Jó 3 - Kaxinawá Bíblia (BR)

Hawẽ hiwea txakabuhaira Jó tenekubaĩshinakiri hatu yui ha inikiaki, na hãtxarã

^1-2 7 shaba inũ meshu habiatiri binuaya Jó hãtxai taekĩ hanu kaini shinaĩ hãtxa txakabukĩ yuikĩ:

³ “Ha meshu merã ẽ ewa inũ ẽ epã ea bikĩ nanenibu txakabuhairaki. Ha shabatiã ẽ hanu kaini txakabuhairariki.

⁴ Ha shaba ẽ kaiaĩtianã, Deusũ hawa ekiri shinãma meshu besti wakẽ penama ikeaniki.

⁵ Ha shaba ẽ kaiaĩtiã meshuhairatũ shaba bepukĩ keyua nai kuĩ meshuhairatũ bepukĩ ushe hunei meshukẽ dasibibu datehairakeanibuki.

⁶ Ha meshu merã ẽ ewa inũ ẽ epã ea bikĩ naneaibũ kini meshuhaira anu ha meshu benua pe ikeaniki. Haskakẽ ha hanu ẽ kaini calendario hawẽ dia inũ, hawẽ mes inũ, hawẽ ano hawa tanabuma inibu pe iriakeanaii.

⁷ Hanu ẽ kaini shabatiã hau hanu besi benimai sai sai iyamanũbũ, ishũ ẽ shinaiĩ.

⁸ Tsatsakapetãwã ewapa mukayabũ hatũ kushipawẽ yunumisbũ hanu ẽ kaiaĩtiã habũ yupuniburã, pe ikeanaii.

⁹ Pena kemaya pena bishi txashaya bari tashni hawẽruai taeaya hanu ẽ kaiaĩ tsuã ea datxukĩ uiãma ini pe ikeanaii.

¹⁰ Txakabu mekĩ uĩ ẽ isĩ tenehairai ẽ kaiaĩ ea nemama iniwẽ taeshũ ha meshu merã ẽ kaini txakabuhairaki.

¹¹ Haskai ẽ mawama inimẽ, ẽ ewã bake nãti meranua kasmai ẽ kaĩ taeirã?

¹² Hanua ẽ kaiaĩ, haskakĩ aĩbu betsã hawẽ dãtũku dabewẽ ea kebẽtã ea binimẽ? Haskakĩ ẽ ewã hawẽ txutxu amakubaĩkĩ ea yume wanimẽ?

^13-15 Hamẽ kaĩtãs ẽ mawayamarã, shanẽ ibuhairabu inũ hatũ merabewanikabubetã mishki hiwe ewapa keyatapa hatu wamanibu anu hatu maiwamisbu anu inũ, yununikabu betsã hatũ mishki hiwe ewapa hawẽrua watã ouro mane inũ prata mane arukĩ mata watã hatu maiwamisbube ẽ hatube daka unanuma huĩrukuĩ pepakeanaii.

¹⁶ Aĩbu bake kaũma inũ hawẽ ewã bake nãti anua kaĩriama ibubis mawa maiwa keska wakĩ eari kaĩtã ẽ hiwebiakẽ haskakĩ ẽ ibuã ea maiwama inimẽ?

¹⁷ Mawa hanu hatu mai wamisbu anu ha pubẽbũ ana hatu bika watirubuma inũ nuitapai hĩ imisbu ana hawama huĩrukũtirubuki.

¹⁸ Habiaskariai yura betsa atxibaĩ hatu dayamakĩ yunutxakayamisbu ma hatu tenãburã, ana hatũ dayamanikã hui sai ikaibu hawa ana hatu nĩkama pes dakashãkanikiki.

¹⁹ Habianuri mabuyanibu inũ nuitapanibu ana haskama dasibi habiaska dabes ishãkanikiki, mawairã. Ha inũ, huni betsã hatu tsuma wakĩ escravo wanibu henebaini ana hatũ tsumama ishãkanikiki.

²⁰ Nuitapai yumeshanaibu haskakĩ Deusũ shaba uĩmakĩ kaĩmamismẽ? Huĩti nishmai hiwekũkaĩshanai haskakĩ Deusũ hatu hiwemamismẽ?

^21-22 Haska keskabu mawa manairã, pei itxapa hanira hunea bena txakayamamis keskabuki. Hakia ha huni benimairã, atimas mawaitiã haska hãtxamis uĩ benimakubaĩmisbuki.

²³ Haskakĩ habu Deusũ baiwẽ hiwekatsi ikaibu Deusũ hatu bika tenemakĩ hawẽ kushipawẽ hatu kebeãmẽ, hawauma wakinã?

²⁴ Ẽ isĩ tenehairai mei ẽ eẽ ikairã, txanima ẽ piti keskaki. Ẽ isĩ tenehairai hãtxai ẽ ari ari ikairã, harã, ẽ nushuti keskaki.

²⁵ Dasibibu hawarawẽ ẽ mesemis inũ ẽ hawẽ datehairamis ma habu beshũ ea atxiaki.

²⁶ Pes ẽ huĩrukũtirumaki. Shaba inũ meshu merã dabekea akeakei unanuma ẽ dakatirumaki”, hatu waya