Jó 30 - Kaxinawá Bíblia (BR)

¹ Na haska betsa betsapa ẽ teneayarã, ikis huni berunã eki kashetã ea usãkanikiki. Na habu eki kasheaibũ ibubu txikishbuwẽ taeshũ uatiã ẽ hatu danãkubainiki, kamã keskabuwẽ taeshũ ẽ txashuwã mirima hau ea mekeshũyamanũbunã.

^2-3 Hatũ epabu txikishi dayaisbumawẽ taea hatũ mekẽnẽ ea hawa dayashunama ipaunibuki. Hawa piti hayama bunihairai habu mapukubaini hanu tsua hiweabuma anushũ meshu merã hi tapũ shanabiakẽ pikĩ sheru sheru aki inũ

⁴ hi pusi mukabiakẽ betseshũ tapũ betsa betsapa pukĩkĩ betsetã pikubainibuki.

⁵ Haburã, huni yumetsubu keska wakĩ hatuki sinatakĩ hatu danãkĩ hau txai bunũbũ hatu txibaĩ sai sai ikubaĩkĩ mae tibi anushũ hatu putakubainabu pashai

⁶ mananã mashash kini anu inũ mashash ewapabu mania anu hiwekubainibuki.

⁷ Habu haskai nuitapahairai txaka musha namã hanus itxa mania kashakubainibuki.

⁸ Ha yurabu hamẽburã, tsuã bakeki, iwanã, hatu unãbuma dasibibũ danãkĩ txai hatu nitxĩkubainibuki.

⁹ Hakia ikis hatũ bakebũ ea dapishũ ea yuaĩ eki kashekanikiki.

¹⁰ Ẽ besuki kemu mitxukĩ ea danãhairakĩ ana eki kemakatsi ikama benãtashũ ea daĩbaĩkanikiki.

¹¹ Deusũ ẽ kushipa mebĩkĩ ea dakewaya tsuã hawa ea ana nĩkakatsi ikama eki ana meseabumaki.

¹² Habũ ea danaĩbu itxapa beshũ ea hawẽ tĩ akatsi birũwãtã txakabuwakĩ ea tenãkatsis ikanikiki.

¹³ Ẽ shushakatsis ibiaya ea yamawanũ, iwanã, ẽ hanu kai anu eki bai kebeãbuki, tsuã ea hatu nemashunamarã.

¹⁴ Maewã mishki kenebaunibu namakis purekĩ shui wanibu anu hikibirã eanu butui ishtxubirani mesebirã ea datekanikiki.

¹⁵ Mesehairai ẽ datekũkainaii. Ekiri ibubis pe ẽ shinãkubainima ana ẽ haskamaki. Unanuma ẽ pe hiwebiakũkainima nai kuĩ dunua yamakaĩmis keskai ẽ ana haskatã hiweamaki.

¹⁶ Isinĩ ea aka tenei nuitapai ẽ ana hiwekatsi ikamaki.

¹⁷ Isĩ tenetxakayamai ẽ shauki dikabis hikishũ ea isĩwãkĩ heneama meshu tibi ẽ bika tenekũkainaii.

¹⁸ Deusũ hawẽ kushipawẽ ẽ tariyabi ea tetsũshũ

¹⁹ txi mapu inũ mai mishpu keska ea wakĩ pupus anu ea putaimaki.

²⁰ Deusuũ, ẽ mia merabewati yukabia ea merabewakĩ mĩ ea hawa kemamaki. Ẽ mia ea a txakayamabia mĩ ea hawa nĩkamaki.

²¹ Ha dukũ mĩ ea betxipaibiakubainima hakia ikis ea ana betxipaiama mĩ ea itxakawakubainaii.

²² Niwe kushipa keskawẽ ea benikĩ mĩ kushipawẽ ea bini bini akĩ mĩ ea taaii.

²³ Hanu mawa bushanaibu anu mĩ ea iyukatsis ikai ẽ unaiĩ, dasibi mawabu hanu hatu mekekĩ mĩ iyumis anurã.

²⁴ Ha nuitapai hawa hayabumarã, eanã, ẽ hatu merabewama ikimamẽ?

²⁵ Nuitapai hawara bika teneaibu inũ habu hawa hayabumawẽ taea hatu uĩ ẽ hatuya kashama ikimamẽ?

²⁶ Ẽ haska hatu merabewakubainimawẽ taea ẽ benimati manakabiaya natiã haskawẽ mĩ ea kupia ẽ nuitapakũkainaii.

²⁷ Ẽ huĩtinĩ bika tenei hawa huĩrukuãma shaba tibi bika betsa betsapa besti ẽ mekubainaii.

²⁸ Bari txashama anu ẽ ana hiweama isĩ txakabũ ea atxia ana unanumama punu nuka bestia dasibibu bebũshũ “Ea merabewakãwẽ”, iwanã, ẽ hatu yukakubainaii.

²⁹ Ea nuitapairã, yuinaka kamã inu inũ avestruzrã, ẽ haibu inũ ẽ betsabu keska ẽ hatu shinaiĩ.

³⁰ Ẽ bitxi ana meshui yuna tenei ẽ yura shana bakakũkainaya

³¹ ha mimawati harpa inũ teperewewẽ ana benimama isĩ pae tenekĩ ẽ kasha besti kaiaĩ ẽ nĩkakubainaii.