Jeremias 23 - Kaxinawá Bíblia (BR)

Hatũ nukũ hiwea merabewai nũ manakai hunũbarikiaki, na hãtxarã

¹ Txanima Senhor Deusũ yuikĩ: “Txashuwã mekenikabũ haskakĩ ẽ txashuwã ea hatu pe mekeshunabuma ẽ txashuwã hanira bui besti dasibaĩmisbu keskai enabu Israelbu hanira bui benumisbuki. Ha txashuwã mekenikabu peirashãkãwã!” iwanã,

² Israelĩ enabu mekenika Senhor Deusũ hawẽ txashuwã uĩshũkĩ mekenikabu hatu yuikĩ: “Enabu meke pewama ubisita wakĩ pasha wakĩ mã hatu nitxĩmaki. Mã haska wakĩ hatu txakabuwakubiranimawẽ taeshũ ẽ matu kupikĩ unãmashanaii. Ea ẽ Senhor Deusũ ẽ hãtxa ẽ mestẽwaiĩ.

³ Hanira mae betsa anu ẽ hatu hari nitxini bunibu anua habu enabu teshe hiweabu ana hatu itxawatã eã kayabis hatũ mai pepa anu ẽ ana hatu txĩtũwãshanaii, hanushũ hau ana hatũ bake pakubaĩshanũbunã.

⁴ Hau ana datei hiweyamakubainũbũ hatũ mekenika tibi watã ẽ hatu mekemashanaii, hau hawa nuitapayamanũbunã. Ea ẽ Senhor Deusũ ẽ hãtxa ẽ mestẽwaiĩ”, itã

⁵ txanima Senhor Deusũ mestẽwãkĩ ana yuikĩ: “Ha shaba betsatiã shanẽ ibu hunũbarikiki, Davĩ baba betsa shanẽ ibuhaira ẽ washanaii, hawẽ mai pakea anua hawẽ yunuti kushipawẽ unanepakĩ hatu yunukĩ parananãma pepas wakubaĩshanikiki.

⁶ Ha shanẽ ibu kaĩkĩ hatu yunukubainaya Judá enabu unanuma pe mekeaibũ ha dikabi Israelĩ enabu unanuma hiwekubaĩshãkanikiki. Ha shanẽ ibu kenakinã, ‘Nukũ Shanẽ Ibu Kushipa Maemanikaki’, akubaĩshãkanikiki”, itã

⁷ txanima Senhor Deusũ ana yuikĩ: “Bari betsatiã ana ekiri datã aki yubakama ishãkanikiki, ‘Senhor Deus hiweatũ hawẽ kenawẽ Israelĩ enabu Egito anua kaĩmabiraniki’, akĩ yuiamarã.

⁸ Ana hariria shinãma hakia Senhor Deus datã akĩ yuikĩ: ‘Nawã mai pakea nortekiria inũ nawã mai pakea betsa betsapa anu sa akĩ ẽ hatu nitxini anua Israelĩ enabu ana iwekĩ ẽ hatu itxawaniwẽ taeshũ Senhor Deus hiweatũ kena ẽ datã akaii’, ikĩ na hatũ mai anu hiweshũ besti haska yui yubakakubaĩshãkanikiki”, iniki.