Gênesis 23 - Kaxinawá Bíblia (BR)

Sara mawa hawẽ benẽ mai wanikiaki, na hãtxarã

^1-2 Abraão aĩ Sara 127 ano haya Canaã mai pakea anua mae betsa Quiriate-Arba, hawẽ kena betsa Hebrom anua mawanikiaki. Ha mae anua hawẽ aĩ mawakẽ Abraão shaba tibi kashakũkaini nesebiatã nuihairai

^3-4 hanua hawẽ ainĩ yura Heteu nawabu anu mai wanũ, iwanã, kaĩkaini hanu itxamisbu anu kashũ hatu yukakĩ yuikĩ: —Earã, ẽ huni betsaki, ẽ matunabumarã. Hakia ẽ matube hiweyuaiwẽ taeshũ ea nĩkakãwẽ, matu yuinunã. Ẽ aĩ mawashina ẽ uĩkatsi ikamaki, ẽ maiwakatsis ikairã. Hanu ẽ maiwai matũ mae peiwẽ hanu maiwati ea inãkĩ ibuwamakãwẽ— hatu wa

^5-6 Heteu nawabũ kemakĩ: —Shanẽ ibũ, eskaki. Nuku nĩkawe, mia yuinunã. Mĩ shanẽ ibu betsa pepaki, nukube hiwea mĩ Deusunarã. Nukũ mishki tãpe haratura pepa anu mĩ aĩ mĩ maiwatiruki, tsuã nũ mia nemamakirã— akabu

^7-9 ana Abraão benikauã hawẽ huĩti pepa hatu unãmakĩ hawẽ beya txibaĩ beti itã benitã hatu yuikĩ: —Ẽ aĩ mawashina ẽ maiwatirurã, mã ea inãkĩ ibuwamakatsi ikimẽkaĩ? Ea merabewakãwẽ. Zoar huni bake Efrom hawẽ mishki tãpe hanu maiwati keyatapa hawẽ bai depi hayaki. Ha tãpe mishki kena Macpelaki. Ha bai ibu ea hãtxa washũkãwẽ, hau ea inãkĩ ibuwamanunã. Ẽ peiwẽ hatira karu depia pakairã, matũ mã unainã. Haskawẽ taea matube enabu mawa maiwati tãpe mishki ẽ hayapakeshanaii— hatu watã ana tsauaya

^10-11 Heteu nawa Efrom hawenabu Heteu nawabu namakis tsaua hau dasibibũ pe nĩkanũbũ benikaũ Abraão kemakĩ: —Haskamaki. Ẽ hãtxa nĩkawe. Ha bai inũ mishki tãpe ẽ mia hamẽ ibuwamaii. Enabũ nĩkaibũ ẽ mia inãkuiaiĩ, hanu mĩ aĩ mĩ maiwanunã— atã tsaukẽ

¹² hanua Heteu nawabũ nĩkaibũ benitã hawẽ beya txibaĩ beti itã benishũ

¹³ itxabu bebũshũ Abraão Efrom ana kemakĩ: —Ea nĩkawe. Haska ẽ mia yukai ẽ pei biwe, peiwẽ hawẽ karu dasibi ẽ mia pakaii. Biwe. Mĩ ikaya eã ibu watã ẽ aĩ hari ẽ mai wakatsis ikairã— atã tsauaya

^14-15 hanushũ Efromnẽ Abraão ana kemakĩ: —Shanẽ ibũ, ẽ hãtxa nĩkawe. Ha ẽ bairã, hawẽ karurã, 400 prata heshe hushupaki. Hati hawẽ karuki. Ana ha haska shinaĩ hawẽ nui hãtxa yamanãwẽ. Ha bai ẽ mia ibuwamai bishũ minabu mawa hanu hatu maiwapakeshãwẽ. Ikis mĩ aĩ hanu maiwariwe— aka

¹⁶ pei Efromnẽ bikatsi ikaya Abraão unãkĩ dasibi Heteu nawabũ uiaĩbũ haska yuiai keska dasibibũ uiaĩbũ pei tana pewatã 400 prata pei heshe pakakẽ

^17-19 hanushũ mai pakea Canaã anu Heteu nawabu hatũ maewã Manre natiã hawẽ kena bena Hebrom hanu bai kaya dasibi hikimisbu anu dasibitũ uiaĩbũ bari huaikiri Efromnẽ bai Macpela dasibi, hawẽ mibã banati mai inũ, hawẽ mai wati tãpe inũ, hawẽ bai nemaki hi bana inũ, tsisumẽ anu hi bana mapua ha dasibi shanẽ ibubũ hawẽ unaki kenematã Abraão ibu wamakẽ hanushũ haska wabu bitã txipu Abraão mishki tãpe anu hawẽ aĩ Sara mawashina mai wanikiaki, mai pakea Canaã anurã.

²⁰ Haska Abraão enabu mawa hanu hau hatu maiwapakeshanũ peiwẽ Heteu nawabũ bai inũ mishki tãpe inãbu bitã hawena wanikiaki.