Jó 4 - Kaxinawá Bíblia (BR)

Hawẽ haibu Elifazĩ Jó merabewanũ ishũ hãtxa wanikiaki, na hãtxarã

^1-2 hanushũ huni betsa Temã anua Elifazĩ Jó haskaya kemakĩ yuikĩ: “Jó, txanima tsuara mibe hãtxanũ ika hushũ mia bika watiruki. Hakia mĩ hãtxai nũ mia nĩkai tsuã nũ ana tenetirumaki. Mia yuinũ nĩkawe.

³ Haska miki nukuriamarã, tsuabura hatũ shinã babuaibu yusĩkĩ merabewakĩ mĩ hatu kushipa wakubainimaki.

⁴ Txakabu wakĩ kane taewaibu pewakĩ benimawakĩ mĩ hatu mestẽwãkubainimaki.

⁵ Uatiã datema ibiamis natiã miari isĩ tenei hawẽ taea datekĩ mĩ kushipa mĩ ma benuamẽ?

⁶ Haskai Deus duawai pe besti hiwekĩ txakabu danãkubaini mĩ txĩtuãma ikũkaĩmis mĩ txanimisrã, ikis ana haskama huĩti babui mĩ ma dateai?

⁷ Eska keska mia yuinũ nĩkawe. Huni pepa bestitxai hawẽ hamapai Deusũ mebĩkĩ yamawairã, mĩ ma uinimẽ? Shinãwẽ. Deusũ haska waismaki.

⁸ Eã eskaibu ẽ uĩmisrã, tsuabura pubẽbũ txakabu tapĩtã txakabuwakubaĩmisbũ habias txakabuwẽ hatũ kupiti bimisbuki.

⁹ Ha yurabu haskaburã, Deus hatuki sinatahairakĩ hatu shũ akĩ Deusũ hatu yamahairawamiski.

¹⁰ Inu pubeĩ tekerẽ tekerẽ ikai keskakĩ huni txakabubu hãtxa txakabumisbu inu sheta teke teke aka keska wakĩ nesewakĩ Deusũ hatu kupimiski.

¹¹ Inawã yuinaka hania atxishũ pitima mawaya hatũ bakeburi sa iki keyumiski. Huni txakabũ bakebu habiaskariabaĩshãkanikiki.

¹² Unãshubira hãtxa betsa ea anu hikiai basheshẽ ea yuiaibu ẽ nĩkashinaki.

¹³ Meshu merã yurabu ushabu hanua ea usharia ẽ namatxakai uĩ

¹⁴ ẽ datehairaya dasibi ẽ yura ea saki saki imashinaki.

¹⁵ Niwe shũku ibirãkĩ ẽ besu ea matsi bebe akaya ẽ dani tubisi keyutã ẽ datehairaya

¹⁶ ea bebũ dami keska nia uĩbiakĩ hawẽ besu ẽ uĩ pewama dasibi hawa yuiama peshaira nia basheshẽ hãtxai ẽ nĩkaya

¹⁷ ea yuikĩ: ‘Huni pepahairakinã, Deusrã, binutirumaki. Meribi has pepakinã, Deusũ hatu dami wani habũ Deus binutirubumariki.

¹⁸ Ibubis hawẽ tsumabũ Deusũ hau hatukiri pe shinanũ, iwanã, hamẽ ea atirubuki. Habiaskari wakĩ hawẽ nai tsumabũ kanetiruburi Deusũ unaĩkiki.

¹⁹ Mai mishpu mamaki mapu hiwe wamisbu keska yurabu babuhairaki. Masã txusha keska wakĩ yuraburi tenãkĩ Deusũ hatu yamawashanikiki.

²⁰ Penama hatu detetiashũ bari kaya hatu yamawakĩ tsuã ana hatu shinãtimawakĩ yamawamisbuki.

²¹ Hatũ hiwea keyuirã, yumẽ meshte meshte aka keskaki, hawa unanepa hãtxa tapĩriama mawairã’, ea wa ẽ nĩkashinaki”, atã