Ester 4 - Kaxinawá Bíblia (BR)

Hamãnẽ yunuti hãtxa nĩkatã Judeu nawabu punu nukatã kashakubainibukiaki, na hãtxarã

¹ haska dasibi Hamãnẽ ashiã Mardoqueũ nĩkatã huĩti nishmai keyushũ hatu uĩmakĩ hawẽ tari ushni ushni akĩ putatã hawẽ nui bika tenei unãmati tari besha sawetã txi mapu bitã hawẽ bushka anu maputukutã maewã Susã namakis anu kai taekaini nuihairai kashai ĩ ĩ ikũkaini

² shanẽ ibuhairatũ hiwe hemaĩtĩ kenebaunibu hikiti shuiki kematã tsuara tari besha sawea hikitirumawẽ taeshũ Mardoqueu hau hikiyamanũ mekenikabũ nemabu

³ ha dikabi província tibi anu shanẽ ibuhairatũ hãtxa buabu hau Judeu nawabu dete keyushananũbũ hatu banabimaibu Judeu nawabũ nĩkatã datei huĩti nishmahairai samakei kasha txakayamakĩ hatũ beya txibãkĩ mirimabũ hawẽ nui bika tenei unãmati tari besha sawe keyutã txi mapu mamaki dakayukubainaibũ

Kaka txakabu nĩkatã Esterĩ hawenabu merabewanikiaki, na hãtxarã

⁴ Esterĩ dayaru aĩbuaibu inũ hawẽ mekenikabu hubu meshtenibũ haskabaunaibu tapĩtã Ester anu bushũ banabimakĩ yuiabu Ester Mardoqueuwẽ nuihairakĩ hau tari besha pekatã tari betsa sawenũ Mardoqueu anu tari pepa hau bushũtanũbũ bumakĩ yunua bushuãbu hakia Mardoqueũ hawa hatu mebĩkatsi ikama danãshũwẽ taeshũ

⁵ huni hubu binibu Ester dayashũkũkaĩmis hawẽ kena Hataque Esterĩ kena hua Mardoqueu haskai ikai hau uĩkĩ yukatanũ Esterĩ yunua

⁶ shanẽ ibuhairatũ hiwe hemaĩtĩ hikiti shui bebũ maewã kushipa Susã namakis hanu itxa hãtxanamemisbu shaba ewapa anu Hataque kai Mardoqueuki nukushũ haska Esterĩ yunushu keska habe hãtxakĩ yuka:

⁷ “Eskawẽ taea ẽ ikaii. Assuerõ haska hatu yunubaũshina inũ Hamãnẽ hati hawẽ mane prata pei mekenikabu hatu inãtã hawẽ taeshũ Judeu nawabu dasibibu hau hatu tenãkĩ yamawashanũbũ shanẽ ibuhaira yubashinakiaki.

⁸ Haska bestima eskari ẽ hayaki. Na haska hatu yunushinabu inũ Susã anu yunukĩ hatu banabimabaũshinabu naki. Na Ester ea inãshũtãwẽ”, iwanã, inãkĩ dasibi yuitã hanushũ Mardoqueũ Hataque yuikĩ: “Hamẽ betsarã, ibubis hawẽ bene Assuero anu habi kashũ habe hãtxakĩ ha shanẽ ibuhairatũ nukunabu hau nuku merabewamanũ Ester ea yuishũritãwẽ”, aka

⁹ Hataque txĩtũkaĩ haska Mardoqueũ yuishu Ester yui keyua

^10-11 Esterĩ kemakĩ Hataque yuikĩ: “Shanẽ ibuhairatũ hatu kenama huni kasmai aĩbũ shanẽ ibuhaira uinũ ika hemaĩtĩ uke merã hanu Assuero tsaumis anu ibubis hikiaibu hawẽ yunuti hãtxa hayaki, hawẽ taeshũ hatu detetirã. Hanu Assuerõ hatu yunubaunai província tibi anu hiweabu inũ shanẽ ibuhaira dayashũmisbu ha yunutikiri habũ unãkanikiki. Hakia ha huni kenamabia hawẽ nuikĩ hawẽ shanẽ ibu unãti mane ouro mestẽti haki Assuerõ sanãbainaya hiwetiruki, hawa mekenikabũ deteamarã. Hamẽ earã, ma 30 shaba kaya ea kenamawẽ taea ẽ hari kai ẽ hawẽ dateaii”, iwanã, “Na habias hãtxa Mardoqueu ea ana yuishũtãwẽ”, akĩ ana Hataque yunua

^12-14 Mardoqueu anu Hataque ana kashũ Esterĩ hãtxa yuiai nĩkatã ana hau yuishũtanũ ha huni yuimakĩ: “Nukunabu Judeubu dasibi tenãbaũshanaibu shanẽ ibuhairatũ hiwe anu mĩ hune hiwea mia besti mekekĩ tenãma ishãkanikiki. Haska shinãwẽ. Natiã mĩ bene mĩ hawa yuiama inũ, nukukiri hãtxakĩ mĩ nemamakenã, haniara mae betsa anua Judeu nawabu merabewanũ ika nawa betsa beshãkanikiki. Hakia mia inũ mĩ epã enabu nũ mawai keyushanaii. Haskawẽ taea mĩ nuku merabewashanũ hawẽ aĩ kayabi mia wamakĩ Assuero mia katumaimabumẽkaĩ. Haska ẽ mia yunushu hãtxatãwẽ, hawa dateamarã”, iwanã, “Na habias hãtxa Ester ea ana yuishũtãwẽ”, akĩ Mardoqueũ Hataque yunua

¹⁵ Ester anu Hataque ana kashũ Mardoqueũ hãtxa yuia nĩkatã Esterĩ ana hawẽ hãtxa yunukĩ:

¹⁶ “Hau ea samakeshunũbũ kashũ nukunabu Judeubu Susã anu hiweabu hatu itxawatãwẽ. Shaba dabe inũ besti inũ meshu dabe inũ bestiri hawa piama hawa nushuama samakeaibũ ẽ dayaru aĩbuaibu inũ eari nũ habiaskariairã. Samakei henetã shanẽ ibuhairabe matu hãtxashuni ẽ kashanaii. Hawẽ nemati hãtxa pemabiakẽ, ea detekatsis ikĩ hau ea hatu detemashanũwẽ. Mawaki ẽ dateamaki”, iwanã, “Na habias hãtxa Mardoqueu ea yuishũtãwẽ”, akĩ ana Hataque yunua

¹⁷ Mardoqueu anu Hataque ana kashũ Esterĩ hãtxa yuia nĩkatã haska Esterĩ yunushu keska Mardoqueũ hawenabu hatu itxawatã yunua dasibi samakeshunibukiaki.