Apocalipse 20 - Kaxinawá Bíblia (BR)

1.000 ano Jesus Cristo shanẽ ibushanikiaki, na hãtxarã

¹ Hanushũ ẽ ana uĩayã nai tsuma betsa nai anua butukirãkĩ ha kini keyatapa shãkĩhaira hawẽ bepẽti chave inũ mane dispi txiwetameya ewapa tsuma ẽ uĩshu matu yuinũ nĩkakãwẽ.

² Ha nai tsuma hukiranã, yuxibu sheanã ha dukũ dunutã parananaĩ taeni hawẽ kena dabe Diabo inũ Satanásrã, atxishũ mane dispiwẽ neshatã 1.000 ano

³ kini keyatapahaira anu urẽshũ hawẽ beputiwẽ bepukĩ mestẽhairawatã hawẽ unãtiwẽ beputiki tsamĩkĩ unãti watã 1.000 ano bitxitã hanu mekekubaĩshanikiki, hau ana mai hirabi maniabu hatu parãyamanunã. Hakia ha 1.000 ano keyukainaya hau ana hatu haskarawanũ hawa wama kaĩmatã ana hatishuĩra bari Satanás yunuama ishanikiki.

⁴ Hanushũ habũ hatu unãti washanai haki tsaushũ unãti wati habũ hatũ kuxipa biaibu ẽ uĩshuki. Ha dikabi Deusũ yusĩa txibãkĩ txĩtuãma Jesuskiri yusĩkubainaibu habũ bushka teshteabu hatũ yushĩ ẽ uĩshuki. Habu ikirã, ha yuinaka mese atimapahaira inũ, hawẽ dami kẽwãbuma inũ, yuinaka mese atimapahairatũ enabu unãti habũ betũkuki inũ hatũ mekẽ petxiki hatũ kene netãmakĩ amama ikubainimabuki. Haskawẽ taea ana besteĩ benibaũ 1.000 ano Jesus Cristobe shanẽ ibushãkanikiki. Haskaibu ẽ uĩshuki,

⁵ habu dukũ mawakubirãpaunibu besteĩ taeirã. Hanua 1.000 ano keyui maekainaya ha mawanibu betsaburi bestẽriashãkanikiki.

⁶ Ha inũ, Deusũ hawenabu wakĩ meribi wanishũ habu dukũ bestẽwanã, benimahairashãkanikiki. Haburã, ana hawa hatũ kuxipa mawa dabeki hayamahaira ishãkanikiki. Haskawẽ taea Deus inũ Jesus Cristo dayashuni hãtxashuni besti habe shanẽ ibui 1.000 ano habe shanẽ ibushãkanikiki.

⁷ Hanushũ ha 1.000 ano binukainaya mai kini keyatapahaira anua hawẽ nai tsuma Satanás Deusũ mistumanishũ kaĩma

⁸ tashnitã nawabu dasibi mai hirabi anu hiwebaunabu anua tibi hatu parãkĩ ha mae Gogue inũ Magogue anua hawenabu soldadobu itxapawakĩ iãnẽwã keshanua maxiti wakĩ habube detenameti itxawashanikiki.

⁹ Mai hirabi anua bui Deusunabu hatu manakai itxabu inũ ha mae ewapa Deusũ abuhairai ha dabe keshei beabu anu Deusũ nai anua txi here hatu anu puta hatu kuakĩ yamawatã

¹⁰ hanu ha iã hanu enxofre paxinipa menui here hi hi ikai anu yuinaka mese atimapahaira inũ parã hãtxa yuishunika nai tsumabũ urẽnibu anu Satanásri urẽa haria bariri inũ mexu merã niti akama Deusũ hatu isĩ tenematxakayamashanikiki, hawa huĩrukũti hayama niti ikama akibi akinã.

Hawẽ henekĩ mawanibu nukũ Shanẽ Ibũ hatu unãti washanikiaki, na hãtxarã

¹¹ Hanushũ Shanẽ Ibu haki tsauti hushupa hawẽruahaira nukũ Shanẽ Ibu haki tsauwa ẽ uĩshuki. Tsaukẽ bari inũ, ushe inũ, bixi inũ, mai keyu tsekebaini nixmai yamakainaya

¹² hanua dasibi shanẽ ibubu inũ shanẽ ibubuma mawanibu ana bestẽtã Shanẽ Ibũ besuuri mapuabũ hawara betsa betsapa akubainibu Deusũ haki kenemis una itxapa bepẽtã hanua una betsa tsuabũra Deus txibãkĩ Jesus ikũwaĩ niti ikama Deusbe hiwekuĩshanaibu habũ kena Deusũ haki keneriakubaĩmis una betsa hawẽ hiwemati kene bepẽriashũ ha habu hiweshũ haska wamisbu hatukiri ha unaki kenekubaĩmisshũ dasibi mawanibu ana bestẽa mapuabu habis hatu yuikĩ hatu unãti wakeakeaya

¹³ iãnẽwã batapa anua mawanibu inũ hanu mawabu bumisbu anua mawanibu habu Deusũ bestẽwãtã itxawashũ haskarara hiwekubainibu habu tibi unãti wakĩ pepabu inũ txakabubu hatu kupiaya

¹⁴ hatũ hatu mawamanika inũ hanu mawabu bumisbu anu ha iã hanu menui here hi hi ikai anu hau dabeki mawakĩ menunũbũ hatu urẽa

¹⁵ tsuabũra Deus txibãkĩ Jesus ikũwãbuma habũ kena Deusũ haki kenemis una anu habũ kena hayama ha iã hanu menui here hi hi ikai anu ma hatu puta keyuabuki.