Ester 7 - Kaxinawá Bíblia (BR)

Hamã hau teneshnũbũ shanẽ ibuhairatũ hatu yununikiaki, na hãtxarã

¹ Esterĩ ma hatu piti pewashuna anu shanẽ ibuhaira Assuero inũ Hamã bushũ

² pikĩ ana ha katxu Assuerõ Ester hãtxa wakĩ: —Hawara mĩ ea yukakatsis ikai menã hawaira ea yukariwe. Ẽ shanẽ ibũ yunumis namakis pashkatã kasmai hawara mĩ ea yukai ẽ mia inãtiruki— aka

³ kemakĩ Esterĩ yuikĩ: —Mĩ ẽ shanẽ ibuki. Ewẽ benimakĩ haska mĩ ekiri pe shinaĩ inũ mĩ ea betxipaiai eska ẽ mia yuiai ea nĩkawe. Ea inũ enabu nuku detekĩ tenãshanũ ika ma yubakashinabuki. Ea inũ enabu nũ mawayamashanũ hatu nuku nemashũshãwẽ.

⁴ Ea inũ enabu yamawakĩ keyukatsis ikĩ pei mia inãnũ, ishũ mia parãshinaki. Dayaru escravobu nuku wakĩ peiwẽ nuku mia hatu inaĩmabunã, eanã, ẽ mia yuiama ikeanaii, na nukuki sinataitũ haska betxipaiaiwẽ hawẽ shanẽ ibu nuku txakabuwamairã— aka

⁵ hanushũ Assuerõ yukakĩ: —Tsuamẽ, hani ha hatũ matukiri haska shinãkĩ yuima mĩ ea yuiairã?— aka

⁶ kemakĩ Esterĩ yuikĩ: —Txakabuwai nukuki sinatahairakũkaini huni txakaburã, na habia tsaua Hamãki— akai nĩkatã shanẽ ibuhaira inũ hawẽ aĩ kayabi bebunua datehairai Hamã hawa tukuama bashti ika dakakẽ

⁷ Assuero sinatahairai benikaini hanushũ piai anua tashnikaini aĩbuaibũ hiwe hemaĩtĩ hua mirima anu kakẽ hanua: “Assuerõ ea tenãkatsis ikai ẽ unaiĩ”, ikĩ teke nashabakã anu Hamã bashti ika dakashũ hau hawẽ bene nemashunũ hiwekatsis ikĩ Ester merabe ea akaya

^8-9 hanua hemaĩtĩ hua mirima anu iaketãtani txĩtũkirã hiwe nashabakã Assuero hikikirãkĩ hanu bashti ishũ piaibu anu Ester dakakẽ ha dapihaira Hamã dãti ika uĩkĩ ana haki sinatahairakĩ hui kushipawẽ Assuerõ yuikĩ: —Ana ea bebunua inũ ẽ hiwe anushũ ẽ aĩ kayabi mĩ txutanũ ika ikimẽkaĩ?— aka hawẽ hãtxa nĩkatã shanẽ ibu mekenika betsã tari tuashwẽ Hamãnẽ bushka bepua haska waya ha shanẽ ibu mekenika betsa hawẽ kena Harbonã shanẽ ibuhaira yuikĩ: —Hamãnẽ hiwe hemaĩtĩ anu hanushũ tsuara teneshtirubu keyatapa 22 metro haska Hamãnẽ hatu yunua ashiãbu niaki. Mia merabewakĩ mia detekatsis ikaibu Mardoqueũ mia banabimaima Hamãnẽ hanushũ tenãkatsi hatu amashinaki— akaya hanushũ Assuerõ hatu yunukĩ: —Peki. Haskakenã, hanu haki Hamã teneshtãkãwẽ— hatu wa

¹⁰ Mardoqueu teneshnũ ishũ hatu yunua ashiãbu anu Hamã teneshabu haska waibu unãtã shanẽ ibuhaira sinatahairabiai maĩtã,