Тоололго 9 - Библи

Паасха

¹ Египедһээ израильшуудай гараһанһаа хойшо хоёр жэл нэгэ һара үнгэрөөд, Синайн сүл губида ерээд байхадань, Эзэн Моисейдэ иигэжэ айладаба:

² – Паасха тэмдэглэхэ үдэр гаргагты гэжэ израильшуудта хэлэ. Болзор сагыень гаргаһан үдэр тэдэнэр паасхын һайндэрые тэмдэглэдэг байг.

³ Тэдэнэр энэ һарын арбан дүрбэнэй үдэшэ паасхын эдеэ хоол эдихэдээ энэ һайндэрлэлгын ёһо гурим болон тогтоолнуудыень сахиг.

⁴ Паасха хэгты гэжэ Моисей израильшуудта захирба.

⁵ Эзэнэй Моисейдэ үгэһэн зарлигые жэншэдгүй сахин, түрүүшын һарын арбан дүрбэнэй үдэшэ Синайн сүл губида тэдэнэр Паасха һайндэрлэбэ.

⁶ Үхэһэн хүнэй бэедэ гар хүрэжэ бузарлаһан зон тэрэ үдэр Паасха һайндэрлэхэ эрхэгүй болоходоо, Моисей Аһароон хоёрто ерээд, иигэжэ хэлэбэ:

⁷ – Бидэ үхэһэн хүнэй бэедэ гар хүрэжэ, бэемнай бузарлагданхай. Гэбэшье Паасхын һайндэрые һайндэрлэхэ гэһэн үдэр бусад зонтой хамта Эзэндэ үргэлөө үргэхэ гээшэ бидэндэ юундэ хорюултай болохо юм бэ?

⁸ Моисей тэдээндэ иигэжэ хэлэбэ: – Хүлеэн зогсогты. Би таанадта юун гэжэ Эзэнэй зарлиглахыень шагнаһууб.

⁹ Эзэн Моисейдэ иигэжэ айладаба:

¹⁰ – Израильшуудта иигэжэ хэлэ: Хэрбэеэ таанадай хэн нэгэн гү, али аша гушанар үхэгшын бэедэ гар хүрэжэ бузарлагдаа һаа гү, али гэрһээ холо аян замда ябаашье һаа, Эзэнэй зарлиглаһан Паасха сахин һайндэрлэхэ ёһотой.

¹¹ Хоёрдохи һарын арбан дүрбэнэй үдэшэлэн һайндэрлэг. Тиихэдээ тэдэнэр хониной мяха, эһээбэригүй болгоһон хилээмэ эдиг, гашуун амтатай үбһэ ногоонтой хамта эдиг.

¹² Тэдэнэр энэ һайндэртэ зорюулжа шанаһан эдеэ хоолоо үдэр болотор дууһан эдиг, шанаһан хонинойнгоо гансаханшье яһыень бү хухалаг, Паасхын бүхы хуулинуудые сахиг.

¹³ Хэрбэеэ арюун сэбэр байбашье, аян замда ябаагүйшье һаа, харин Паасха һайндэрлээгүй хүн Эзэнэй урда зэмэтэй болохо. Тиимэ зон Паасха һайндэрлээгүй, хууляар зарлигтаһан Паасхын тэрэ үдэр Эзэндэ үргэлөө үргөөгүй һаа, арад зонойнгоо дундаһаа үлдүүлхэ ёһотой.

¹⁴ Хэрбэеэ таанадай дунда ажаһуудаг ерүүл зон таанадтай хамта Эзэнэй зарлиглаһан Паасха һайндэрлэхэ гэбэл, тэдээндэ һайндэрлэлгэ зүбшөөгдэнэ. Зүгөөр тэдэ зон Паасхын хуулита бүхы ёһо гуримуудые сахиха ёһотой. Ушар юуб гэхэдэ, эдэ хуулита ёһо гуримууд бултанда зорюулагдана.

Үүлэн ба гал

¹⁵ Тэрэ үдэр майхан һүмын бодхоогдоходонь, үүлэн тэрэ Уулзалгын майхан һүмые бүрхөөжэ, дээрэнь тогтобо. Харин үдэшэһөө үглөөгүүр болотор майханай дээгүүр гал аһажа байһан мэтэ байба.

¹⁶ Тиимэ юумэн ходо болодог һэн: үдэртөө майхан һүмые үүлэн бүрхөөдэг, харин һүниндөө гал аһажа байһантай адли байдаг байба.

¹⁷ Майхан һүмэһөө дээшээ дэгдэжэ, тэрэ үүлэнэй тамаран саашалхадань, израильшууд аян замаа үргэлжэлүүлэн, тэрэниие дахадаг байба. Тогтоходонь, тогтодог байба.

¹⁸ Тиигэжэ Эзэн израильшуудта ошохо замыень, амарха сагыень харуулжа үгэдэг байба. Майхан һүмын дээрэһээ үүлэнэй дэгдэн саашаа тамархадань, израильшууд тэрэниие дахан ошожо, тогтоходонь тогтоно.

¹⁹ Майхан һүмын дээрэ тэрэ үүлэнэй удаанаар тогтоходонь, израильшууд Эзэнэй зарлигыень дүүргэжэ, аян замаа үргэлжэлүүлхэеэ болижо, удаанаар тэндээ тогтоно.

²⁰ Заримдаа тэрэ үүлэнэй ойр зуура байгаад дэгдэхэдэнь, израильшууд баһал удаан байрлангүй, Эзэнэй зарлигаар лэ ябажа байба.

²¹ Заримдаа үдэшэһөө үглөөгүүр болотор тэрэ үүлэнэй тогтоходонь, израильшууд тогтожо, тамаран саашаа ошоходонь, хойноһоонь дахан ошожо байба. Үүлэнэй байрадаа нэгэ үдэр, нэгэ һүни зогсоод, саашаа дэгдэн тамархада, израильшуудшье аян замда гарадаг байба.

²² Хэрбэеэ майхан һүмэ дээрэ тэрэ үүлэнэй хэдэн үдэр гү, али нэгэ һарашье тогтоо һаань, израильшууд тэрэ үүлэнэй тамаран саашаа ошохыень хүлеэжэ, тогтон байрлаһан газартаа байна. Гэбэшье тэрэ үүлэнэй дэгдэн саашаа тамархадань, аян замаа үргэлжэлүүлхэ гэжэ тэдэнэр, майхануудаа хуряагаад, тогтон байрлаһан газарһаа ябанад.

²³ Тиигэжэ тэдэнэр Эзэнэй зарлигаар лэ тогтожо, Эзэнэй зарлигаар лэ замда гаража байба. Иигэжэ тэдэ Эзэнэй Моисейдэ үгэһэн зарлигые сахин гүйсэдхэн байгаа бэлэй.