Josué 1 - Kaxinawá Bíblia (BR)

Deusũ Josué shanẽ ibu wakĩ katunikiaki, na hãtxarã

¹ Senhor Deusũ tsuma Moisés ma mawashĩkẽ txipu Moisĩ merabewanika Numnẽ bake Josué Senhor Deus habe hãtxakĩ yuikĩ:

² “Ẽ tsuma Moisés ma mawashinaki. Hene Jordão miã minabu hatu pukemabaĩshãwẽ. Maiwã pakea ẽ matu ibuwamashanai anu hauri minabu Israelĩ enabu dasibi hatu iyushãwẽ.

^3-4 Hatishũ tsua hiweabumanu kesha inũ Líbano mai mati matipa pakea kesha inũ bari huaikiri henewã Eufrates kesha Heteu nawabũ mai pakea bari hikiaikiri Ianẽwã Mediterráneo ewapahaira kesha kesukauna ha dasibi namakis matũ maiwã pakea ishanikiki. Ha kesukauna anu hanu mã nishanai anu haska ẽ Moisés yubani keska wakĩ ẽ matu ibuwamakubaĩshanaii.

⁵ Mĩ hiweyua hatube detenameaya tsuãra mia binutirubumahairaki. Ẽ Moisés merabewakubirani keska wakĩ habiaskari ẽ mia merabewakubaĩshanaii, putakĩ hawa henebainamarã.

⁶ Ha mĩ shenipabu hatu ibu wamakatsi ẽ hatu yubani anu minabu iyukĩ mai pakea tibi mĩ hatu ibuwamakĩ pashkashũshanaiwẽ taea kushipai hawa dateama txĩtũtaskayamashãwẽ.

⁷ Haska besti ẽ mia yunuaii. Kushipahairai hawa dateama hanira mĩ kai anu unanepai ha mĩ hanu kai anu inũ mĩ hawara akai anu ha baiwẽ kai yusiuri inũ yusmauri dabekeama keskakĩ hawẽ yunuti hãtxa inũ hawẽ nemati hãtxa ẽ tsuma Moisĩ mia yusĩmarã, txibãhairakubaĩshãwẽ.

⁸ Na habias yusĩti hãtxakiri shaba inũ meshu merã shinãkĩ hakiri minabube hãtxakĩ henetaskayamashãwẽ. Haska wakubaini unanepakĩ ẽ hãtxa mĩ akubaĩtiruki.

⁹ Hanira mĩ kai anurã, earã, mĩ merabenã Senhor Deus ẽ mibe kaya huĩti nishmai hawa dateama kushipai mẽtsisipakũkaĩshãwẽ, eã ẽ mia yunukĩ nitxiaĩwẽ taearã”, aka

Josué pukekaĩ mae mebikinãkatsi hawenabu pewamakĩ taewanikiaki, na hãtxarã

¹⁰ hanushũ hawenabu shanẽ ibu beshmasbu dasibi itxawashũ Josué hatu yunukĩ:

¹¹ “Matunabu anu kakũkaũkĩ hatu yunukĩ: ‘Hauri nukũ mekenika Senhor Deusũ nuku ibuwamashanai anu hawẽ kushipakaĩ nũ hatu mae mebĩ bunũbũ matũ piti bawakĩ pewatã maburi dasibi pewakãwẽ. Shaba dabe inũ bestitiã Hene Jordão nũ pukei bukanaii’, akĩ kashũ hatu yunukãwẽ”, hatu watã

¹² hanushũ Israelĩ bake iyua Rúbenẽ enabu pakubainaibu shanẽ ibubu inũ hawẽ bake betsa Gadẽ enabu pakubainaibu shanẽ ibubu inũ hawẽ bake José enabu pashkãni, hawẽ bake Manassésĩ enabu pakubainaibu shanẽ ibubu besti Josué haburi yuikĩ:

¹³ —Senhor Deusũ tsuma Moisĩ matu yubakĩ: “Hene kesha nekeria matũ mekenika Senhor Deusũ nawabũ mai pakea ma matu mebĩshũshinaki. Natiã matunabu ukeri hiweshanaibu anu mã hatu merabewakĩ keyutiruki. Haska watani mã bea na mai pepa nekeri Senhor Deusũ matu ibuwamakĩ keyushina anu hanu txĩtũkirã mã hanu huĩrukũshãkanaii”, akĩ matu yuimarã, ikis shinãkãwẽ.

¹⁴ Haskakẽ nenu na mai pakea anu Moisĩ ma matu ibuwamaima anu matũ aĩbuaibu inũ matũ bakebu inũ matũ inabu bashiyubaĩshãkãwẽ. Matu huni kushipa detenamenikabu besti matũ detetiya bui matunabu shuku betsabube husikaĩ bebũkiri Jordão puketã hatubetã nawabu detekĩ hatu nitxĩshũkĩ merabewayukubaĩshãkãwẽ.

¹⁵ Hanira Senhor Deusũ hatu ibuwamashanai anu haburi huĩrukunũ ikaibu haska matu washuĩma keska wakĩ Senhor Deusũ hatu merabewakĩ keyukẽ hatiãra besti nekeri Hene Jordão bari huaikiri Senhor Deusũ tsuma Moisĩ matu ibuwamaima anu matũ mai pakea anu hiwei mã txĩtũshanaii, hanu huĩrukuinã. Matunabu shukua betsabu hatũ mai pakea tibi ibu wakĩ keyuriabuma hatu merabewayukubaĩshãkãwẽ— hatu wa

¹⁶ Josué hãtxa nĩkatã shanẽ ibu dasibibũ habiaskari shinaĩbũ shanẽ ibu betsabu hãtxashũkĩ Josué kemakĩ: —Hawara haska shinãkĩ mĩ nuku yunua nũ mia ashũkubaĩshanaii. Hanira mĩ nuku yunuai nũ kakũkaĩshanaii.

¹⁷ Moisĩ hãtxa nũ nĩkakubirãshina keska wakĩ miãri mĩ nuku yunuai nũ mia txibãriakubaĩshanaii. Eskakiri nũ mia shinaiĩ. Moisés merabewakĩ amakubirãshina keska wakĩ mĩ mekenika Senhor Deusũ hau mia merabewariakubainũwẽ.

¹⁸ Tsuabũra mĩ yunua danãkĩ mia ashuãma hau mawashanũbũwẽ. Hakia mia ikirã, nuku shanẽ ibushuni kushipai datetaskayamashãwẽ— akabu