Jeremias 39 - Kaxinawá Bíblia (BR)

Atimas Jerusalém atxinibukiaki, na hãtxarã

¹ Judá enabu mai pakea anu Zedequias shanẽ ibuhaira ikũkaini ushe 10 inũ ano 9 kaitiã Jerusalém ana atxikĩ hatu dete keyunũ ika Nabucodonosorĩ hawẽ detenamenikabu dasibi iwei kematã Jerusalém hirabi keshebaũtã mae benãta hatũ tari hiwe pũtebaũshĩshũ unãshubira hatu atxikubainũ, iwanã, mishki kenebaunibu anu mapushũ hatu detekĩ hatiritũ pia itxapa bishku bishku akubainaibũ ushe itxapa kaya

² Zedequias shanẽ ibuhairatũ hatu yunukubainaya shaba 9 inũ, ushe 4 inũ, ano 11 kaitiã hanu Caldéia nawa detenamenikabu atimas Jerusalém maewã anu hiki taebirã

³ Senhor Deus kẽwãti hiwe dapi hanu hikiti kene shui namakis anu Babilônia shanẽ ibuhairatũ hawẽ shanẽ ibu beshmasbu dasibi hanu manitã shanẽ ibui tsaushũ hatu yunukĩ taewabaini hati inibukiaki, hatũ shanẽ ibu tibirã, Nergal-Sarezer inũ, Sangar-Nebo inũ, Sarsequim inũ, Rabe-Saris inũ, Rabe-Mague shanẽ ibuhairabe tsaumis inũ, shanẽ ibu yununika betsa Nergal-Sarezer betsarã.

⁴ Ha Caldéia nawabu haskai hiki taeaibu uĩtã Zedequias inũ hawẽ detenamenikabu dasibi pashai meshu merã kene dabe namakis beputi shui betsa beputiya bepẽtã shanẽ ibũ bai anu hanu hua pepa hawẽrua banamisbu baiwẽ Caldéia nawabu hatu hune dũkebaini Hene Jordão napãpakiri bai kãwẽ kushibaini pashaibũ

^5-6 hakia Zedequias hune kainai Caldéia nawabũ betxitã txibaĩ kushiriabaini Jericó napãpa anu haki nukutã Zedequias atxitã mai pakea Hamate anu mae betsa Ribla anu Babilônia shanẽ ibuhaira anu iyuabu hanushũ hawẽ kupiti Nabucodonosorĩ Zedequias yuitã habianushũri Zedequiasĩ berubi hawẽ huni bakebu inũ Judá enabu shanẽ ibubũ enabu dasibi hau tesẽ keyunũbũ Nabucodonosorĩ hatu yunua hatu tesẽ keyutã

⁷ Zedequiasri hawẽ beru tsekashũ mane dispi txiwetameyawẽ meneshtã Babilônia anu hau iyunũbũ hatu yunua hawẽ beru tsekashũ mane dispi txiwetameyawẽ menesh dabetã Babilônia anu Zedequias iyuaibũ

⁸ hanushũ Caldéia nawabũ Zedequias shanẽ ibuhairatũ hiwe hawẽrua inũ hatũ hiwe dasibi Caldéia nawabũ txiwẽ kuakĩ keyutã, Jerusalém mishki kenebaunibu berã keyui dayahairakubaĩkĩ atimas berãkĩ keyuabũ

⁹ hanushũ Babilônia shanẽ ibuhaira mekenikabu yununika hawẽ kena Nebuzaradãnẽ hawẽ detenamenikabu yunua ma itxapa hatu iyubiaimabũ hatiri hatu teshewabainimabu hawẽ henekĩ hatũri hatu iyukĩ habũ Jerusalém anushũ Caldéia nawabu hatũ yura hatu inaĩmaburi Jerusalém anu hiweaburi hirabi Babilônia anu hau hatu iyunũbũ hatu yunua hawẽ detenamenikabũ hatu iyuaibũ

¹⁰ Judá enabũ mai pakea anu hatiri hawa hayamahaira nuitapaibu bashitã uva nishi bai inũ yunu bai hau dayakĩ mekekubaĩshanũbũ ibuwamakĩ Nebuzaradãnẽ hatu yunubainikiaki.

Nabucodonosorĩ Jeremias pe duawanikiaki, na hãtxarã

¹¹ Hawẽ mae anu kai txĩtũriama Jeremiaskiri pe shinãkĩ Babilônia shanẽ ibuhaira Nabucodonosorĩ hawẽ mekenikabu yununika Nebuzaradã yunukĩ yuikĩ:

¹² “Ha Jeremiasrã, hawa itxakawama mekekĩ duawakĩ haskara ikatsis ikĩ mia yukai keska ashũshãwẽ”, abaini kaya

¹³ hanushũ Nebuzaradã inũ, Babilônia shanẽ ibuhairabe tsaushũ yununika Nebusazbã inũ, Rabe-Saris inũ, Nergal-Sarezer inũ, Rabe-Mague shanẽ ibu beshmas betsa betsapabũ

¹⁴ shanẽ ibũ hiwe mekenikabũ hemaĩtĩ kenebaunibu anua Jeremias hau tashnimanũbũ hatu yunuabu bushũ Jeremias kaĩmatã iweabu hawẽ hiwe anu iyushũ hau mekekubaĩshanũ Safãnẽ baba Aicãonẽ huni bake Gedalias yunuabu hawẽ hiwe anu Gedaliasĩ Jeremias iyuimashũ mekekubainaya yurã kaiã hawauma nuitapaibube Jeremias hiweyunikaki.