Jó 41 - Kaxinawá Bíblia (BR)

¹ Ha kape pubẽ itamamahaira hawẽ kena tsatsakapetãwãkiri shinãhairawe. Sheamati ewapawẽ sheamakĩ mĩ bitirumẽ? Dispiwẽ hawẽ hana mĩ neshatirumẽ?

² Hawẽ dekĩ shui dabe anu dispi mistubaĩ mĩ neshatirumẽ? Mane betãtiwẽ hawẽ kui mĩ betãtirumẽ?

³ Hawẽ daewati hãtxawẽ hau mĩ hawẽ nuinũ tsatsakapetãwanẽ mia ea akĩ yukatiru mĩ shinaĩ?

⁴ Hawẽ hiwea dasibi mĩ dayaru escravo hau ikũkaĩshanũ mĩ habe yubakatiru mĩ shinaĩ? Haskatimahairaki!

⁵ Isa pishtabe mĩ beyusmis keskai ha tsatsakapetãwãbe mĩ beyus shanai? Mĩ aĩbu bakebube hau habe beyusnũbũ mĩ hatu neshashũshanai? Mĩ haska watirumahairaki!

⁶ Piti inananaĩ biananãmisbu hiwe anu tsatsakapetãwã iyua hati hawẽ karuwẽ taea binũ ika ibube ha itirubumẽ? Hatu inãkĩ hawẽ yura mĩ meshte meshte atirumẽ? Pubẽhairakẽ mĩ haska watirumahairaki!

⁷ Pia kuĩ itxapawẽ hawẽ bitxi pesakĩ ukeri kaĩmakĩ mĩ teshũ wãtirumẽ? Hawẽ bushkaki hashiwẽ mĩ txatxitirumẽ? Mĩ atirumahairaki!

⁸ Atxinũ, iwanã, mĩ mamepia hawẽ kushipawẽ mia binukĩ maemashanikiki, mia isĩ tenemakinã. Hanushũ mĩ ana metirumahairaki.

⁹ Tsuabũra tsatsakapetãwã hawẽ yura uĩ besti date paepai shinanẽtirubuki.

¹⁰ Tsuãra tsatsakapetãwã bestẽ wãkĩ betxima sinatahairaya tsua ha bebũ katirumahairaki, binubaunirã. Ea Deus kushipahaira dasibi binuatũ besti ẽ binutiruki.

¹¹ Dasibi nai namã haya enaski. Haskawẽ taeshũ haska betxipaikĩ ẽ amiskiri tsuãra ea txitetirumaki.

¹² Tsatsakapetãwã hawẽ pabu tibi inũ hawẽ yura kushipahaira yuinaka betsã binuamawẽ taea ẽ hakiri yui henetirumaki.

¹³ Hawẽ bitxi shaka keshtuhaira txatxikĩ tsuã pesatirumẽ? Hawẽ bitxi kushipahaira babuma tsuã dashpetirumẽ?

¹⁴ Hawẽ deta txaipa sheta itxapa mapua mesehaira tsuã hashpa watirumẽ?

¹⁵ Hawẽ yura shaka tsami keku dakabaina kushihaira mishki keskaki.

¹⁶ Hawẽ shaka tsamiarã, hanus kekubaina niwe hikikaĩtirumaki.

¹⁷ Ha hawẽ shaka tsami mestẽhairabainawẽ taeshũ tsuã besha wakĩ pashkatirumaki.

¹⁸ Hawẽ hui aũ aũ iki kana bakai keskamiski. Hawẽ beru txashahaira tashipa bari tashnikirani txashamis keskaki.

¹⁹ Hawẽ dekĩ anua txi here kaĩ dekẽ bishi bishi imiski.

²⁰ Hawẽ dekĩ anua kuĩ kaĩmiski, kẽti pitxã kukatsa iki kuĩ puamis keskairã.

²¹ Hawẽ hashpa anua txi here shũ akĩ tsiste keti wamiski.

²² Hawẽ teshu kushipahairawẽ taea dasibi ha bebũ mapua datehairamisbuki.

²³ Hawẽ yura nami tibi hawa babu hayama dasibi kushihairaki, mane ferro payua keska tsuã txatxikĩ pesatiruma keskarã.

²⁴ Hawẽ huĩti mãkã keska kushihairaki, mishki deneti keskarã.

²⁵ Tsatsakapetãwã benikĩ hatu datea haki mesei yushibubu date paepai pashamisbuki.

²⁶ Nupe txaipa kenuhaira inũ, hashi kenuhaira inũ, pia kuĩ hawẽ debu mane kenuhaira denetamea inũ, detenameti betsa dardo habu sharabuwẽ tsuã tenãtirumaki.

²⁷ Hatũ shinanã, mane ferrorã, tawa shana keska inũ mane bronze hi txapui keskakẽ tsatsakapetãwã hatiki dateismahairaki.

²⁸ Pia kuĩwẽ tsakabiabu hawẽ datei pashatirumaki. Mãkã tũku haki puta puta abiabu hawẽ dateama basi shana puta puta akaibu keska shinãmiski.

²⁹ Binu ewapa kushipawẽ hatu makush makush aka tawa shanawẽ hatu kusha kusha aka keska inũ txatxiti haki putabu hawẽ hui nĩkai hawa dateama usãmiski.

³⁰ Hawẽ nuta shakawẽ pupus anu sharakaĩkĩ bai tapĩbaĩkĩ tsispubaĩmiski.

³¹ Hawẽ yura itamamawẽ taea ianẽwã nua merã hikikaĩkinã, kẽti kukatsa ikai keskai inũ dau sheniya kapamana buspuai keska wabaĩmiski.

³² Hanua hene shatebaina hatxũ hene betxũkaini hawẽ betxũ hushupahaira henebaina bu hushupa niwe shũku ikaĩkĩ pexa wabaina keskamiski.

³³ Mai hirabi anua tsatsakapetãwã keska yuinaka betsa hayamaki. Hau tsuaki date taskayamashanũ ẽ dami waniki.

³⁴ Yuinaka betsa pianã mesebia dasibi hau haki dateshanũbũ hatũ shanẽ ibu wakĩ yuinaka dasibi ẽ binumaniki”, aka