Jonas 2 - Kaxinawá Bíblia (BR)

Bakawã hatu anushũ Jonasĩ Senhor Deus yukanikiaki, na hãtxarã

¹ Jonas bakawã hatu uke merãshũ Senhor Deus kẽwãkĩ

² yuikĩ: “Senhor Deusuũ, bika tenehairakĩ ẽ mia yuka mĩ ea kemashuki. Ianẽwã ewapa uke merã mawa keska dakashũ mia yukakĩ: ‘Ea merabewawe!’ iki ẽ mibe hãtxai mĩ ea nĩkashuki.

³ Ianẽwã nuahaira anu ea pukuabu hene kushibaĩkĩ ea dabe dabe abaĩkĩ hene buspu tsaubainai mĩ yunua ea nũtã nũtã abaĩshinaki.

⁴ Mia bebũshũ ea putabu kakĩ ẽ kanebirãshina ibubis ẽ unãshinaki. Miki nukuti hiwe meribi ẽ ana uĩtiruma dabanẽ ẽ shinãshinaki.

⁵ Ma ẽ hene merã ka ea atxi keyushũ ianẽwã nuahaira merã ea bepuaya ianẽwã merã basi hawẽ tapũ nishi keskawẽ ẽ bushka ea yabushinaki.

⁶ Ianẽwã nuahaira merã tsumabaĩ ma hari ea bitxia ana haria ẽ kaĩtiruma dabanẽ ẽ ishiãki. Hakia Senhor Deusuũ, miarã, mĩ ẽ Mekenika Deuski. Ẽ mawabiapanã mĩ ea ana hiwemakĩ piskumashinaki, bakawã merã nanetã ea mekekinã.

⁷ Ẽ yushĩ ea anua kaĩkainaya unãkĩ Senhor Deusuũ, mia shinãkĩ ẽ mia yuka mĩ Templo meribi anu mianu ẽ hãtxa tashnishinaki.

⁸ Tsuabũra yushibu dami kẽwãkubaĩkĩ mia txibãkĩ henebaĩmisbuki.

⁹ Hakia eanã, ẽ huiwẽ benimakĩ mia kẽwãkĩ Jerusalém anushũ inabu sheni kuakĩ ẽ mia menushũkubaĩshanaii. Hawara ẽ mia yubaima ana hakimama mia ashũkĩ ẽ mia meneshũshanaii. Senhor Deusuũ, hiwemakĩ miã besti hunibu mĩ piskumatiruki”, ikaya

¹⁰ Senhor Deusũ hawẽ hãtxa betxipaikĩ hau mashi anua bakawã Jonas hanãtanũ Senhor Deusũ yunua mashi kesha ka bakawã hananikiaki.