Apocalipse 6 - Kaxinawá Bíblia (BR)

Ha dukũ dabe inũ dabe hawẽ unãti tsamia Jesus Cristõ dashnukĩ taewanikaki, na hãtxarã

¹ hanushũ Deusũ txashuwã bakẽ hawẽ unãti ha dukũ tsamia dashnuaya ha hiweabu dabe inũ dabe betsã hawẽ hui tĩ ikaĩkainai keskai uĩkĩ ẽ nĩkaya hatũ yuikĩ: “Huwe”, akai

² ẽ uĩayã hanua cavalo hushupaki tsuara kanũyã katsauwa shanẽ ibũ maiti betsa Deusũ inã maia hunibube detenamekĩ binumakĩ hatu maemakeakebaini kakẽ

³ hanushũ Deusũ txashuwã bakẽ hawẽ unãti tsamia ha segundo dashnuaya ha hiweabu betsã yuikĩ: “Huwe”, akai

⁴ ẽ uĩayã hanua cavalo betsa taxipaki tsuara betsa haki tsaukaĩkĩ kuxipa bibaĩkĩ hau mai hirabi anu tsuabura ana unãnuma hiweama hanubi hau detenamebaunũbũ nupe txaipa inãtã yunua kaya

⁵ hanushũ Deusũ txashuwã bakẽ hawẽ unãti ana ha terceiro tsamia dashnuaya hiweabu betsã kenakĩ yuikĩ: “Huwe”, akai ẽ uĩayã hanua cavalo betsa mexupa tsuara betsa hawẽ shãkama unãti tsuma haki tsauwa

⁶ ha hiweabu dabe inũ dabe anua ha hãtxa kaĩmakĩ yuiai ẽ nĩkaya: “Piti yama tukãtiã shekiwã ha misi wati kilo bestitxai hawẽ karu shekamakĩ shaba bestitxai daya pei wakubaĩwẽ. Ha inũ, misi wati betsa cevada pe beshmas kilo dabe inũ besti hawẽ karu shekamakĩ shaba bestitxai daya pei wakubaĩwẽ. Hakia piti sheni inũ uva vinho ana karu wayamakubaĩwẽ”, aka kaya

⁷ hanushũ Deusũ txashuwã bakẽ hawẽ unãti ana ha quarto tsamia dashnuaya hiweabu betsã yuikĩ: “Huwe”, akaya

⁸ ẽ uĩayã hanua cavalo betsa paxĩ beshunaki tsuara betsa hawẽ kena Mawamanika haki katsauwa inũ hanu mawabu bumisbu habũ shanẽ ibu hatxũ huai ẽ uĩayã Deusũ mai hirabi anuabu yurabu shukua tibi habu anua pashkakeakekĩ ha dabe shanẽ ibu watã ha quarta parte hatu inãkĩ kuxipa wakĩ yunukĩ nupewẽ hau detenamenũbũ inũ, buniwẽ hau tenãmanũbũ inũ, isĩ betsa betsapawẽ hau tenãmanũbũ inũ, yuinaka pubẽbũ hau hatu pimanũbũ ha kuxipa inã bibainaya

Ha quinto inũ sexto hawẽ unãti tsamia Deusũ txashuwã bakẽ dashnunikiaki, na hãtxarã

⁹ hanushũ Deusũ txashuwã bakẽ hawẽ unãti ha quinto tsamia dashnuaya habũ Jesus ikũwãkĩ Deusũ hãtxa Jesuskiri yusĩkubaini bika betsa betsapa tenebiai txĩtuãbuma hatu tenãbu txi tapu fogão hanushũ Deus kẽwãkĩ inãkuĩti hanushũ kuamisbu anu ha namã ha pepabũ yushĩ datãbu ẽ uĩayã

¹⁰ habũ hãtxa kuxipawẽ yuikĩ: “Mĩ nukũ Shanẽ Ibu binu keyua meribi mĩ txanima kayabiki. Haskakẽ mai anushũ habũ nuku tenãniburã, hatiã mĩ hatu unãti watã hatu nuku kupishũshanai?” akabu

¹¹ yushĩ datãbu Deusũ hatu yuikĩ: “Maturã, huĩrukũyukãwẽ. Ikismaki. Ẽ tsumabu betsa matu keska ea dayashũmis haburi hau tenãyunũbũwẽ. Habũ matu tenãmis keskariwakĩ ẽ hatu kupishanai manayukãwẽ”, itã habu tibi pepawẽ kupikĩ tari hushupa txaipa hatu inãkĩ sawemakĩ keyuaya

¹² hanushũ Deusũ txashuwã bakẽ hawẽ unãti ha sexto tsamia dashnuaya ẽ uĩayã patxa sakuhairai bari nukai mexua tari mexupa keska dakakẽ usheri himi keskai taxia dakakẽ

¹³ hanua niwe birenepã hi bimi huxĩriama niri amis keskai bixi tsekebirani mai anu niri iake iakeaibũ

¹⁴ hanua nai yamakaini una sebiki ikaskainaya mati inũ hene anu mai natukã maeakei shekekaunaya

¹⁵ hanua mai hirabi anua shanẽ ibuhairabu inũ, soldadobu shanẽ ibubu inũ, mabuwãyãbu inũ, yura kuxipabu inũ, dasibi hatũ hatu dayashũmisbu inũ, yura tsuã tsumama dasibi hatibu datei mai tãpe inũ mixkipãwã mati hanu hunenũ ika bushũ

¹⁶ haki hunenũ ishũ mati inũ mixkipãwãbu yuikĩ: “Hanu kupi ma hua tsuã nematirumaki. Epa Deus hawẽ shanẽ ibũ tsautiki tsauwa inũ hawẽ bake txashuwã bake nukuki sinataiwẽ taea nuku hunei nukuki di irikãwẽ.

¹⁷ Ma ha shaba hanu Deusũ hatu kupiaitiã ma hua tsuã ana nematirumaki”, akeakeaibũ