Gênesis 9 - Kaxinawá Bíblia (BR)

Deus Noébe yubakai eskanikiaki, na hãtxarã

¹ Deusũ Noé inũ hawẽ bakebu duawakĩ yuikĩ eska wanikiaki. “Bake itxapa bawai ana pai mai anu ana iake iakebaũshãkãwẽ, hiwebaunirã”, iwanã ana yuikĩ:

^2-3 “Yuinaka pitibu inũ pitibuma matuki datei dakenũbarikanikiki. Peiyabu nuyaibu inũ, maĩ mapuabu inũ, henẽ hiweaburã, ha yuinaka dasibi ẽ matu ibu wamaii, dasibi matũ piti wakinã. Ha dukũ yunu besti ẽ matu inãniki, mã pinunã. Hanua ikis yuinakari inũ yunu ẽ matu inaiĩ, matũ pitirã, ha pi mã hiwepakeshanũbunã.

⁴ Eska besti ẽ matu nemaii. Yuinaka nami himi kauanama piyamashãkãwẽ. Hamẽ himinã, yura hiwemamiswẽ taeshũ nami hawẽ himiyabi piyamashãkãwẽ.

^5-6 Earã, ẽ Deus ẽ yushĩ itsa keska wakĩ yurabu ẽ matu damiwaniwẽ taea tsuara pubẽkĩ yura kasmai yuinakapã yura betsa tenãkenã, manakukĩ huni betsãri hau ea tenãshũshanũwẽ. Habũ matu tenãbu unãkĩ hakimama ẽ hatu unãti wakubaĩshanaii”, itã

⁷ ana hatu yuikĩ: “Hakia matu hiwekinã, bake itxapa bawakĩ ana itxai pakũkaĩkĩ mai hirabi matakĩ ibu wapashãkãwẽ”, iwanã,

^8-9 Noé inũ hawẽ bakebu ana yuikĩ: “Matu inũ habia matuwẽ pakubaĩshanaibu txanima ẽ matu yubaii, hawa matu parãma matu henetima wakinã. Nĩkakãwẽ.

¹⁰ Pitibu inũ pitibuma yuinaka habube ẽ matu yubariaii. Na mã habu pashaima ẽ dasibi matu yubaii, matube shashu nunuti anua kaĩshinabuberã.

¹¹ Haska dasibi matu inũ habu yubakĩ maiwẽ hiweabu dasibi henewẽ ẽ ana matu tenãma ishanai ẽ yubakaii. Haska ẽ akima keska wakĩ mai anu hiweabu henewẽ ẽ yamawaima keska wakĩ ana habiawẽri ẽ ana akama ishanaii.

^12-13 Nawã bai tapĩkĩ ẽ yubaka unãti wakĩ ẽ nai anu sĩtãpakekĩ ẽ kaĩmapakeshanaii. Haskawẽ taeshũ mai anu hiwebaunabu dasibibũ uĩkĩ: ‘Nuku yubaniwẽ taeshũ henewẽ Deusũ nuku ana tenãkĩ keyuama ishanikiki’, ikĩ shinãpaketirubuki.

^14-15 Haska biamawakĩ nai kuĩwẽ ẽ mai atximaya nai anua butui nawã bai sĩtãpakeaya ẽ matu inũ yuinakabube yubakani hakimama ẽ shinãkubaĩshanaii. ‘Henewẽ hiweabu dasibi ẽ ana tenãkĩ keyuamaki’, ashũ

¹⁶ nawã bai sĩtã tapĩshũ uĩkĩ mai anu yurabu inũ yuinaka hiweabu dasibi ẽ hatu yubani hakimama ẽ shinãkubaĩshanaii.

¹⁷ Nawã bai sĩtã ẽ hatu pakeshunaya mai anu hiweabũ ẽ hatuki yubakani uĩkĩ yurabũ ea shinãkubaĩshãkanikiki”, haskai Deus Noébe yubakai hãtxanikiaki.

Noé inũ hawẽ bakebu hiwei eskanibukiaki, na hãtxarã

¹⁸ Noẽ huni bakebu Sem inũ, Cam inũ, Jafé shashu nunuti anua kaĩmabu txipu Camnẽ huni bake bawaima kaiã kenakĩ: “Canaãki”, anikiaki.

¹⁹ Noẽ huni bake dabe inũ besti mai anu pakũkaini ana itxai iake iakekubainibukiaki.

²⁰ Hanua nunuti anua kaĩbiranimashũ Noẽ bai wakĩ taewashũ uva tatxa banaimashũ

²¹ hawẽ vinho buspuai aka paehaira hawẽ tari hiwe merã tariuma usha dakakẽ

²² Canaãnẽ epa Cam hikikaĩ hawẽ epa Noé tariuma paeã usha daka uĩtã kaĩkirã kashe wakĩ hawẽ betsa dabe hatu yuia

²³ Sem inũ Jafé hawẽ dakukuti bitãshũ hune uiãma hamauri besukaĩ hatũ epa tariuma daka yabutã kaĩbiranabũ

²⁴ Noé paeã bestẽtã bepe ikai hawẽ bake mashkũ kashewashu yuiabu tapĩtã

²⁵ hawẽ baba yupukĩ yuikĩ: “Canaã inũ hawẽ bababu duawama itxakawakĩ hatunabũ hatũ dayanika hawẽ escravo hatu wakubaĩshãkanikiki, dayamakinã”, akĩ hatu yuinikiaki.

²⁶ Hanushũ ana betsa yuikĩ: “Ẽ mekenika Senhor Deusũ hau Sem inũ hawẽ bababu ikubainaibu hau hatu duawakubaĩshanũwẽ. Ha inũ, Canaãnẽ bababurã, hau hawẽ dayaru escravo ikubaĩshanũbũwẽ, Sem dayashunirã.

²⁷ Haska inũ, Deusũ hatu pa waya Jafé bababũ Semnẽ bababu hatu mebĩtã hatũ mae hau ibu washanũbũwẽ, Canaãnẽ bababu hatu escravo wariakinã”, akĩ Noẽ hatu yuinikiaki.

²⁸ Noé 600 ano hayakẽ henẽ mai hirabi atxima netsunikẽ ana 350 ano Noé hiwea

²⁹ hanua 950 ano haya Noé mawanikiaki.