Gênesis 7 - Kaxinawá Bíblia (BR)

Henewẽ Deusũ yurabu hatu kupinikiaki, na hãtxarã

¹ Hanushũ Deusũ Noé yuikĩ: “Yura dasibibube mĩ hiwebia mia besti mĩ pepaki, ẽ hãtxa nĩkai hiwekũkainirã. Haskawẽ taea nunuti merã minabuyas hikiriwe” atã

^2-3 ana yuikĩ: “Pitibu yuinaka betsa betsapa tibi, 7 yushã inũ 7 bene nanekĩ hatu bitxishãwẽ. Ha dikabi peiyabu bene 7 inũ yushã 7 nanekĩ hatu bitxiriashãwẽ. Pitibuma yuinaka betsa betsapa tibi yushã bestitxai inũ bene bestitxai nanekĩ bitxiriashãwẽ, habu mawama mekei hau mai anu mibe ana hiweshanũbunã.

⁴ Hanushũ ana 7 shaba keyuaya mai anu ui ẽ tueaii. Hakia taewakinã, 40 shaba inũ 40 yame tanamakĩ ui nesewama ẽ imashanaii. Haska wakĩ mai anu ẽ damiwani ẽ hawẽ yamawashanaii, hiweabu dasibi hasakĩ tenã keyukinã”, aka

⁵ dasibi Deusũ haska yunua Noé akĩ keyunikiaki.

⁶ Noé 600 bariyakẽ hene matai taenikiaki.

⁷ Heneki datei hawẽ aĩbe inũ, hawẽ huni bakebube inũ, hawẽ babawãbube Noé hawẽ nunutiki hiki taenikiaki.

^8-9 Pitibu yuinaka inũ pitibuma yuinaka betsa betsapa tibi hatube hikirianibukiaki, yushã inũ benerã. Dasibi haska Deusũ Noé yunua hawẽ hãtxa txibaĩ hikinibukiaki.

¹⁰ Ana 7 shaba keyuaya hene matai taeaya

¹¹ Noé 600 bariya hiwekẽ hanua ha baritiã ma 2 ushe inũ 17 diatiã mai anua hene tuekeaya nai uria ui bashnekei tuekeriaya

¹² 40 shaba inũ 40 yame tanamakĩ mai anu ui imanikiaki, Deusũnã.

¹³ Habiatiãri ui iki taeaya Noé inũ hawẽ aĩ inũ hawẽ bakebu dabe inũ besti Sem inũ, Cam inũ, Jafé inũ, hawẽ babawã dabe inũ besti shashu nunuti merã hikiaibũ

¹⁴ pitibu yuinaka inũ pitibuma yuinaka inũ habu nũ ina waisma inũ habu nũ ina wamis yuinaka betsa betsapa tibi inũ nutawẽ sharai mapumisbu inũ peiyaburã, hati hatube hikinibukiaki.

^15-16 Dasibi huĩsinamisbu mai anu hiweabu tibi Noébe nunuti merã hikibaĩbainaibũ haska Deusũ yunua yuinaka yushã inũ bene hiki keyuaibũ shashu nunuti merã Senhor Deusũ ibubis hatu bepunikiaki.

¹⁷ Hanua 40 shaba ui iki heneriamakẽ ana hene ewakĩ matawakĩ hawẽ nunuti nũtãkĩ taewaya

¹⁸ hanua hene ana matai ewakũkaĩkĩ mai dasibi binumaya shashu nunuti nunukaunaya

¹⁹ henẽ mai binumahairakĩ mati keyatapa dasibi atximakĩ

²⁰ 7 metro ana matakĩ ni binumakĩ mati dasibi atxikĩ mabiris akĩ keyunikiaki.

²¹ Haskaya yuinaka inũ yurabu mawai

²² dasibi hamapai sharabu habu huĩsinamisbu mai anu hiweabu mawai keyunibukiaki.

²³ Haska wakĩ mai anu hiweabu Deusũ dasibi keyu tenãkĩ yurabu inũ yuinaka yamawakẽ hakia hatibu Noébe besti nunuti merã hikiabus hawa mawabumakẽ

²⁴ hanu ui ma nesekẽ hene netsuriama dasibi bepukĩ keyua netsuyuama ana 150 shaba iyunikiaki.