Jeremias 36 - Kaxinawá Bíblia (BR)

Jeremiasĩ hãtxa Baruquẽ keneshũtã Templo hiwe hemaĩtĩ anushũ hatu yuishunikiaki, na hãtxarã

¹ Judá enabu yunui Josiasĩ huni bake Jeoaquim shanẽ ibuhairai ma 4 ano kaitiã Senhor Deusũ Jeremias yunukĩ yuikĩ:

² “Haki keneti una sebi biwe. Ha bitãshũ Israelĩ enabukiri inũ, Judá enabukiri inũ, nawa betsa betsapa shukuabu tibikiri ẽ hãtxa dasibi ẽ mia yuikubainima keneriwe, Josias shanẽ ibuhairaitiã mibe hãtxai taekĩ ẽ mia yui taewabiranima kenetiyashũ akubaĩkĩ natiã ẽ mia yuiriashina kene keyukinã.

³ Judá enabu anu hatu anu txakabu betsa betsapa ea Senhor Deusũ ẽ hatu yunuti waima ẽ shinãkubainai habũ nĩkaimashũ shinãriakubaĩkĩ hatũ shinã betsa wakĩ hatũ txakabu henekĩ shinã betsa watirubumẽkaĩ. Habũ haska wakĩ hatũ shinã txakabu tibi henekubainaibu hatũ txakabu ẽ hatu buashũshanaii, ana shinãmarã”, aka

⁴ Jeremiasĩ hawẽ keneshunika Neriasĩ huni bake Baruque kenatã yuikĩ: “Haki keneti sebi bibirã hawara Senhor Deusũ ea yuikubiranima ẽ mia yuiai ea keneshũriwe”, aka habiatiãri Baruquẽ Jeremiasĩ yuikubaina keneshũkubaĩkĩ atimas keyushuna

⁵ hanushũ Jeremiasĩ Baruque yunukĩ yuikĩ: “Uĩwẽ. Senhor Deus kẽwãti hiwe hemaĩtĩ anu ka ẽ hikipanã ea nemamisbuki.

⁶ Haskawẽ taea ha shaba betsatiã Jerusalém anu hiweabu inũ Judá enabũ mai pakea anu mae betsa betsapa anu hiweabu habu samakei itxaibutiã Templo hemaĩtĩ anu kashũ hanu itxai beshiãbu dasibibũ Senhor Deusũ hãtxa hau nĩkanũbũ ha ẽ mia yuia una sebiki mĩ kenekubaĩshina hui kushipawẽ hatu ea yuishũshãwẽ.

⁷ Senhor Deusũ hatu kupikatsi hatuki sinatahairakĩ hatu datekĩ mesehairawaiwẽ taeshũ ha yurabu txakabuhairabiakĩ hatũ shinã betsa watã hatũ txakabu henei: ‘Hau ewẽ nuinũ’, ishũ Senhor Deuskiri shinãkĩ yukashãkanimẽkaĩ. Mĩ haska hatu yuishũtiruki”, aka

⁸ haska Deusũ hãtxa yuishunika Jeremiasĩ yunushina Senhor Deusũ hãtxa una sebiki kene keyushĩshũ Neriasĩ bake Baruquẽ hatu yuishunũ ika kashũ

⁹ Judá enabu mai pakea anushũ hatu yunui Josiasĩ huni bake Jeoaquim shanẽ ibuhairai ma 5 ano inũ 9 ushe kaitiã Jerusalém anua inũ mae betsa betsapa anua Templo hemaĩtĩ anu itxa Senhor Deus bebunua samekeaibũ

¹⁰ Templo hemaĩtĩ hikiti shui hawẽ kena “Beputi Bena” ukeria anu kenenika Safãnẽ huni bake Gemariasĩ dĩtu manaũri Baruque mapeketã hanu uĩti shui anu nishũ Jeremiasĩ hãtxa una sebiki kenamashina dasibi yurabu hanu itxai keyushũ nĩkaibu anu hui kushipawẽ Baruquẽ hatu yuishũkubaĩkĩ heneaya

Shanẽ ibuhairatũ yununikabu habias hãtxa Baruquẽ hatu yuishunikiaki, na hãtxarã

¹¹ Senhor Deusũ hãtxa Baruquẽ hatu yuiai Safãnẽ baba Gemariasĩ huni bake Miquéiasĩ nĩka keyubaĩ

¹² shanẽ ibuhairatũ hiwe anu kai keneshunika shanẽ ibũ dĩtu hanu shanẽ ibũ yununikabu inũ, keneshunika Elisama inũ, Semaíasĩ huni bake Delaías inũ, Acborĩ huni bake Elnatã inũ, Safãnẽ huni bake Gemarias inũ, Hananiasĩ huni bake Zedequias inũ, yununika betsabu hanu itxabu anu hikishũ

¹³ dasibi yurã kaiã Baruquẽ hatu yuishunai nĩka keyutãshu Miquéiasĩ hatu yuikĩ keyua

¹⁴ ha una sebi yurabu bebũshũ hatu yuishu hau hatu anuri beshũ hau haburi yuishũriayunũ Baruque iwemakĩ shanẽ ibu betsã Cusi huni bake Selemiasĩ baba Netaniasĩ huni bake Jeudi yunuabu kashũ Neriasĩ bake Baruque yuia una sebi bishũ tsumabaini hatu bebũ Baruque ni tushiaya

¹⁵ habũ yuikĩ: —Tsautã ha una sebi anua ha hãtxa nukuri yuishũwẽ— akabu hanushũ Baruquẽ hatu yuishunai

¹⁶ nĩkai hawẽ datehairai beisinã akeaketã Baruque ana yuikĩ: —Na haska hãtxa dasibi nũ nĩkairã, nukũ shanẽ ibuhaira Jeoaquim yuinũ kawe— iwanã,

¹⁷ habũ Baruque yukakĩ: —Na haska hãtxa kenekinã, haska watã mĩ kene keyushina nuku yuiwe— akabu

¹⁸ Baruquẽ hatu kemakĩ: —Na hãtxa dasibi ibubis Jeremiasĩ ea yuikubaina na una sebiki tintawẽ keneshũkubaĩkĩ atimas ẽ keyushinaki— hatu wa

¹⁹ hanushũ habũ Baruque yuikĩ: —Na haskawẽ taearã, irui mia inũ Jeremias hanira butãkãwẽ, hau tsuã matu unãyamanũbũ huneirã— akabu, hunetanũ ika Baruque kakẽ

Jeremiasĩ hãtxa una sebiki keneshina Jeoaquimnẽ kua keyunikiaki, na hãtxarã

²⁰ shanẽ ibu keneshunika Elisamã dĩtu anu Jeremiasĩ hãtxa una sebi shanẽ ibu beshmasbũ hanabaĩ shanẽ ibuhairaki txanitanũ ika Jeoaquim anu bui hikishũ haska nĩkakãshu dasibi yuiabu

²¹ nĩkatã keneshunika Elisamã dĩtu anua hau ha una sebi bitanũ shanẽ ibuhaira Jeoaquimnẽ Jeudi yunua kashũ bitãshũ shanẽ ibuhaira inũ shanẽ ibu yununika beshmasbu mapubaunabu anushũ Jeremiasĩ hãtxa Jeudĩ hatu yuishũkubainaya

²² ma matsitiã ha ushe 9 kaya dĩtu uke merã mai shãtu anu hanu txi dekẽ kuashũkubaĩmisbu dapi hari shanẽ ibuhaira Jeoaquim tsaukẽ

²³ Jeudĩ hatu yuishũkubaĩkĩ 3 pakea kasmai 4 pakea yui keyuaya Jeoaquimnẽ hawẽ nupewẽ meshteshũ txi anu napua menuaya Jeudĩ ana yuishũkubaina habiaskas wakĩ nupewẽ ana meshteshũ txi anu napukĩ menukubaĩkĩ Jeremiasĩ hãtxa una sebi atimas Jeoaquimnẽ menukĩ yamawakĩ keyuaya

²⁴ shanẽ ibuhaira inũ shanẽ ibu yununika beshmasbũ Jeremiasĩ hãtxa dasibi nĩka keyubiatã haska hawẽ hãtxawẽ dateabuma inũ hawa bika teneamawẽ taeshũ hatũ tari hawa ushniama inibukiaki.

²⁵ Una sebi hau meshtetã kuakĩ haska wayamanũ Elnatã inũ, Delaías inũ, Gemariasĩ nemabiabu Jeoaquimnẽ hawa hatu nĩkamahaira kuakubaĩkĩ keyunikiaki.

²⁶ Hakia Deusũ hãtxa yuishunika Jeremias inũ hawẽ keneshunika Baruque hau atxitanũbũ hawẽ bake Jerameel inũ, Azrielĩ huni bake Seraías inũ, Abdeelĩ huni bake Selemias shanẽ ibuhaira Jeoaquimnẽ hatu yunua bushũ benahairabiabaunabu Jeremias inũ Baruque merabewakĩ Senhor Deusũ hatu hunenikiaki.

Jeremiasĩ ana yuia Baruquẽ kene sebi bena wanikiaki, na hãtxarã

²⁷ Shanẽ ibu Jeoaquimnẽ Jeremiasĩ hãtxa Baruquẽ una sebiki keneshũshina kua keyushĩkẽ Senhor Deusũ Jeremias ana yunukĩ yuikĩ:

²⁸ “Una sebi betsa bitã ana haki kene bena wawe, haska ha dukũ bebũkiri mia keneshũshina Judá enabu shanẽ ibuhaira Jeoaquimnẽ kua keyushina keskari wakinã.

²⁹ Eska hakiri yuikinã: ‘Eska Senhor Deusũ mia ana yuikiki: Na mai pakea anu yurabu inũ inabu yamawakĩ txakabuwanũ ika Babilônia shanẽ ibuhaira hawa teama hushanikiki, mia merabewakĩ Jeremiasĩ mia keneshũbia hawẽ hãtxa nĩkakatsi ikama mĩ haki ha ikĩ nemakĩ hawẽ hãtxa una sebi mĩ kuãshinaki.

³⁰ Mĩ haska washinawẽ taeshũ mia Judá enabu shanẽ ibuhaira Jeoaquim ea Senhor Deusũ mia yuikĩ: Haska mĩ shenipabu Davi shanẽ ibuhairai tsauni anu minabu ana tsauama ikubaĩshãkanikiki. Ha dikabi mĩ mawa mia maiwama mĩ yura mia urẽkĩ putabu barĩ mia kua inũ meshu merã mĩ yura matsiwẽ mĩ txapui keyushanaii.

³¹ Mĩ txakabuwẽ taeshũ mia inũ minabu inũ mĩ dayarubu ẽ mia hatube kupishanaii. Haska bebũkiri ẽ matu banabimabia mã hawa nĩkama ikubiranaibu keska matu inũ Jerusalém anu hiweabu inũ Judá enabu mai pakea anu hiweabuki hamapai txakabu atimapa betsa betsapa ẽ yunukubaĩshanaii’ ”, atã Senhor Deusũ Jeremias ma haska yunuawẽ taeshũ

³² una sebi betsa Jeremiasĩ bishũ hawẽ keneshunika Baruque inãtã Jeremiasĩ ana yuikubaina hawẽ hãtxa Baruquẽ ana keneshũkubaĩkĩ una sebiki ha dukũ keneshina shanẽ ibuhaira Jeoaquimnẽ kuashina keska habias hãtxa kenekĩ keyua ha dikabi hãtxa betsa habias keskari Jeremiasĩ ana yuikĩ txitximakubaina Baruquẽ kenekĩ keyushunikiaki.