Amós 1 - Kaxinawá Bíblia (BR)

Judá enabuki Deus sinatanikiaki, na hãtxarã

¹ Judá enabũ mai pakea anu hiweabu Uzias shanẽ ibuhairakĩ hatu yunukubainaitiã inũ, Samaria anua shanẽ ibuhairakĩ Israelĩ enabu shukuabu anua 9 pashkanibu 2 ano mai patxa sakutxakayamariamakẽ Joásĩ huni bake Jeroboãonẽ hatu yunukubainaitiã mae pishta Tecoa anua txashuwã mekenika Amós dayakũkainai na hãtxa Israelĩ enabu 9 shukuabu anu Deusũ hawẽ hãtxa Amós yuimakubainikiaki.

² Jerusalém anu Mati Sião anushũ tĩ ikaĩkainai keskawẽ hawẽ hui Senhor Deusũ hatu nĩkamaya basi txashuwanẽ pimisbu nukashanai inũ Mati Carmelo mamakia mai tsusĩ metuhairashanikiki.

Israelbu dapi hiwebaunabu Senhor Deusũ hatu kupishanikiaki, na hãtxarã

³ Eska Senhor Deusũ hatukiri yuai nĩkakãwẽ: “Maewã Damasco anu hiweabũ Gileade anu Israel hiweabu shekiwã trigo shemeti mane ferrowẽ hatu kusha keyukĩ keyunibu inũ, hawa hatũ txakabu henekatsi ikama ikubainaibuwẽ taeshũ ẽ hatu kupikĩ heneama ishanaii.

^4-5 Hatu haska wanibuwẽ taeshũ Damasco mishki kenebaunibu hikiti shui beputi kushipahairabiakẽ ẽ hatu puremakĩ bashnemashanaii. Txiwẽ hatũ hiwe menumakĩ shanẽ ibuhaira Hazaelĩ enabu yamawamakĩ hawẽ huni bake Ben-Hadadẽ hiwe hawẽrua betsa betsapa ẽ hatu kuamashanaii. Bete-Éden anu yununika inũ Biqueate-Áven anu shanẽ ibuai ẽ hatu yamawamariashanaii. Hatu haska wamatã Síria nawabu hatu atximashũ hatu escravo wamatã Quir txaihaira anu ẽ hatu iyumashanaii”, iki Senhor Deus hatukiri hãtxakĩ yuiniki.

⁶ Hanushũ Senhor Deusũ ana betsakiri yuikĩ: “Gaza anu hiweabũ txakabu betsa betsapa akubaĩkĩ Israelbũ mae betsa hatu atxi keyukĩ shakawabaĩkĩ hatũ dayaru escravo wabaĩkĩ Edom nawabũ mai pakea anu hatu iyushũ peiwẽ taeshũ hatu inãkĩ hatu ibuwamanibuwẽ taeshũ Gaza anuabu hatu kupikĩ ẽ hatu heneamari ishanaii.

⁷ Hatu haska wanibuwẽ taeshũ maewã Gaza mishkiwẽ kenebiabaunibũ hatũ hiwe tibi kuabaũkĩ shanẽ ibubũ hiwe hawẽrua tibi txiwẽ ẽ hatu yamawamashanaii.

⁸ Maewã Asdode anu shanẽ ibuhaira inũ maewã Asquelom anu yununika ẽ yamawakĩ keyushanaii. Dasibi ẽ kushipawẽ maewã Ecrom ẽ hatu atxima Filisteu nawabu hawa betsa teshe heneama mawai keyushãkanikiki”, akĩ Senhor Jeová yuiniki.

^9-10 Hanushũ Senhor Deusũ ana betsakiri yuikĩ: “Maewã Tiro anu hiweabũ txakabu betsa betsapa akubainibuwẽ taeshũ hatu kupikĩ ẽ heneama ishanaii. ‘Israelbu mã nukunabuki’, aki hatube yubakabianibu habias maewã anu hiweabu hatu atxikĩ keyutã dayaru escravo washũ Edom nawabu hatu inãkĩ ibuwamanibuwẽ taeshũ maewã Tiro mishkiwẽ kenebiabaunibukẽ hatũ hiwe tibi hatu kua keyumakĩ shanẽ ibubũ hiwe hawẽrua tibi txiwẽ ẽ hatu yamawamashanaii”, ikĩ Senhor Deusũ yuiniki.

^11-12 Hanushũ Senhor Deusũ ana betsakiri yuikĩ: “Edom nawabũ mai pakea anu hiwebaunabũ txakabu betsa betsapa akubainibuki. Haskawẽ taeshũ hatu kupikĩ ẽ heneama ishanaii. Israelbu hawenabu kayabibia hatuki sinatahairai tsuã hatu nematiruma ibubis hatukiri shinaĩ hatuki daetiruma hatuwẽ nuiama nupe txaipa kenuhairawẽ detekĩ txibãbaĩkĩ hatu itxakawanibuwẽ taeshũ hatũ maewã Temã kuakĩ hatũ shanẽ ibũ maewã Bozra anu shanẽ ibubũ hiwe hawẽrua tibi txiwẽ ẽ hatu yamawamashanaii”, ikĩ Senhor Deusũ yuiniki.

^13-14 Hanushũ Senhor Deusũ ana betsakiri yuikĩ: “Amom nawabũ txakabu betsa betsapa akubainibuwẽ taeshũ hatu kupikĩ ẽ heneama ishanaii. Hatũ mai pakea ana ewapa wakatsis ikĩ Gileade maewã anu Israelbu hanu hiwebaunabu detekĩ aĩbu tuyari nupewẽ txatxikĩ hatu puris akubainibuwẽ taeshũ nawa betsabu hatu detenamemaya ha shabatiã niwe birenepa beaya bis bis imakĩ ha maewã Rabá mishkiwẽ kenebiabaunibukẽ hatũ hiwe tibi kuabaũkĩ shanẽ ibubũ hiwe hawẽrua tibi txiwẽ ẽ hatu yamawamashanaii.

¹⁵ Hatũ shanẽ ibu beshmasbube hatũ shanẽ ibuhaira atxishũ hatũ mai pakea anua txaihaira anu hatu iyushãkanikiki, ana haria txĩtũtirubuma wakinã”, ikĩ Senhor Deusũ yuiniki.