Jó 8 - Kaxinawá Bíblia (BR)

Hawẽ haibu Bildadẽ haska shinaĩ Jó yusĩrianikiaki, na hãtxarã

^1-2 Elifazĩ hãtxashũkĩ merabewakatsi ibia hawẽ hãtxa ikũ kayabimakẽ Jó danãkĩ nĩkashunama inikiaki. Hanushũ huni betsa Suá anua Bildadẽ Jó yuikĩ: “Na haska hãtxakĩ mĩ yuikubainairã, hatiã mĩ neseshanai? Mĩ hãtxarã, niwewã kushipa shũku ikai keska besti mĩ waii.

³ Deus kushipahaira dasibi binuatũ hawara haska betxipaimisrã, betsa waismaki. Hawẽ yunuti kushipa yununi kanekĩ hawa betsa waismariki.

⁴ Eã ẽ unanã, txanima mĩ bakebũ Deuskiri txakabuwaimabuwẽ taeshũ Deusũ haska betxipaiama hatu kupimaki.

^5-6 Haskawẽ taeshũ Deus kushipahaira dasibi binua benariwe, hau miwẽ nuinũ haskakiri yukakubaĩkinã. Mĩ haska hiwei pepakĩ uĩmaya hawẽ pepawẽ mia merabewakĩ hawara sharabu mĩ ma benuima mia ana inãshanikiki.

⁷ Ha mabu mĩ hayaimarã, hawama keska mĩ hayaimaki. Hakia ha binumakĩ txipu mirima ana mia inãtiruki.

^8-9 Nukurã, nũ dama kaĩshinaki, hawa unãmarã. Nukũ shenipabu uatiã hiwekubiranibu miyui nĩkakĩ nukũ hutxiburi yukakĩ habias ẽ miki txaniai miãri mĩ tapĩtiruki.

¹⁰ Nukũ shenipabu ma mawabianibũ hatũ hãtxa nĩkakĩ itxapa mĩ tapĩkubaĩtiruki.

¹¹ Hanira hene kesha anu ha basi betsa shatxiwã hukuĩ ewamiski.

¹² Hakia kaniriama tsuã meshteamabia hene netsuaya hawaira shanamiski.

¹³ Haska keskai huni txakabubũ Deuskiri ana shinãma ha basi betsa shatxiwã hene hayamakẽ shanamis keskai hatũ shinã benumisbuki.

¹⁴ Harakirira shinãkĩ mestẽwãkatsis ibiamisburã, babuhairabuki, basnẽ purũ hawẽ yumẽ babuhaira beshemis keskaburã.

¹⁵ Tsuabura unanuma hiwekĩ mestẽwãkatsis ibiai hawa kushipa hayabumaki, basnẽ purũ yumẽ beshea kushipama keskaburã.

^16-17 Huni txakabuburã, basi hemaĩtĩ anu hukuĩ beshekaini barĩ yume wa hawẽ tapũ txaipa mishkiki beshebiaibũ

¹⁸ tsuara hushũ ha basi hanua meshashina tsuã unãtirumaki.

¹⁹ Haska keskai huni txakabubu hamapai dasibi hayabiashina keyumiski. Hakia hawẽ shãtukũ basi betsa ana benemis keskai huni txakabu betsaburi ana hiwetiruki.

²⁰ Deusũnã, yurabũ hawa txakabuwaisbuma merabewakĩ hawa hatu heneismaki. Hakia hunibu txakaburã, hawa hatu merabewakĩ benimawaismaki.

²¹ Hamẽ miarã, Deusũ ana mia benima inãkĩ mia usãmakĩ sai sai imashanikiki.

²² Hakia miki sinatamisbu Deusũ hatu dakewakĩ ha huni txakabu hawenabube hiwea yamawashanikiki”, akaya