Apocalipse 10 - Kaxinawá Bíblia (BR)

Una pixta sebi bepemana nai tsumã benikiaki, na hãtxarã

¹ Hanua nai tsuma kuxipa betsa nai anua butuai ẽ uĩshu matu yuinũ nĩkakãwẽ. Hawẽ yura nai kuĩnẽ yabua inũ, hawẽ bushka nawã bai tapia keska inũ, hawẽ besu bari keska txasha inũ, hawẽ bikerã txi dekẽ keskaki.

² Ha inũ, una pixta sebi bepemana tsumabirana hawẽ tae txixabukũtã hawẽ tae yusiuri iãnẽwã bepaia inũ hawẽ tae yusmauri maiki paiaki.

³ Ha nai tsuma sai iki inu leão pubeĩ tekerẽ imis keskai hui kuxipawẽ sai ikẽ hanua seteki hui tashni tĩ ikaĩkaini keska ẽ nĩkaxinaki.

⁴ Hawẽtxaĩs seteki dẽke iki betsa betsapai hãtxa nĩkatã hawẽ hãtxa kenẽnũ ishũ ẽ pewaya naiurishũri hui betsawẽ tsuãra ea yuikĩ: “Ha hawẽtxaĩs ha seteki dẽ iki betsa betsapai mĩ nĩkabiashurã, ha keneama hunewe, tsua yuiyamarã”, ea waya

⁵ hanua ha nai tsuma iãnẽwã bepaia inũ mai anu paia hawẽ mekẽ yusiuri naiuri sanãtã

⁶ ha hiweibi hiweni hiwea hatũ nai wani inũ mai wani inũ iãnẽwã wani dasibi habu hawẽ hiwebaunabu hakiri hãtxa betsa watimakiri yuikĩ: “Bari hawẽ heneirã, hatishũ bestiki.

⁷ Ha sete nai tsumabu hawẽ henea sétimõ hawẽ trombeta txã akaya Deusũ tsumabu hawẽ hãtxa yuishunikabu haska inũbariaikiri Deus hune yubakapauni ma hatishũ besti meneshanikiki”, ikaya

⁸ ha hui nai anua tashniai ẽ nĩkaxinatũ ana ea yuikĩ: “Ha nai tsuma hawẽ tae betsa iãnẽwã bepaia hawẽ tae uke betsa maiki paiatũ una pixta sebi bepemana tsumaki nukushũ mebĩwẽ”, ea wa

⁹ kashũ yuikĩ: “Ha una pixta sebi bepemana mĩ tsumarã, ea inãwẽ”, ẽ aka ea yunukĩ: “Naki, piriwe. Mĩ pia mĩ hana buna bata keska ibiatã mĩ hatu mukahairaikiki”, ea wa

¹⁰ ha una sebi pixta nai tsumã tsuma mebĩtã ẽ pia ẽ hana buna bata keska batabiakaini ẽ hatuki nanekĩ muka wabainaya

¹¹ hanushũ nai tsumabũ ana ea yuikĩ: “Deusũ mia ana yunuairã, mia yuinũ nĩkawe. Mae betsa betsapa anu hiweabukiri inũ, nawa mai pakea betsa betsapakiri inũ, hãtxa tibi hãtxaibukiri inũ, shanẽ ibu kuxipahaira betsa betsapakiri hawẽ hãtxa bena shabakabi hatu keneshũkĩ haska Deusũ hatu haska washanai hatuki txaniriwe”, ea wa ẽ nĩkashuki.