Jó 40 - Kaxinawá Bíblia (BR)

^1-2 Senhor Deusũ Jó ana yuikubaĩkĩ: “Mianã, ẽ Deus kushipahaira dasibi binuatũ haska eã betxipaikĩ ẽ amis nĩkamas ana ea pewakĩ mĩ ea ana txitekatsis ikai?” aka

^3-4 Jó hawa yuitiruma unãshubira yuikĩ: “Ẽ hawamahairawẽ taeshũ ẽ mia hawa ana hãtxa watirumahairaki.

⁵ Ẽ haibuaibu ma ẽ hatu dabeki yuikubaĩshinaki. Ana hãtxa betsa yuikĩ ẽ mia hawa yuitirumaki”, aka

Hawẽ kushipa Deusũ Jó shabakabi ana unãmanikiaki, na hãtxarã

⁶ hanua niwe kushipa shubi shubi ikai anushũ hãtxa wakĩ Senhor Deusũ Jó ana yuikĩ:

⁷ “Natiã haska mĩ kushipamis ea uĩmariwe, na yukati tibi ẽ mia yukai ea kemakinã.

⁸ Miã ea txitekinã, kanekĩ ẽ txakabuwaima miã mĩ ea yuiai? Hanua mia ikirã, dasibibu bebũ hawa txakabuwaisma mĩ kaĩkatsis ikai?

⁹ Miarã, mĩ kushipa hayamẽ, ea ẽ Deus kushipa haya keskarã? Mĩ huirã, ena keskamẽ, kana tĩ ikaĩkainai dẽke ikainai keskarã?

¹⁰ Shanẽ ibukĩ kushipa sawea keskai kushipai hawẽruai txasha txasha iki keskawẽ yabukuwe.

¹¹ Ha ibubis kẽkubainaibu dasibi hatu uĩ hatuki sinatakĩ babu wakĩ hatu dake wawe.

¹² Tsuabura ibubis keĩ hãtxamisbu hatu uĩ bestikĩ di akawakĩ hatu beshtewe. Hanira hunibu txakabu mĩ hatuki nukuairã, hatu txusha keska wakĩ dake wakĩ hatu beshtewe.

¹³ Mai anu maiwati uke merãhaira anu hatu bitxikĩ bepuwe, ha mawaburã.

¹⁴ Mĩ haska waya, ‘Mĩ kushipawẽ mĩ ibubis maematã meketiruki’, akĩ eã ẽ mia unãshanaii”, atã

¹⁵ ana Deusũ yuikĩ: “Yuinaka itamamahaira Beemotekiri shinãwẽ. Yuinaka Beemote inũ mia ẽ matu dami waniki. Habunã, ina awa keskakĩ basi besti pikubaĩmisbuki.

¹⁶ Kushipahaira hawẽ kati nami inũ hawẽ pubi namirã, babumahairaki.

¹⁷ Hawẽ kate hinarã, txarishki, kusha hi keskarã. Hawẽ kishi punu hawẽ taeki tsamiakeakea kushipahairaki.

¹⁸ Hawẽ shau tibi mane bronze shãkiã keska inũ hawẽ kishi inũ hawẽ pũyã mane kushipa ferro keska kushipahairaki.

¹⁹ Ha yuinaka Beemote dami wakĩ dasibi yuinaka betsa ẽ hatu binumakĩ keyuniki. Eã ẽ dami waniwẽ taeshũ eã besti tenãkĩ ẽ yamawatiruki.

²⁰ Mati matipa anu hanu yuinaka betsa pianãbu hiwea beyusbiamisbukẽ habianushũri basi hukuaĩ yuinaka Beemote beshũ pikubaĩmisbuki.

²¹ Ha inũ, hi betsa utapã namã dakai inũ iã kesha tawa anu hunea manimisbuki.

²² Pashku kesha hi inũ hi betsa utapãri shukua mapubauna anu utamisbuki.

²³ Hene Jordão bai matai kushibiranaya hawa dateisbumaki. Hatũ dekĩ anu hene kesubiakẽ unanuma mapumisbuki.

²⁴ Hatũ beru tsekanũ, iwanã, tsuã hatu atxitirumẽ? Hatũ dekĩ anu tsuã hatu deuwatirumẽ? Tsuã haska watirumahairaki.