽ taeshũ ha mae kenakĩ: “Gilgalki”, amisbuki. Gilgalrã, nukũ hãtxawenã, “Hatũ Txakabu Putakĩ Tarã Keska Waniki.”

¹⁰ Jericó besusi mai pãpa anu Gilgal anu hiweyukĩ hanu tashni taebiranibu ushe babekei 14 diatiã bari kaya ha Páscoa ikaya haska Egito anushũ Senhor Deusũ detenika nai tsumã hatu mabiris abaini shinãkĩ besikĩ

¹¹ ha shabatiã misi shashawatiuma inũ shekiwã trigo tsui pikĩ taewabaini ushashini ana bestẽtã ha mai pepa anua piti yumemis pikĩ taewashina

¹² ana penaya hatũ piti nai anua Deusũ maná duru misi ana hayamawẽ taeshũ Canaã mai pakea anua piti sharabu hanu pikĩ taewabainibukiaki.

Senhor Deusũ nai tsumabũ shanẽ ibube Josué hãtxanikiaki, na hãtxarã

¹³ Shaba betsatiã Josué Jericó dapi ka nikẽ huni betsa tashnia hawẽ deteti matxatu txaipaya tsuma nia uĩtã kai haki kemashũ Josué yukakĩ: —Mĩ nukũ merabenãmẽ? Ha habu nukuki sinataibu mĩ hatuna daka? Haskara kayamẽkaĩ, ea yuiriwe— aka

¹⁴ —Ẽ minama inũ ẽ habunamariki. Hakia Senhor Deusũ nai tsuma kushipabu ẽ hatu yunumis ẽ hatũ shanẽ ibu huaki— aka nĩkatã dãti iki beti ishũ Josué yukakĩ: —Ẽ shanẽ ibuũ, hawa mĩ ea yununũ ika huamẽ? Ẽ mĩ tsuma ẽ nenuki. Ea yuiriwe— aka

¹⁵ —Hanu mĩ pai anu Deusũ ma pepawarã, meribi meseki. Deusũ hãtxa mia yuinũ Deuski mesekĩ hawaira mĩ bitxi tae pekawe— aka nĩkatã hawaira Josué hawẽ bitxi tae pekashunikiaki.