Jó 29 - Kaxinawá Bíblia (BR)

Hawẽ haibuaibũ Jó shinã pewanũ ika ibiaibũ Jó habũ hãtxa ana nĩkama inikiaki, na hãtxarã

^1-2 Jó ana hatu yuikĩ: “Uatiã Deusũ ea mekeshũ uĩmakubainima keska ana ea uĩmapainũ haska besti ẽ shinaiĩ.

³ Deusũ hawẽ bai shabakabi ea washunaya meshubiakẽ hawa dateama ẽ hanu kakũkainimaki.

^4-5 Ma ẽ huni ewa ẽ yura kushipakẽ Deus kushipahaira dasibi binuatũ ea kesheshũ ẽ bakebu ebe bukubainaibũ Deusũ nuku merabewakĩ mekekubainimaki.

⁶ Ina awa txutxu inũ cabra txutxu itxapa nũ hayakũkainimaki. Ha inũ, oliva bimi tsinitã hawẽ sheni itxapahaira nũ hayaimaki.

⁷ Nukũ mae anu hanu shanẽ ibubu itxamisbu hiwe ewapa anu hikia ẽ tsaukẽ

⁸ dasibibũ ea uĩkĩ ea kẽwaĩ berunãbu hamauri shekeaibũ hanua huni ewa anibubu benia mapuabũ

⁹ huni mabu itxapayabu hau hãtxayamanũbũ metutiwẽ kesha timashũ hatu uĩmabu hãtxama pes mapuabũ

¹⁰ hanua shanẽ ibubu ana hãtxai bis ikama unãshubira besti hãtxakubainimabuki, hatũ kesha hana hãtimaka bestiarã.

^11-12 Bakeishta ibuumabu inũ nuitapaibu tsuã hatu merabewaisma eã piti inũ tariwẽ ẽ hatu merabewakubainaiwẽ taeshũ tsuãra ea uĩkĩ inũ ekiri nĩkakĩ ewẽ benimai ekiri pe yui hãtxakĩ: ‘Harã, huni pepaki’, iki txanikubainimabuki.

¹³ Hawa hayama bika tenetxakayamakubainaibu ẽ hatu merabewakubaina ea kẽwãkĩ: ‘Mĩ huni peki’, akĩ ea yuikubainimabuki. Beneumaburi ẽ hatu merabewaya ewẽ benimakubainimabuki.

¹⁴ Ẽ hãtxawẽ ẽ tsua parãma inũ, ẽ yunuti kushipa pepa bestiwẽ taeshũ ea duawabu haska uĩ ẽ hiwekũkainimaki.

¹⁵ Ẽ berurã, bekũbũ beru keska ẽ ikũkainimaki. Hutekeya haska nitirubuma keskari eari ẽ ikũkainimaki.

¹⁶ Hawa hayama yumaĩbu ẽ hatũ epa keska ikũkainimaki. Hanua nawa betsabu txaikea beaibu hatu mekei ẽ hatũ merabenã ikũkainimaki.

¹⁷ Huni txakabubu kushipai ha akĩ hatu itxakawaibu hau ana hatu itxakawayamanũbũ hatũ kushipa ẽ hatu mepãmakubainimaki.

^18-20 ‘Hene kesha hi bananibu meshu merã hawẽ mebi nibipã metxa wamis keskai ẽ yura hawẽruakũkaini ẽ kushipa ana babuama inũ hati bari ẽ haya tsuã tanatiruma hiwekũkaini enabu anua anibuhairakũkaini unanuma ẽ mawashanaii’, iwanã, ẽ shinãkubainimaki.

²¹ Ẽ yusĩti hãtxa pes tsaushũ ea nĩkanũ itã dasibibũ ea manakubainimabuki.

^22-23 Ẽ hãtxa ẽ hatu yusĩkĩ meneaya dasibibũ betxipaikĩ tsuã hawa ea kemama ikubainimabuki. Hawara ẽ yuiai itxapa nĩka pewanũ ika bari kuaya ui manamisbu keskakĩ ẽ hãtxa tibi nĩka pewanũ ika ikubainimabuki.

²⁴ Hatu hãtxa wai ẽ benimaya habuã ea beiskĩ heneama ẽ hatu usã teneshũ uiã atimas ea ikũwãkubainimabuki.

²⁵ Shanẽ ibuhaira keskakĩ hatũ detenamenikabu shukua mapuabu bebũshũ yunukubaĩmis keskakĩ habũ hau hawara ea ashũkubainũbũ haska ẽ betxipaiai ẽ hatu yunukubainimaki, shanẽ ibu keskakinã. Ha inũ, hatũ huĩti nishmahairai punu nukabu hatu daewakĩ ẽ hatu merabewakubainimaki.