Jonas 3 - Kaxinawá Bíblia (BR)

Nínive anu hiweabũ Senhor Deusũ kupiti nĩkatã hatũ shinã betsa wanibukiaki, na hãtxarã

¹ Senhor Deusũ Jonas ana nitxĩkĩ yuikĩ:

² “Nenua benikaini Assíria nawabũ maewã ewapahaira Nínive anu kashũ haska ẽ mia yuiai harishũ hatu banabimatãwẽ”, aka

^3-4 haska Senhor Deusũ yunua nĩkatã kaĩkaini Nínive maewã ewapahaira shaba dabe inũ besti maĩ kai kapukekaĩtibiakẽ Jonas ha maewã anu hikitã shaba bestitxai maewã kapukekĩ hui kushipawẽ hatu yuikubaĩkĩ: “40 shaba keyuriama matuki sinatakĩ Deus kushipahaira dasibi hatu binuatũ Nínive maewã yamawakĩ keyushanikiki”, hatu wakubainai

⁵ ha maewã anu hiweabũ nĩkatã haska Deuskiri Jonasĩ hatu yuiai ikũwãkĩ: “Samakenãkãwẽ”, iki yubakatã shanẽ ibubu inũ, shanẽ ibu beshmasbu inũ, nuitapahairaibũ hawẽ nui bika teneai unãmati tari besha sawe keyuabũ

⁶ haska Jonasĩ hatu banabimai Nínive shanẽ ibuhairatũ nĩkariatã hawẽ shanẽ ibu tsauti anua butukirã hawẽ shanẽ ibũ tari hawẽrua pekatã hawẽ nui bika tenei unãmati tari besha saweriatã txi mapuki tsaua

⁷ hawẽ merabewanikabube hãtxatã hau eska yunuti bena washunũbũ hatu yuikĩ: “Piti inũ nushuti yurabu dasibibũ hau piyamanũbũwẽ. Ha dikabi hatũ ina awa inũ hatũ txashuwã piti inũ ũpash hau hatu amayamarianũbũwẽ.

⁸ Ana haska tibi ikama mã shinã txakakĩ haska txakabu tibi mã amis inũ mã detenamei heneama mã ikũkainai natiã henetã nui bika teneai unãmati tari besha sawe keyutã hau nukuwẽ nuinũ Deus kushipahaira dasibi hatu binua hui kushipawẽ yukakubaĩkãwẽ.

⁹ Nũ haska wakubainaya nukũ txakabuwẽ nukuki sinatabiashina Deusũ hawẽ shinã betsa washanimẽkaĩ. Haska waya nũ mawama ishanaii”, hatu wa bushũ mae hirabi anu hatu yuikubaunaibũ

¹⁰ Nínive anu hiweabu haska wakubaini hatũ txakabu ma heneabũ Deusũ uĩtã hawẽ kupiti Jonasĩ hatu banabimashina Deusũ shinã betsa watã kupiti hatu anu ana yunuamakẽ